Олон улсын хөлбөмбөгийн холбоо (FIFA) 2021 оны шилдэг хөлбөмбөгчдийг тодруулж, “The Best” шагналаа гардуулав. Оны шилдэг эрэгтэй тоглогчийн шагналыг Польшийн шигшээ болон Германы “Байерн” багийн довтлогч Р.Левандовски хүртэж (48 оноо), удаах байруудад 44 оноотой Л.Месси, 39 оноотой М.Салах нар оржээ.
Санал асуулгын дүнг нээлттэй танилцуулсан агаад Р.Левандовски, Л.Месси, К.Роналду нар хэний төлөө санал өгснийг сонирхуулъя.
Р.Левандовски-Жоржиньо, Л.Месси, К.Роналду
Л.Месси-Неймар, К.Мбаппе, К.Бензема
К.Роналду-Р.Левандовски, Н.Канте, Жоржиньо
Үүнээс улбаалаад хэрэгт дуртай сэтгүүлчид сүүлийн арав гаруй жил хөлбөмбөгийн ертөнцийг эзэгнэж буй Л.Месси болон К.Роналду нар “Алтан бөмбөг”, “The Best” шагналын төлөө хэн, хэнийг нэрлэж байсныг нь сонирхжээ.
- Л.Месси хоёр ч удаа шилдэг гуравт К.Роналдуг нэрлэж байжээ. Тодруулбал, 2018 онд гурав, 2019 онд хоёрдугаар байрт нэрлэсэн.
- К.Роналду 2020 онд эхний бөгөөд цор ганц удаа Л.Мессигийн төлөө саналаа өгчээ.
- Лео хоёр удаа өөрийн багийн, эсвэл шигшээгийн бус тоглогчийг нэгдүгээрт нэрлэж байв. Тэрбээр 2018 онд Л.Модрич, 2019 онд С.Манэг шилдэг гурвынхаа эхэнд оруулж байсан юм. Бусад жилүүдэд тэрбээр “Барселона”, ПСЖ, эсвэл Аргентины шигшээ багийн андуудаа нэгт нэрлэж байсан.
- К.Роналду энэ тал дээр төвийг баримталсан байр суурьтай гэж болно. Тэрбээр 2014, 2019 онд л “Реал”, “Ювентус”-т хамт тоглож байсан С.Рамос, М.де Лигтийг шилдгээр нэрлэж байв. Гэхдээ эхний гуравт “Реал”-ын андуудаа оруулж байсныг нь дурдах хэрэгтэй. Тухайлбал, 2018 он хүртэл түүний нэрлэсэн шилдэг гуравт өөр багийнхнаас зөвхөн Хави, У.Снейдер, Р.Фалькао орж байв.
- К.Роналду нэг ч удаа португал тоглогч сонгож байгаагүй. Харин Л.Месси дөрвөн удаа нутаг нэгт тоглогчийнхоо төлөө санал өгчээ.
2021 ОНЫ “THE BEST” ШАГНАЛЫН ЭЗЭД
Шилдэг эрэгтэй тоглогч Р.Левандовски (Байерн)
Шилдэг эрэгтэй дасгалжуулагч Т.Тухель (Челси)
Шилдэг хаалгач Э.Менди (Челси)
Шилдэг эмэгтэй тоглогч А.Путельяс (Барселона)
Шилдэг эмэгтэй дасгалжуулагч Э.Хейс (Челси)
Шилдэг эмэгтэй хаалгач К.Эндлер (Лион)
Пушкашийн нэрэмжит шилдэг гоол Э.Ламела (Тоттенхэм/Севилья)
Фэйр-плей “Евро-2020” тэмцээний үеэр К.Эриксений амийг аварсан Данийн шигшээ болон эмнэлгийн ажилтнууд
Шилдэг хөгжөөн дэмжигчид Дани, Финландын шигшээ
Тусгай шагнал К.Роналду (Манчестер юнайтед)
Бэлгэдлийн шигшээ
Жанлуижи Доннарумма, Рубен Диаш, Леонардо Бонуччи, Давид Алаба, Нголо Канте, Жоржиньо, Кевин де Бройн, Лионель Месси, Роберт Левандовски, Эрлинг Холанд, Криштиану Роналду
Бэлтгэсэн Э.Манлайбаатар
