Дэлхийн аварга, Гиннесийн дээд амжилтыг эзэмшигч, Олон улсын их мастер, ихэр Н.Энхшүр, Н.Мөнхшүр нарын амжилт олны анхаарлыг татаж байгаа билээ. Оросын “Гайхамшигт хүмүүс” нэвтрүүлэгт тэднийг зочноор урьсан нь үүний илрэл. Монгол ихэр охин тус нэвтрүүлгийн зураг авалтад уржигдар оролцон, оросуудыг гайхшируулав.
Энэ үеэр тэд 1200 сарнайг есөн минутад тогтоон, алдалгүй санах, мөн ганцхан цэцэгний байрлалыг өөрчилснийг олох даалгавар биелүүлсэн байна. Гиннесийн дээд амжилтыг эзэмшигчид маань даалгавраа таван минутад багтаан, гүйцэтгэсэн аж. Эл нэвтрүүлгийг есдүгээр сард олны хүртээл болгох гэнэ. “Гайхамшигт хүмүүс” нэвтрүүлэг шинэ улирлын эхний дугаарынхаа зочноор Монголын оюун ухааны академийн захирал Х.Хатанбаатарыг урив.
Сонирхуулахад, Н.Мөнхшүр 30 минутад 5445 цифр, Н.Энхшүр нэг цагт 1924 хөзөр тогтоон алдалгүй санаснаар Гиннесийн дээд амжилтыг тус тус шинэчилсэн юм.
