М.Мораттигийн дуулиант наймаанууд

Италийн “Интер” (Милан) ба­гийн ерөнхийлөгч Массимо Моратти гэнэтийн, хачирхалтай наймаа хийдгээрээ алдартай нэгэн. Түүний 10 дуу­лиантай солилцоог толилуулъя.

1.  Кристиан Вьериг “Лацио”-гоос авав. Оронд нь 33 сая евро+Диего Симеоне. 1999 он - Вьери Миланд зургаан улирлыг өнгөрүү­лэхдээ 100 гаруй гоол оруулсан боловч ганц ч цом хүртээгүй билээ. Харин Симеоне “Лацио”-д очсон жилдээ л скудетто авчээ.
2.  Адрианог “Фламенго”-гоос авав. Оронд нь 3.5 сая евро+Вампета. 2001 он - Тэгэхэд Адриано хэний ч үл таних 19 нас­тай хүү байлаа. Хожмоо дэлхийн хэмжээний супер довтлогч болсон гээд бодохоор оносон наймаа байгаа биз.
3.  Жанлука Пальюкаг “Сампдори”-гоос авав. Оронд нь 4.1 сая евро+Вальтер Зенга+Риккардо Ферри. 1994 он - 1990-ээд оны Италийн ли­гийн хоёр одыг залуухан хаал­гачаар солив. Өнгөцхөн харвал утгагүй наймаа мэт. Үнэн хэрэг дээрээ Зенга, Ферри нарын одтой он жилүүд ард нь өн­гөрсөн байлаа. Харин тэр үед Пальюкагийн жинхэнэ өсөж дэвжиж байсан үе нь билээ. Жанлука “Интер”-т таван жил хүчин зүтгэхдээ UEFA-гийн цомд түрүүлж байв.
4. Златан Ибрагимовичийг “Барселона” руу явуулав. 46 сая евро+Самуэль Это’О-гоор сольсон. 2009 он - Швед довтлогч гурван жил орчим “Интер”-ийг ну­руун дээрээ үүрч явсан гэхэд болно. Тэрбээр тэнцэж явах үед хожлын бөмбөг хийж, хо­жигдож байхад тоог тэнцүүлэх гэх мэтээр багаа олонтаа аварч байв. Гэхдээ эдийн зас­гийн үүднээс авч үзвэл маргаангүй хожоотой наймаа байлаа. Цаг хугацаа ч “Хар-хөхүүд” ашигтай арилжаа хийснийг харуулсан юм. Учир нь Это’ О швед довтлогчоос дутахааргүй багтаа тусалж, “Интер” 2009/10 оны улиралд Аваргуудын лиг, Италийн АШТ, цомын тэм­ цээнд нэгэн амьсгаагаар түрүүлсэн билээ.
5. Диего Милито, Тьяго Мотта нарыг “Женоа”-гаас авав. Оронд нь 16 сая евро+Роберт Аквафреска+Франческо Больцони+залуучуудын багаасаа тоглогч өгөх болзолтойгоор. 2009 он - Өмнөх улиралд нь “Женоа”-г Италийн АШТ-д дээгүүр байр эзлэхэд хувь нэмрээ оруулсан хоёр гол тоглогчийг нь урвуулж дөнгөжээ. Өмнөд америкчууд ч “Интер”-ийг Аваргуудын лигт түрүүлж, скудетто хүртэхэд чадах чинээгээрээ тусалсан. 
6. Рикарду Куарежмаг “Порту”-гаас авав. Оронд нь 18.6 сая евро+Пеле. 2008 он - Том алдаа. Миланд хар дарсан зүүд шиг хагас жилийг өнгөрөөсөн Куарежма өвлийн солилцоогоор “Челси”-д зээлэгдсэн юм. Гэвч Англид ч дээрхийн адил хувь тавилан угтаж, хагас улирал болохдоо талбайд огт гарсангүй. Улмаар 2009 оны намар “Интер”-т буцаж ирсэн ч “дахин төрөх” боломжоо ашиглаж чадаагүй билээ. Португал хагас хамгаалагч “Интер”-т хоёр жил хагасыг өнгөрөөхдөө ердөө 24 тоглолтод оролцож, ганцхан гоол оруулжээ.
7. Иван Самораног “Реал”-аас авав. Оронд нь 1 сая евро+Роберто Карлос. 1996 он - “Догшин Иван”-ыг 30 нас хүрснийг үл тоон шилдэг залуу хамгаалагч Роберто Карлос дээ­рээ нэг сая евро нэмэн “Сан-Сиро”-д авчирсан түүхтэй. Бразил тоглогч Эзэн хааны багийн бүх үеийн түүхэн дэх шилдэг хамгаалагчдын нэг болсон бол чили довтлогч “Интер”-тэй хамт UEFA-гийн цомд аваргалсан билээ.
8. Франческо Коког “Милан”-аас авав. Кларенс Зеедорфоор сольсон. 2002 он - Солилцооны үр дүн: Коко сэлгээний сандлаас салахаа больж, улмаар зээллэгээр баг хэ­сэх болов. Эсрэгээр голланд тоглогч Европын шилдэг хагас хамгаалагчдын нэг болсон юм. 
9. Андреа Пирлог “Милан” руу явуулав. 2.8 сая евро+Андрес Гульелминпьетрогоор сольсон. 2001 он - Мөн л “Милан”-д хожоотой арилжаа бол­сон. Пирло клубийнхээ төдийгүй Италийн шигшээгийн лидер болж төлөвшсөнийг бүгд мэднэ. Тэгвэл аргентин довтлогч Гульел­ минпьетрог хөлбөмбөгийн хорхойтнууд хэ­дийнэ мартсан билээ.
10.  Фабиан Кариниг “Ювентус”-аас авав. Фабио Каннаварогоор сольсон. 2004 он - Каннаваро бэртэл гэмтлээс салахгүй бай­сан тул зоригтойгоор уругвай хаалгачаар тулж орхижээ. Карини “Интер”-т гурван жил болохдоо ердөө дөрөвхөн тоглолтод орол­цож, “Мурсия”-д зарагдсан аж. Харин Каннава­рогийн хувьд 2004-2006 он алтан үе нь байсан бөгөөд дэлхийн шилдэг хөлбөмбөгчинд олго­дог “Алтан бөмбөг” шагналыг хамгаалагчдаас анхлан хүртсэн билээ.