“Голын тохой дээр” шүлгийг “Мөрөөдлийн театр”-ын жүжигт ашиглахыг хоригложээ 

“Мөрөөдлийн театр”-ынхан шинэхэн уран бүтээл болох “Самсара-Тэртээх хоёр зүрх” жүжигтээ яруу найрагч А.Эрдэнэ-Очи­рын “Голын тохой дээр” шүлгийг ашиг­лас­наа­раа оюуны өмч зөрчсөн хэмээн Мон­голын зохиолчдын эвлэлээс энэ сарын 14-нд мэ­дэгд­сэн юм. Улмаар Соёлын гавьяат зүт­гэлтэн, “Болор цом”-ын эзэн яруу найрагч А.Эр­дэнэ-Очирын “Голын тохой дээр” шүл­гийг зохиогчийн эрхийн зөвшөөрөлгүй ашиг­ласандаа албан ёсоор уучлалт гуйж, хууль бус үйлдлээ даруй таслан зогсоохыг шаардсан. Мөн дахин ийм тохиолдол гаргавал хуулийн бай­гууллагад хандахаа илэрхийлсэн билээ.  
Үүний дараа “Арлааны Эрдэнэ-Очир сан”-гаас “Самсара-Тэртээх хоёр зүрх” жүжигт “Го­л­ын тохой дээр” шүлгийг гуравдугаар са­рын 15-ны тоглолтоос эхлэн ашиглахыг хориг­лолоо. Зохиогчийн эрхийн тухай бо­лон Оюуны өмчийн тухай хуулийн дагуу ту­хайн жүжгийн дууг цахим орчин, телевиз, радио­гоос татан авч, устгах шаардлага үүссэн. “Мө­рөөдлийн театр”-ын зүгээс энэ асуудалд хүндэтгэлтэй хандаж, бидний шаард­лагыг биелүүлж байгаа” гэжээ. 
Харин “Мөрөөдлийн театр”-аас тоглолт эхлэхийн өмнө “Арлааны Эрдэнэ-Очир” сан­гийн­­хантай хэд хэдэн удаа уулзаж, бүтээ­лийг нь ашиглах талаар зөвшилцсөн хэмээн мэдэгдсэн. Ингэхдээ шүлгийг дуу болгох­гүй­гээр ашиглаж, жүжигт болон нээлтийн тог­лолтоор л олон нийтэд толилуулна хэ­мээн ярилцсан гэсэн юм. Түүнчлэн дууг ца­хим сүлжээнд нийтлэхгүй хэмээн то­хи­ролц­соноо уг театрынхан мэдэгдлээ.

А.Дөлгөөн