НЕЙМАР: “Алтан бөмбөг”-ийг Винисиус хүртэнэ
Энэ жил дэлхийн шилдэг хөлбөмбөгчөөр Бразилын шигшээ болон “Реал” багийн тоглогч Винисиус шалгарах боломжтой, эсэхийг сэтгүүлч “Аль-Хилаль” багийн довтлогч Неймараас лавлажээ.
“Мэдээж, “Алтан бөмбөг” аль хэдийн түүнийх болсон. Би түүнийг дэмжиж байгаа. “Аваргуудын лиг”-ийн финалын өмнө бас дараа нь ч би түүн рүү мессеж бичсэн. Тэр энэ жил үнэхээр азтай, одтой байгаа. Тиймээс шилдгээр шалгарах нь гарцаагүй” хэмээн Неймар ярьжээ.
Винисиус энэ улиралд 39 тоглолтод оролцохдоо 24 гоол оруулж, 11 гоолын дамжуулалт өгснөөс гадна Испанийн Ла лиг болон “Аваргуудын лиг”-ийн аваргаар шалгарсан юм.
2024-06-05
Дуулиант солилцоо биеллээ олов
К.Мбаппег Мадридын нисэх буудал дээр З.Зидан өөрөө тосож, хүндлэл үзүүлэв. “Зидан бид нарыг зогсоол дээр машин дотроо хүлээж байсан. Үнэхээр гоё машин байсныг нь сайн санаж байна. Мэндэлсний дараа тэр намайг багийн бэлтгэл рүү хүргэжөгье гэсэн. Тэр урд суудлаа заагаад “Алив суучих” гэсэн юм. Тэр үед миний хамаг бие хөшөөд “Гутлаа тайлах уу?” гэж асуусан юм даг. Инээдтэй юм, яагаад тэгж асууснаа одоо ч мэддэггүй. Зизугийн машин болохоор л тэр болов уу. Намайг их инээдтэй юм асуусныг тэр мэдэж байсан ч даруухнаар “Мэдээж хэрэггүй, шууд суу” гэж хэлээд намайг бэлтгэлийн талбай руу аваачсан. Бондигоос ирсэн би Зизугийн машинд сууж байна гэсэн бодол тэр үед надаас салаагүй. Үнэхээр итгэмээргүй. Яг л зүүдэлж байгаа мэт санагдаж байлаа” хэмээн К.Мбаппе дурсжээ.
2024-06-05
20, 17 хүртэлх насныхны шигшээ баг Азийн цомын тэмцээнд өрсөлдөнө
Тэмцээний урьдчилсан шатны тоглолтыг есдүгээр сарын 21-29-нд зохион байгуулж, сугалааны дараа хүлээн авах улсыг тодруулах нь. Тэмцээн зохион байгуулах хорооноос мөн17 хүртэлх насныхны цомын шигшээ тоглолтыг Саудын Арабад зохион байгуулахаар шийдвэрлэжээ. Урьдчилсан шатанд 41 улс оролцохоор бүртгүүлж, 10 хэсэгт хуваагдсанаар шигшээд өрсөлдөх юм. Манай шигшээ багийнхан 28-д эрэмбэлэгдсэн байна.
2024-06-05
“Хан жигүүртэн” клубийнхэн футзалын дээд лигт өрсөлдөх нь
Монголын хөл бөмбөгийн холбооноос футзалын ордонд зохион байгуулсан нэгдүгээр лигийн хаалтын тоглолт өндөрлөлөө. Зургаан сар үргэлжилсэн эл тэмцээнд оролцсон багуудаас аваргын төлөө дасгалжуулагч Л.Банзрагчийн удирдлагад бэлтгэл базаасан Б.Гарамбазар ахлагчтай “Хан жигүүртэн” клубийнхэнтэй “Улаанбаатарын мазаалайнууд”-ын тоглогчид сүүлийн хоёр тойрогт ана мана өрсөлдсөн юм.
2024-06-04
Б.Гарьдмагнай өндөр зэрэглэлтэй дасгалжуулагч болжээ
Хөл бөмбөгийн үндэсний шигшээ багт олон жил тоглосон, өдгөө Монголын хөл бөмбөгийн холбооны техникийн захирлын алба хашиж буй Б.Гарьдмагнай Азийн хөл бөмбөгийн холбооны про зэрэглэлтэй анхны дасгалжуулагч болов. Тэрбээр Монгол болон Катарын хөл бөмбөгийн холбооны хамтын ажиллагааны хүрээнд сургалтад хамрагдаж амжилттай төгссөнөөр ийнхүү өндөр зэрэглэл авчээ.
2024-05-30
К.Роналду супер дээд амжилт тогтоов
Португалын супер од Испанийн Ла лиг, Италийн Сери-А, Английн Премьер лиг, Саудын Арабын аварга шалгаруулах тэмцээний мэргэн бууч болоод байна. “Би дээд амжилтын араас хөөцөлддөггүй. Дээд амжилт л миний араас явдаг юм” хэмээн К.Роналду ярьжээ. Ташрамд дурдахад, тэрбээр “Реал” багт тоглож байхдаа лигийн шилдэг мэргэн буучаар гурвантаа тодорч байв.
2024-05-29
Хөл бөмбөгчид оюутны ДАШТ-д өрсөлдөхөөр бэлтгэл хийж байна
БНХАУ-ын Шанхайд ирэх сарын 10-16-нд оюутны ДАШТ болно. Тус тэмцээнд Монголын футзалын шигшээ багийнхан С хэсэгт Украин, Шинэ Зеланд, Хорватын хөл бөмбөгчидтэй тоглох нь. Манайхан хүчтэй багуудтай өрсөлдөхөөр учраа таарсан тул тэмцээн эхлэхээс өмнө дасгалжуулагч С.Эрдэнэ-Очир, П.Алтантулга нарын удирдлагад бэлтгэлээ базаахаар Казахстаны Астана хотод хөл тавьсан. Тэд тэнд шигшээ багийнхантай нь хамтарсан бэлтгэл хийж буй юм. Үүний зэрэгцээ энэ сарын 16-19-нд зохион байгуулсан “Елеу кап” тэмцээнд оролцлоо
2024-05-20
14 000 км замыг дугуйгаар туулж, мөрөөдлөө биелүүлсэн монгол залуу
Улаанбаатараас Британийн Манчестер хот хүртэл 19 улсаар дамжин, 14 000 км замыг дугуйгаар туулсны эцэст шүтэн биширдэг багийнхантайгаа уулзаж, хүсэл мөрөөдлөө биелүүлсэн Б.Очирваань цахим орчинд шуугиан тариад байна. Тэрбээр Английн “Манчестер найтед” багийн хөгжөөн дэмжигч, Уэйн Рүүнийгийн шүтэн бишрэгч. Б.Очирваань агийнхантайгаа уулзахаар өнгөрсөн оны тавдугаар сарын 5-нд Сүхбаатарын талбайгаас дугуйтай хөдөлсөн юм. Тэрбээр яг жилийн дараа мөрөөдлөө биелүүлж, “Олд траффорд” цэнгэлдэх хүрээлэнд хамгийн хайртай тоглогч, урам зориг өгөгч Уэйн Рүүнитэй гар барин уулзав. Энэ үеэр Уэйн Рүүни “Багт илгээсэн захидлыг тань уншиж байхдаа үнэхээр сэтгэл хөдөлж, биечлэн уулзаад “Сайн байлаа” гэж хэлэхийг хүссэн юм. Чи тун гайхамшигтай амжилт бүтээлээ. Чи өөрөөрөө, юу хийснээрээ бахархах ёстой. Энэ үйл явдал олон хүнд урам зориг, итгэл найдвар өгнө байх” гэжээ
2024-05-20
“Дэрэн” клубийнхэн аваргаллаа
Монголын хөл бөмбөгийн холбооноос өнгөрсөн хоёрдугаар сард хөвгүүдийн 14 хүртэлх насныхны лигийн АШТ-ийг эхлүүлсэн билээ. Футзалын ордонд гурван сар үргэлжилсэн эл тоглолтод УАШТ-д оролцсон багуудаас шилдэг найм нь өрсөлдөж шилдгээ тодруулав. Нийт 56 тоглолт өрнөснөөс Б.Орхон дасгалжуулагчтай “Дэрэн” клубийнхэн тус бүр нэг хожигдол, тэнцээ, 12 ялалт байгуулж аварга боллоо. Тэдэнтэй тэргүүн байрын төлөө өрсөлдсөн Н.Баттулга дасгалжуулагчтай “Хараацай” клубийнхэн мөнгө, Д.Батнасан дасгалжуулагчтай “Эрчим”-ийнхэн хүрэл медаль хүртсэн
2024-04-29
Дээд лигийн тоглолтын бөмбөгийг шинэчилжээ
Монголын хөл бөмбөгийн холбоо болон “Келме” брэндийн хамтын ажиллагааны хүрээнд дээд лигийн 19 дүгээр тойргоос эхлэн “Vortex 20S” загварын, олон улсын стандарт хангасан бөмбөгөөр тоглохоор боллоо. Эл бөмбөг нь “Vortex” загварын шинэчлэгдсэн хувилбар гэдгээрээ онцлогтой аж. 32 хээнээс бүрдсэн тул тоглолтын явцад эргэлтийг холоос илүү тод харуулдаг. Мөн цаг агаарын ямар ч нөхцөлд хэлбэр, хий, жингийн тэнцвэрээ хадгалдаг юм байна. Хөл бөмбөгийн мэргэжилтнүүд дээрх бөмбөгийг чанарын шаардлага хангасан, мэргэжлийн томоохон тоглолт болон тамирчид өндөр түвшний бэлтгэл хийхэд ашиглах боломжтой хэмээн дүгнэжээ.
2024-04-26
“Хан жигүүртэн” клубийнхэн алтан цомын эзэн боллоо
Монголын хөл бөмбөгийн холбооноос зохион байгуулсан залуучуудын лигийн АШТ өндөрлөлөө. Тус тэмцээнд 19 хүртэлх насныхны таван клубийн 90 тоглогч ур чадвараараа өрсөлдөж, аварга багийг тодруулав. Ана мана тоглосон олон өрсөлдөгчөөс энэ удаа Л.Банзрагч дасгалжуулагчийн удирдлагад бэлтгэл базаасан “Хан жигүүртэн” клубийнхэн 21 оноогоор түрүүлж, алтан цомын эзэн болов
2024-04-24
Манай тамирчид Камбожийн шигшээтэй тоглох нь
Олон улсын хөл бөмбөгийн холбооны өдрийг тохиолдуулан Монголын үндэсний шигшээ багийнхан ирэх зургаадугаар сарын 7-нд Камбож улсын тамирчидтай Пномпень хотод нөхөрсөг тоглолт хийхээр боллоо. Харин хариу нөхөрсөг тоглолт Улаанбаатарт 11-нд болох юм. Шигшээ багийнхныг үүнээс гадна ирэх есдүгээр сард болох, 2027 оны Азийн хөл бөмбөгийн холбооны Азийн цомын тэмцээний урьдчилсан шатны тоглолт хүлээж байгаа. Мөн арваннэгдүгээр сард болох Зүүн Азийн АШТ-ий эхний шатны тэмцээнд оролцоно.
2024-04-18
Аваргын төлөөх тоглолт өнөөдөр эхэлнэ
Эл тойргийн тэмцээнд нэгэн сонирхолтой тоглолт “Хангарьд”, “Дэрэн” клубийн хооронд өрнөж, хуурай тэнцээгээр өндөрлөлөө. 14 дүгээр тойргийн тоглолт Монголын хөл бөмбөгийн холбооны талбайд болно. Задгай талбайн нээлтийн тоглолтыг хүснэгтийг тэргүүлэгч “Булган СП фалконс”, “Дэрэн” багийнхан эхлүүлнэ. Аваргын төлөөх тоглолт өнөөдөр19.15 цагт эхлэх бол маргааш “Төв азарганууд”, “Баварианс”-ынхантай, “Хаан хүнс-эрчим”-ийнхэн “Хангарьд”-чуудтай тоглоно. Ням гарагт “Ховд”, “Брераилч”, “Хоромхон”, “Улаанбаатар” багийнхан өрсөлдөх аж.
2024-04-04
Даруухан лигийн хурц одууд
Европын хөл бөмбөгийн шилдэг багуудын хувьд дөрөв болон тавдугаар сар нь аваргын цомын төлөө өрсөлддөг шийдвэрлэх үе юм. Түүнчлэн багуудын спортын албаны захирал, скаутын албаны хувьд зуны солилцоо, наймаагаа төлөвлөх чухал ажил өрнөж эхэлдэг. Тэгвэл тэдний анхаарлыг татах боломжтой, Европын шилдэг таваас бусад лигт тоглож буй авьяаслаг залуу хөл бөмбөгчдийг танилцуулъя.
2024-04-03
Испани, Бразилын шигшээ 11 жилийн дараа “учирлаа”
Хөл бөмбөгийн спортын түүхэн дэх хоёр агуу гүрэн болох Испани, Бразилын шигшээ баг өнөөдөр Мадрид хотод нөхөрсөг тоглолт хийнэ. Эл хоёр баг хамгийн сүүлд 2013 онд учраа таарч тоглосон түүхтэй.
2024-03-27
Хөл бөмбөг сонирхогчдын тэмцээн зохион байгуулах нь
Монголд үйл ажиллагаа эрхэлж буй байгууллага, аж ахуйн нэгж, бизнес эрхлэгчдийн дунд хамт олны эерэг хандлага бүрдүүлэх, хөдөлгөөний дутагдлаас сэргийлж, эрүүл, идэвхтэй, эрч хүчтэй амьдруулах зорилгоор сонирхогчдын “Bud сup-2024” хөл бөмбөгийн тэмцээн зохион байгуулах нь. Баянзүрх дүүргийн 15 дугаар хорооны хөл бөмбөгийн талбайд долоо хоног бүрийн амралтын өдөр болох тус тэмцээнд мэргэжлийн лигийн тамирчдаас бусад хүн оролцох юм
2024-03-27
Премьер лигт 13 улсын 52 легионер тоглож байна
Монголын хөл бөмбөгийн үндэсний дээд лигт сүүлийн 10 гаруй жил легионерууд оролцох болсон. Өмнөх улирлынлигт өрсөлдсөн 10 баг Япон, ОХУ, Итали, Канад, Англи, Тринидад ба Тобаго, Нигери, Серби зэрэг улсаас нийт 22 гадаад тоглогч урьсан юм. Тэгвэл одоо Төв аймаг дахь “Аэрдом” бэлтгэлийн төвд үргэлжилж буй премьер лигт манай хөл бөмбөгийн спортын түүхэнд хамгийн олон буюу 13 улсын 52 легионер оролцож, авьяас, ур чадвар, туршлага, тоглох техникээрээ тэмцээний уур амьсгалыг өрсөлдөөнтэй, улам сонирхолтой болгон хөгжөөн дэмжигчдийг цэнхэр дэлгэцийн өмнө уяж буйгаараа онцлогтой. “Хоромхон”, “Булган СП фалконс” баг хамгийн олон буюу долоон легионертой. “Улаанбаатар”, “Хангарьд” баг тус бүр зургаа, “Төв азарганууд”, “Баварианс”, “Брера илч”, “Хаан хүнс-Эрчим” баг гадаадын таван тамирчин оролцуулж байна.
2024-03-15
“Булган СП фалконс” клубийнхэн лигийн тоглолтыг өнгөлж эхэллээ
Монголын хөл бөмбөгийн холбооноос зохион байгуулж буй премьер лигийн тойргийн тоглолтууд тун сонирхолтой өрнөж байна. XI тойргийн ширүүхэн өрсөлдөөнөөс “Булган СП фалконс” ээлжит ялалтаа авав. Тэгвэл “Дэрэн”, “Хоромхон”, “Төв азарганууд”, “Хаан хүнс-эрчим”-ийнхэн оноо хувааснаар арын багуудаас есөн онооны зөрүүтэй боллоо. “Хангарьд” клубийнхэн өвлийн завсарлагаас хойш хоёр дараалан ялалт байгуулж, өрсөлдөөнд хүчтэй орж ирсэн бол “Брера илч”-ийнхэн улирлын хоёр дахь ялалтаа байгуулж, унах бүсээс холдоход алхам ойртов
2024-03-14
