АНУ-ын их, дээд сургууль, коллежийн “Naia” дивизионы аварга шалгаруулах чөлөөт бөхийн тэмцээн Канзас мужийн Вичита хотод өнөөдөр эхэлнэ. Тэмцээнд Небраска мужийн Грит хотын “Доан” их сургуульд сурдаг Ц.Чингэс (71.2 кг), Б.Бат-Эрдэнэ (63.9 кг), Б.Одгэрэл (130 кг) нар барилдах юм. Тэднээс Б.Бат-Эрдэнэ 2020, 2021 онд тус тэмцээнд оролцон түрүүлж байв. Сонирхуулахад, Монголоос спортын мастер Ц.Цогтбаяр тус сургуульд туслах дасгалжуулагчаар ажилладаг аж. Чөлөөт бөхийн спорттой холбоотой өөр мэдээ дуулгахад, Дэлхийн бөхийн нэгдсэн холбооноос энэ жил зохион байгуулах тэмцээний хуваарийг өөрчиллөө. Итали улсад болох чансааны оноо олгох тэмцээнийг тав, 17 хүртэлх насныхны өсвөр үеийн Азийн АШТ-ийг 23 хүртэлх насныхантай нэгтгэн зургаа, 20 хүртэлх насныхны залуучуудын Азийн АШТ-ийг 15 хүртэлх насныхантай мөн нэгтгэн долдугаар сард зохион байгуулах нь. Мөн насанд хүрэгчдийн Азийн АШТ-ийг Монгол Улсад ирэх сарын 19-24-нд зохион байгуулах эрх олгов.
