“Бээжин-2022” өвлийн олимп энэ сарын 20-нд өндөрлөсний дараа паралимпийн наадам болно. АНУ-ыг төлөөлж, паралимпийн тэргэнцэртэй көрлингийн багт У.Бат-Оюун хэмээх монгол эмэгтэй оролцох нь. Тэрбээр тус улсыг 22 жилийн тэртээ зорихдоо автомашины осолд оржээ. У.Бат-Оюун зургаан жилийн өмнөөс көрлингийн спортоор хичээллэсэн бөгөөд өнгөрсөн жил Финланд улсын Лохжа хотод зохион байгуулсан ДАШТ-д амжилттай оролцож, паралимпэд өрсөлдөх эрх авсан байна. Мөн өмнөх жил нь Швейцарын Ветцикон хотод болсон “International wheelchair curling tournament” тэмцээнд өрсөлдөхдөө 2018 онд паралимпийн аваргаар шалгарсан БНХАУ-ын багийг хожиж байв.
1954 онд анх хэвлэгдсэн цагаасаа спортын ертөнцийн сонирхолтой нийтлэлээр Америк, Канадад 3.3 сая захиалагчтай, цаашлаад 20 сая гаруй уншигчтай болсон “Sports illustrated” сэтгүүлийн “Бээжин-2022” өвлийн олимпын XXIV болон паралимпийн өвлийн XIII наадамд зориулсан дугаарт У.Бат-Оюуныг онцолжээ. Тухайлбал, сонирхогчдын спортын авьяаслаг тамирчдын амжилтын тухай өгүүлдэг “Face in the crowd” буланд нь монгол бүсгүйн амжилтын талаар бичсэн байна. Эл сэтгүүл нь мэргэжлийн спортын хүчирхэг лигүүд болон спортын эргэн тойронд болж буй дуулиан шуугиан, үйл явдал, таамаглал, цуу ярианд үнэлэлт дүгнэлт, анализ хийдгээрээ алдартай
