2010 оны Ванкуверийн өвлийн олимпын наадам эмгэнэлт явдлаар эхэлснийг олон хүн санаж байгаа болов уу. Гүржийн залуу чаргачин Нодар Кумариташвили бэлтгэлийн гулсалтын үеэр осолдон нас барсан. Нээлтийн ёслолоос хэдхэн цагийн өмнө. Үнэхээр харамсалтай. Түүний эл гунигт түүх мартагдах мэт санагдаж байсан ч үгүй аж. Чухам энэ талаар одоо товч өгүүлье.
“Ванкувер-2010”-т чарганы төрөлд түрүүлсэн Германы тамирчин Феликс Лох алтан медалиа хоёр хэсэг хуваан хайлуулж, нэг дээр нь Нодарын хөргийг хийлгэсэн байна. Улмаар Гүржид очиж, Кумариташвилигийн гэр бүлд медалийнхаа талыг бэлэглэжээ. Энэ бүхнийг Нодарын ойрын хамаатан Саба дэргэдээс нь харж байлаа. 2010 онд тэрбээр 10 настай байв. Чухам тухайн үед олимпын наадамд өөрийнхөө болоод Нодарын төлөө заавал оролцох ёстой гэж Саба шийдсэн аж. Өдгөө Саба 21 настай. Ванкуверт Нодар мөн л 21 настайдаа очиж байсан. Харин Саба энэ жил Бээжингийн олимпын наадамд оролцоно. Бэлтгэлийн эхний гулсалтын үеэр 17 дугаарт, өнөөх Ф.Лохын дараа оржээ. Залуу гүрж тамирчин Бээжингээс медаль хүртэх бараг л боломжгүй. Эхний 10-т ч орохгүй байх. Гэхдээ түүний гайхам түүхийн дэргэд энэ бүхэн тийм чухал гэж үү. Ямартай ч Кумариташвили овогтой хүү өвлийн олимпын наадамд оролцож байгаа нь л түүнийг “Бээжин-2020” олимпын наадмын хамгийн сэтгэл хөдөлгөм түүхийн нэгт гарцаагүй оруулж байгаа юм.
Гэр бүлийнхэн нь түүний гулсалтыг хэрхэн хүлээж авахыг хэлэхэд хэцүү. Сабагийн өвөө Гүрж дэх чарганы замын анхны төсөлд оролцож байсан бол аав нь эл спортын үндэсний холбоог тэргүүлдэг. Эмгэнэлт явдлын дараа гэр бүлд нь асар хүнд байсан ч сэтгэл зүрхээ зориулсан чарганы спорт нь Гүржэд Нодартай хамт устаж үгүй болохгүй байх нь тэдэнд чухал байв. Канадад чарганы зам дээр инженерүүдийн гаргасан бүдүүлэг алдаа тэдний хувьд хар толбо болох ёсгүй гэж кумариташвиличүүд дүгнэжээ. Тиймээс Саба Бээжинд хүрэлцэн ирсэн нь тэдний хувьд нэн чухал юм. Чарганы спорт Гүржид мөхөөгүйг тэр нотлох болно. Кумариташвилигийн гэр бүлийг аймшигт зовлон дарж чадаагүйг тэр харуулна. Мөн спорт юуг ч ялж чаддагийг нотолно. Сабаг анхны гараандаа гарах үед дэлхий даяараа Нодарыг санан дурсах нь гарцаагүй.
Бэлтгэсэн Н.Энх
