Азийн волейболын холбооноос тивийн аварга шалгаруулах тэмцээний оноолт гаргах үйл ажиллагааг Тайландын Бангкок хотод цахимаар зохион байгуулжээ. Энэ онд тивийн хэмжээнд 10 тэмцээн зохион байгуулах оноолт гаргасан байна. Тэдгээрээс “Челленж цом”-ын аварга шалгаруулах гурав дахь удаагийн тэмцээнд манай тамирчид эрэгтэй, эмэгтэйчүүдийн төрөлд аль алинд нь оролцоно. Уг тэмцээнийг үүнээс өмнө 2018 онд Шри Ланка улсын Коломбо хотод зохион байгуулсан бөгөөд манай эрэгтэйчүүд VIII байрт шалгарч байв. Дараагийн тэмцээнийг уг нь 2020 онд зохион байгуулахаар товлосон ч цар тахлын улмаас хойшлуулжээ. Энэ удаагийн эрэгтэйчүүдийн тэмцээнийг Киргизийн Бишкек хотод ирэх наймдугаар сарын 28-наас есдүгээр сарын 4-нд зохион байгуулна. Эмэгтэйчүүдийнхийг Хонконгод наймдугаар сарын 22-28-нд зохион байгуулахаар төлөвлөжээ. Тэмцээний оноолтыг жагсаалаа.
Эрэгтэйчүүд
А хэсэгт: Киргиз, Арабын Нэгдсэн Эмират Улс, Монгол Улс
В хэсэгт: Саудын Араб, Шри Ланка, Узбекистан, Кувейт
Эмэгтэйчүүд
А хэсэгт: Хонконг, Макао, Малайз
В хэсэгт: Монгол, Шинэ Зеланд, Узбекистан, Шри Ланка улсын багийнхантай тоглоно
Бэлтгэсэн Г.Цэцэг
