Хөгжингүй орнуудад иргэддээ түүх соёлын үнэт өвийг танилцуулж, үндэсний өв соёлоо сурталчлах зорилгоор музейн шөнийн үзвэрийн үйл ажиллагааг санаачлан зохион байгуулах нь түгээмэл. Яг тэдний адил шөнийн цагаар музейд зочилж, тэр ч бүү хэл “Авьяаслаг азичууд” шоу нэвтрүүлгийн хоёрдугаар байранд шалгарсан “Хөсөгтөн” хамтлагийн тоглолтыг үзэх боломжийг “Чойжин ламын сүм” музейн хамт олон олгож буй. “Шөнийн музейд Хөсөгтөн” ардын урлагийн тоглолт маргааш буюу долдугаар сарын 9-нд 20.00 цагт эхэлнэ.
Музейн үйлчилгээг сонирхолтой хэлбэрээр нийтэд хүргэх, олон талт соёлын арга хэмжээг музейд зохион байгуулах боломж бийг харуулах зорилгоор 2011 оноос “Шөнийн музей” арга хэмжээг уламжлал болгон хийсээр ирсэн байна. Энэ жилийн арга хэмжээний тоглолтын хэсэг “Чойжин ламын сүм” музейн цэцэрлэгт болох тул үзэгчдийг дулаан хувцас өмсөж ирээрэй хэмээн зохион байгуулагчид нь зөвлөсөн.
