“Хураасан хөрөнгөөр тусгай сан байгуулж, боловсрол, эрүүл мэндийн салбарт зарцуулна”

ХЗДХЯ-ныхан Нийтийн албан тушаалтны хууль бус хөрөнгө, орлогыг хураан авах, нө­хөн төлүүлэх тухай анхдагч хуулийн төс­лийг өн­­гөр­сөн дөрвөн сарын хугацаанд бо­ловс­руул­­жээ. Үүний хүрээнд өнгөрсөн баа­сан га­рагт нээлттэй хэлэлцүүлэг зохион бай­гуул­сан юм.  
Тус хэлэлцүүлгийн үеэр Хууль зүй, до­тоод хэр­гийн сайд О.Алтангэрэл “Манай ул­сад ав­лигатай тэмцэх нөхцөл, эрх зүйн ор­чин туйлын хүнд байсаар ирсэн. Албан ту­шаалт­нууд нь үндэслэлгүй хөрөнгөжиж, тен­дерүүдийг ах, дүү, хамаатан садан, танил тал­даа өгч, ямар нэгэн байдлаар давуу эрх үүс­гэх нь бүр хавтгайрчээ. Мөн бусдаас илүү мөнгөтэй хэрнээ хийсэн ажилгүй хүмүүс Мон­голын төрд олширлоо. Үүнээс үүдэн иргэд нь хууль, төрдөө итгэхээ больсон. Тиймээс хам­тарсан Засгийн газар байгуулж, шударга ёсны төлөөх тэмцэлд ахиц гаргах үүднээс энэхүү хуу­лийн төслийг боловсрууллаа. Өнгөрсөн хуга­цаанд өршөөгдсөн болон ямар нэгэн байдлаар өөрсдийгөө хаацайлсан этгээдүүдэд эрүү­гийн хариуцлага хүлээлгэх боломжгүй бол эд хөрөнгийг нь хураахыг уг хуулийн тө­сөлд онцолсон. Ер нь авлигач албан ту­шаалт­нуу­дын хөрөнгийг заавал хураах хэрэгтэй. Цаа­шид нийтийн албан тушаалтан буюу Ерөн­хийлөгч, УИХ, Засгийн газар, Үндсэн хуу­лийн цэцийн гишүүд, Дээд шүүхийн шүүгч зэрэг өн­дөр албан тушаалтнаас эхлээд төрийн өм­чит ком­панийн захирлууд хөрөнгөө хууль ёсоор тайл­бар­лаж чадахгүй л бол хураалгадаг болъё. Хэрэв нийтийн гэх үгийг төрийн өндөр ал­бан тушаалтан болгоод өөрчилчихвөл тө­­­рийн өмчит ком­панийн захирал, Засаг дарга, яамны газрын дар­га нар бултчихна. Тий­­мээс нийтийн гэх үгэнд дээрх бүх албан ту­шаалт­ныг хамааруулан ойлгох ёстой. Ху­раа­сан хө­рөн­гөөрөө тусгай сан бай­гуулж, боловс­рол, эрүүл мэндийн салбарт зар­цуулна. Ав­ли­гач­дын хөрөнгийг ингэж төв­лө­рүүлс­нээр маш том өөрчлөлт гарна” гэсэн юм. 
Хэлэлцүүлэгт оролцогчдын олонх нь уг хуулийн төсөл цаг үеэ олсон гэж үзэж байсан бол зарим нь “УИХ-д сууж буй хүмүүсийн олонх нь үндэслэлгүй, хууль бусаар хөрөнгөжсөн. Тий­мээс тэд энэ хуулийг батлалцах нь юу л бол” хэмээн эргэлзэж байв. Түүнчлэн ир­гэ­дийн төлөөлөл хуулийг хэрэгжүүлэх үйл яв­цад олон нийтийг оролцуулсан түр хороо бай­гуу­лах нэн шаардлагатайг онцолсон юм.  
Хуулийн төслийн зарим зүйл заалтын та­лаар Үнэн ба зөв намын дарга А.Отгонбаатар “Уг хуулийн заалтад хэргийг хоёр жилийн хуга­­цаанд мөрдөн шалгана. Хэрэв тогтсон хуга­­цаанд амжихгүй бол долоо хоногийн өм­нө хү­сэлт өгч, нэг жилээр сунгахаар заажээ. Гэ­тэл Ерөнхийлөгч байсан хүн үүнийг гурав бит­­гий хэл, 30 жилээр ч ухрааж чадна шүү дээ. Ин­гээд л мултарчихна. Хугацааг нь хяз­гаар­гүй бай­хаар тогтоох ёстой” гэв. Харин Хууль зүй, дотоод хэргийн сайд О.Алтангэрэл “Хяз­гааргүй хугацаатай мөрдөн шалгах үйл явц гэж дэлхийд байхгүй. Хүн алсан хэрэгт­нийг хүртэл ямар хугацаанд мөрдөн шалгахыг эрүү­гийн процесст нарийвчлан заасан байдаг. Үүнд нь амжуулаад л шалгах ёстой. Ингэж ху­га­цаа тогтоодгийн учир нь шалгуулж буй хү­нээ ч бас бодсон хэрэг. Тиймээс хоёр жил бол хангалттай хугацаа” гэх хариулт өгсөн юм.

У.Цэцэгсүрэн