Канадын “Circus Life” Youtube сувгаас олон улсын мэргэжлийн циркийн жүжигчдийн дунд анхлан зохион байгуулсан тэмцээнд монгол бүсгүй оролцож, тэргүүлэв. Тодруулбал, нийслэлийн "Улаанбаатар" чуулгын дэргэдэх “Улаанбаатар цирк”-ийн жүжигчин, мэргэжлийн уран нугараач А.Уранбилэг “Дэлхийн топ циркчин” тэмцээнд амжилттай оролцон тэргүүн байрт шалгарлаа. Уг тэмцээн дөрвөн үе шаттайгаар болсон юм. Хэдхэн хоногийн өмнө А.Уранбилэг олон улсын тэмцээний шилдэг зургаан оролцогчийн нэгээр шалгарч, монголчууд түүний захыг мушгиж суусан билээ. Тэрбээр баярт мөчөө ард түмэнтэйгээ хуваалцан ""CirqueLife олон улсын тэмцээний маань хариу гарлаа. Гурван үзүүлбэр бэлдэж, бүтээлч бичлэг гаргах амаргүй байлаа. Хөл хорионы үеэр өөрийгөө сорьсон, туршлага хуримтлуулсан тэмцээн болж өндөрлөлөө. Дөрвөн үе шаттай зохион байгуулагдсан уг тэмцээнд “Тэргүүн” байранд орон ялагч болсноо та бүхэнтэйгээ хуваалцахад таатай байна. Финалын шатанд намайг дэмжиж лайк дарсан бүх монголчууддаа баярлалаа. Хөдөлмөрийг маань үнэлж ярилцлага авсан, фэйсбүүк хуудаснаа пост хийсэн, мэдээ болгон оруулсан сувгууд, нийтлэл бичсэн та бүхэнд, стори хийж давлагаалсан бүх хүмүүст чин сэтгэлээсээ талархаж байна" хэмээн бичжээ.
