Сэтгэл, хүсэл тэмүүлэл, хоолойн өнгө сайхан нийлдэг дуучин гавьяат жүжгчин Б.Ганчимэг, соёлын тэргүүний ажилтан С.Баттулга нарын хамтарсан уран бүтээлийн “Ерөөлтэй аялгуу” уран бүтээлийн хамтарсан тоглолт, цомгийн баяр өнөөдөр Тусгаар тогтнолын ордонд болох гэж буй юм. Энэ талаар тодруулж дуучин С.Баттулгатай товч ярилцсан юм.
-Б.Ганчимэг гавьяат та хоёр сэтгэлийн хөг нэгтэй бололтой. Сүүлийн үед нэлээд хамтарч дууллаа...
-Тийм ээ, бид анх 2004 онд гэр бүлийн дуу төрийн шагналт хөгжмийн зохиолч Б.Шаравын “Тэнгэрлэг гэр бүл”-ийг хамтарч дуулсан юм. Түүнээс хойш уран бүтээлийн хувьд их ойлголцдог, болж өгвөл жилдээ ганц, хоёр дуу хамтарч дуулчихдаг болсон. Ингэж явсаар байгаад одоо тус бүртээ тав, тав, хамтарч дуулсан найм, нийт 18 дуунаас бүрдсэн хамтарсан тоглолт хийх гэж байна.
-Тоглолтын хөтөлбөрөөс сонирхоё. Та хоёрын дуу эх орон, элбэрэл хайр, гэр бүлийн нандин харилцааны тухай өгүүлсэн байх нь ч байдаг шүү дээ...
-За, дараалал хамаагүй ганц нэгийг дурдчихъя, тийм ээ. Би ганцаараа гэхэд төрийн шагнал хөгжмийн зохиолч Ц.Чинзоригийн хөгжим, Ж.Лхагва, Н.Сүхдорж нарын шүлэг “Сэлүүн дэнжийн яргуй”, хөгжмийн зохиолч Д.Түвшинсайханы хөгжим, М.Буянтогтохын шүлэг “Ингэн туулиас” гэсэн дуунуудыг Морин хуурын чуулгатай хамтарч дуулна. Б.Ганчимэг гавьяат Д.Бадарчийн хөгжим, ардын уран зохиолч Д.Пүрэвдоржийн шүлэг “Хаврын шөнийн бодол”, төрийн шагналт, ардын жүжигчин С.Гончигсумлаагийн хөгжим, ардын уран зохиолч Б.Баастын шүлэг “Чамайг үдье” зэрэг дууг ганцаараа Хилийн цэргийн дуу бүжгийн чуулгын найрал хөгжимтэй дуудах жишээтэй. Хоёул хоршиж урлагийн гавьяат зүтгэлтэн Г.Алтанхуягийн хөгжим, М.Буянтогтохын шүлэг “Элэг бүтэн айлын дуу”, төрийн хошой шагналт, ардын жүжигчин хөгжмийн зохиолч Н.Жанцанноровын “Бурхан Халдун” гэсэн дуунуудыг дуулах юм.
-Том том найрал хөгжим тоглох нь ээ?
-Тэгнэ. Миний ажилладаг Улсын филармонийн Морин хуурын чуулга, Б.Ганчимэг гавьяатын ажилладаг Хилийн цэргийн дуу бүжгийн чуулгын найрал хөгжим тоглоно. Ер нь нийтдээ 150 гаруй уран бүтээлч энэ үдшийн тоглолтод ороцох юм. Хамтарсан уран бүтээлийн CD-ний баяр болохоор нээлтийн энэ тоглолтод ирсэн хүмүүс цомгийг 50 хувийн хямдралтай худалдаж авах боломжтой.
-Цомгийн үнэ хэд вэ?
-20 мянган төгрөг. Тэгэхээр “Ерөөлтэй аялгуу”-д ирсэн хүмүүс 10 мянгаар авч болно оо гэсэн үг.
-Байнга бэлтгэлтэй байж, үргэлж шинийн төлөө тэмжүүлж, хөдөлмөрлөж явдаг та хоёрт уран бүтээлийн амжилт хүсье.
-Баярлалаа.
***
Ахмадуудаа баярлуулах сайхан боломж санагдлаа.
Мэдээллийн дэлгэрэнгүйг 99997586-аар аваарай.
Сэтгүүлч Р.Оюунжаргал
