Өвөрмөц, чадалтай дуучин С.Наран Олон улсын эмэгтэйчүүдийн эрхийг хамгаалах өдөрт зориулан тоглолтоо хийхээр зэхэж буй. Энэхүү баярын өдрөөр бүсгүйчүүдэд ямар бэлэг барих гэж буй талаар нь түүнтэй холбогдон лавлалаа. Биднийг холбогдох үед тэрбээр тоглолтын бэлтгэлээ хийж байсан юм.
-Энэ удаа ямар онцлогтой тоглолтоор бэлэг барих вэ?
-“Хорол” продакшны санаачилснаар хийх тоглолт маань “Корпорэйт” зочид буудлын шинэ танхимд болно. Ерөнхий найруулагчаар “On’n off” студийн С.Ононбат, хөгжмийн найруулгыг Б.Чинбат тохируулж байгаа. Амьд хөгжимтэй, дээд зэрэглэлийн тоглолт үзүүлэхээр бэлтгэж байна даа.
-Таны дуунуудын ихэнхийг эрэгтэй уран бүтээлчид зохиосон байдаг. Тоглолтод тань хөгжмийн зохиолчид бас оролцоно гэж сонссон.
-Тийм шүү. Би ихэнхдээ эрэгтэй хөгжмийн зохиолч, ая зохиогчтой хамтран ажилласан байдаг. Тухайлбал, Төрийн шагналт, урлагийн гавьяат зүтгэлтэн Б.Шарав гуай, “Харанга” хамтлагийн гитарчин, урлагийн гавьяат зүтгэлтэн Ц.Чулуунбат, соёлын гавьяат зүтгэлтэн Л.Балхжав, “Хурд” хамтлагийн гитарчин, урлагийн гавьяат зүтгэлтэн Д.Отгонбаяр гэх мэт.
Тэд миний тоглолтод оролцож, хүрэлцэн ирсэн бүсгүйчүүдэд хүндэтгэл үзүүлнэ. Тоглолтод оролцох ганц эмэгтэй ая зохиогч нь Б.Ангирмаа. Ер нь л дан эрчүүдээс бүрдсэн бүрэлдэхүүнтэйгээр шинэ тоглолтоо хүргэх гэж байна.
-Та тайзны хувцсандаа их анхаарч, тусгайлан урлуулдаг. Энэ үдэш сонин содон ямар гоёлтой байх бол?
-Үүнд их анхаарч байгаа. “Урлах эрдэм” дээд сургуулийн загварын товчоо болон оюутнуудын дунд миний тоглолтын хувцас урлах уралдаан зарласан. Энэ уралдаан UBS телевизээр нэвтрүүлэг болон гарах юм.
Одоогоор шинэ, залуу загвар зохион бүтээгчдийн дөрвөн баг миний тоглолтын хувцсыг урлан өрсөлдөж байна. Тэр уралдаанаас шалгарсан бүтээлээр гоёно доо.
-Шинэ уран бүтээлийн сониноосоо хуваалцаач. Тоглолтдоо шинэ дуунууд оруулсан байх.
-“Никитон” хамтлагийн дуучин, урлагийн гавьяат зүтгэлтэн Б.Батчулуун бид хоёр шинэ дуу хамтарч дуулсан. Хоолойн цараагаа гайхуулсан сайхан дуу болсон.
Мөн “Хурд” хамтлагийн гитарчин, урлагийн гавьяат зүтгэлтэн Д.Отгонбаяртай хамтран “Салхинд гаръя” гэдэг дуу бүтээлээ. Их сонирхолтой дуу болсон. Эдгээрийг үзэгчдэд хүргэнэ.
А.ХАЛИУН
