Оюуны цангааг тайлах номын хямдралтай худалдааг өнгөрөгч сард "Аз хур" номын их дэлгүүрийн хамт олон амжилттай зохион байгуулсан. 72 хувь хүртэл хямдарсан өдрүүдэд шөнө дундын үед ч тус дэлгүүрийн гадаа уртаас урт дараалал үүсэж байсан билээ.
Тэгвэл уншигчдын дунд буй эрэлт хэрэгцээг ажигласан "Мир" номын дэлгүүр огцом хямдралтай худалдааг энэ амралтын өдрүүдэд зохион байгуулахаар төлөвлөжээ. Хямдрал энэ сарын 6-8-ны өдрүүдэд "Гранд плаза" их дэлгүүрийн 5 дугаар давхарт байрлах "Мир" номын дэлгүүрт болох юм. Хямдралт худалдааны үеэр тус дэлгүүрээр борлуулж буй орчуулгын болон Монголын зохиолчдын бүтээл туурвил болон сэтгүүлүүд 20-90 хувь хямдрах аж.
Хямдралын шуурганд ямар ном өртөх бол хэмээн та чих тавьж буй бол анхаарлаа хандуулаарай. "Мир" хэвлэлийн газраас эрхлэн гаргасан "Мир" хэмээх шошго бүхий номууд 50 хувь, хүүхдийн сонгодог зохиолууд 6900 төгрөгөөс 3450 төгрөг болж хямдрах аж. Монгол зохиолчдын бүтээлүүд 20-оос дээш хувь хямдрах бол гадаадын уран зохиолын номууд 50 хувь хямдарна хэмээн тус дэлгүүрийн ажилтан мэдээллээ.
