Сонгодог бүжгийн чиглэлээр суралцаж буй оюутан, сурагчдын мэргэжлийн ур чадварыг дээшлүүлэх зорилготой, шилдэг залуу бүжигчдийг АНУ-ын Колорадо балетын академийн дөрвөн долоо хоногийн эрчимт сургалтад бүрэн тэтгэлэгтэй суралцуулдаг хөтөлбөрт хамрагдсан ХБК-ийн сурагч Д.Нацагдорж тус академийн дээд шатны сургалтад хамрагдах, үргэлжүүлэн тэндээ ажиллах урилга авчээ.
2012 оноос хойш “Глобал эдюкэйшн” ХХК-ны захирал Д.Оргилтуяагийн санаачлагаар хэрэгжиж буй энэ хөтөлбөрт ХБК-ийн 15 оюутан хамрагдаж, тэтгэлэг хүртсэн бөгөөд өнгөрсөн зун Д.Нацагдорж, Ч.Дүүрэнжаргал, Ц.Хишигжаргал болон бүжгийн багш Б.Энхчимэг нар АНУ-ын Денверт очиж суралцсан юм.
Хөтөлбөрт хамрагдсанаар сурагчид олон улсын чадварлаг мэргэжлийн багш, Колорадо болон бусад мужийн театрын гоцлоочдын заах арга барил, сургалтын систем, туршлагаас суралцан, Монголдоо төдийгүй олон улсын хэмжээнд хүлээн зөвшөөрөгдсөн чадварлаг бүжигчин болох мэдлэг, туршлагыг хуримтлуулдаг давуу талтай. Энэ хөтөлбөрийг Монголын урлагийн зөвлөл, ХБК-той хамтран хэрэгжүүлдэг бөгөөд цаашид ч тогтмол үргэлжлэх гэнэ.
Ирэх зун энэ хөтөлбөрт хамрагдах оюутан, сурагчдыг 2016 оны хоёрдугаар сард шалгаруулах аж.
С.СЭРГЭЛЭН
