Энэ жилийн Эммигийн шагнал гардуулах ёслолын есдүгээр сарын 20-нд Лос-Анжелес хотын “Майкрософт” театрт болж өнгөрлөө. Шилдэг олон ангит кино, шилдэг зохиол, найруулга, шилдэг эрэгтэй туслах дүр гээд чухал номинациудын шагналыг хамсан “Game of thrones” наадмын онцлох бүтээл болж чадсан хэмээн шүүмжлэгчид онцолж буй. Түүнчлэн шилдэг реалити шоугаар “The Voice” шалгарсан бол “Veep” инээдмийн киноны төрлүүдэд тэргүүллээ.
“Game of thrones” олон ангит киног “ A Song of Ice and Fire” хэмээх зөгнөлт зохиолоос сэдэвлэн бүтээсэн байдаг. Телевизийн уран бүтээлчдийн анхаарлыг татсан зохиолын зохиогч Жорж Рр Мартин өчигдөр 67 нас хүрсэн бол анх 1949 оны нэгдүгээр сарын 25-нд Телевизийн урлаг, шинжлэх ухааны бүтээлийн академи анх зохион байгуулж байсан Эмми шагнал гардуулах ёслолыг мөн л өчигдөр 67 дахь удаагаа зохион байгуулсан юм.
Шилдгүүдэд олгодог бөмбөрцөг барьсан эмэгтэйг дүрсэлсэн цом 3,08 кг жинтэй, 39 см өндөр. Далавчтай бүсгүйн барьсан бөмбөрцөг үнэндээ атом бөгөөд энэ нь шинжлэх ухааныг харин бүсгүйн далавч урлагийг илэрхийлдэг аж. Шинжлэх ухаан хийгээд урлагийн шилдэг бүтээлүүд гэсэн утга бүхий цомыг телевизийн инженер Луис МакМанус бүтээсэн аж.
Телевизийн урлаг, шинжлэх ухааны бүтээлийн академийг үндэслэгч Сид Кассид телевизийн шилдгүүдийг тодруулах шагналын нэрийг анх нэвтрүүлгийн зураг авдаг iconoscope камерыг бэлгэдэн “Ike” хэмээн нэрлэх санал гаргаж байжээ. Харин бусад гишүүд эл саналыг дэмжээгүй тул камерын дуранг илэрхийлсэн image orthicon хэмээх үгний товчлол болох “Immy”-г сонгосон байдаг. Хожим эл нэр шагналтнуудад олгодог цомд дүрслэгддэг атом барьсан бүсгүйн ачаар “Emmy” болон өөрчлөгдсөн түүхтэй.
