ОХУ-ын Москва хотод энэ сарын 9-нд эхэлсэн "IDOL 2015" тэмцээний шагналтнууд өнгөрсөн шөнө тодорлоо. Дэлхийн 15 орны циркийн жүжигчдийг нэгтгэсэн эл тэмцээнд Т.Номуунбаатар ахлагчтай жүжигчид "Шидэх банзнаас үсрэгчид", "Дудартай акробат" үзүүлбэрээр "А", "Б" хэсэгт өрсөлдөж, мөнгөн цом хүртлээ.
Тэмцээн эхэлснээс хойш дуусах хүртэл Монголын жүжигчдийн авьяас чадвар, тоглолтын дэглэлтийн тухай хойд хөршийн хэвлэл мэдээллийн хэрэгсэлээр байнга мэдээлж байсан бөгөөд Их циркийн уран сайхны удирдагч, тэмцээний зохион байгуулагч нь соёлын тэргүүний ажилтан Т.Номуунбаатарын шидэх банзнаас зургаан удаа эргэдэг трюкийг онцлон ярьж, "Энэ бол дорнын уран бүтээлчдийн гайхамшиг" хэмээж байсан юм.
Өнгөрсөн жил Монголын үндэсний циркийн жүжигчин Т.Номуунбаатар шидэх банзнаас үсрэн зургаан удаа эргэсэн амжилтаараа соёлын тэргүүний ажилтан цол тэмдгээр шагнуулсан бөгөөд түүний багийнхан сүүлийн хоёр жилийн турш олон улсын уралдаан тэмцээнд оролцохоор бэлтгэж байсан билээ.
Гэхдээ энэ удаа тэд багагүй шалгууртай тулгарсан. Учир нь тэмцээний эцсийн шалгаруулалтын өмнө шидэх банз нь хугарснаар арай өөр хэмжээтэй буюу том банзнаас үсэрч, бүх трюкээ хийх болсон юм. Мөн эмэгтэй жүжигчин бэртсэнээр хэд хэдэн хэсэг нь хасагдахад хүрчээ. Гэсэн ч шүүгчид дуу нэгтэйгээр тэдний амжилтыг үнэлж мөнгөн цом гардуулсан байна.
Жүжигчдийг тэмцээнд оролцуулах ажлыг Монгол циркийн хөгжлийн төвийн тэргүүн Н.Эрдэнэ хариуцаж, дасгалжуулагч багшаар ХБК-ийн Циркийн тэнхмийн багш Н.Энхболд ажиллажээ.
Ийнхүү Монголын 12 жүжигчин дэлхийн 15 орны жүжигчдийн өмнө эх орныхоо нэрийг өндөрт өргөж чадлаа.
Дашрамд дуулгахад, өнгөрсөн жил эл тэмцээнд уран нугараач О.Цэцэглэн, Г.Нямгэрэл нар хос нугаралтын төрлөөр амжилттай оролцож байжээ.
"IDOL 2015" шагналтнууд
АЛТАН ЦОМ
ОХУ-ын жүжигчин Сергей Нестерова -Амьтны үзүүлбэр
БНАСАУ-ын жүжигчин Кан Сен Хёка ахлагчтай "Агаарын үзүүлбэр"
МӨНГӨН ЦОМ
БНХАУ-ын жүжигчин Фень Ксяолинь ахлагчтай "Амьдралын аялал" групп тэнцвэр
Монголын үндэсний циркийн жүжигчин Т.Номуунбаатар ахлагтай "Шидэх банзнаас үсрэгчид"
Канадын жүжигчин Жонатан Моринагийн "Газрын цагариг"
ХҮРЭЛ ЦОМ
ОХУ-ын жүжигчин Александра Левицкая-Спиридоновагийн "Агаарын гимнастик"
ОХУ-ын жүжигчин Марии Вершинино "Газрын нисэлт"
ОХУ-ын жүжигчин Натальи Александрова "Морин дээрх акробат"
Украйны жүжигчин Евгений Оболонина, Роман Хафизов нарын "Хос акробат"
