Аливаа улс орны залуус чөлөөт цагаа хэрхэн өнгөрөөж буйгаар нь тухайн улсын хөгжил, нийгэм дахь иргэдийн оролцоог нь дүгнэж болох биз ээ. Тэгвэл монгол залуус чөлөөт цагаа хэрхэн өнгөрөөдөг вэ?
Энэ асуултад хариулах амаргүй. Чөлөөт цагаараа хийх юм үнэндээ олдодгүй нь үнэн. Бараг л шоу цэнгээнээс өөр зугаацах газаргүй улс.
Ийм үед оюутан залуусын амралтын өдрийг үр өгөөжтэй өнгөрүүлэх боломж олгохоор “Evex entertainment-ынхан Үндэсний цэцэрлэгт хүрээлэнд “The Color event UB” буюу будагтай гүйлтийг энэ сарын 12-нд зохион байгуулах гэж буй аж.
Энэ талаар зохион байгуулагчдаас тодрууллаа.
-Юуны өмнө “Evex entertainment”-ынхаа үйл ажиллагааг танилцуулахгүй юу?
-Манай компани залуусын чөлөөт цагийг зөв боловсон өнгөрүүлэх боломжийг бүрдүүлэх зорилготой бөгөөд хамгийн анхны үйл ажиллагаа маань “The color event UB” болж байна. Цаашид энэ мэт Монголд зохион байгуулж байгаагүй олон үйл ажиллагааг хийхээр төлөвлөөд байна.
-“The color event UB”-ын талаар яриач?
- “The Color Run 5k” гэх үйл ажиллагааг анх Японы шоу менежер Travis Snyder 2012 онд санаачлан зохион байгуулж байсан бол Монгод Мобиком корпорацийн “Candy” үйлчилгээний нэг жилийн ойн хүрээнд хийх гэж байна. Уг үйл ажиллагааны зорилго нь хэрхэн уйдахгүй, ядралт мэдрэхгүй, хөгжилтэй хэлбэрээр хүмүүсийг гүйлгэх, эрүүл амьдралд уриалах юм. Үндэсний цэцэрлэгт хүрээлэнгийн 3 км зам дээр зохиогдох бөгөөд гүйлтийн турш 600 метр тутамд өөр өөр өнгийн будгаар будах юм. Барианд орсны дараа оролцогчид зургаа авхуулж, хоорондоо будгаар байлдаж, орчин үеийн хөгжимд бүжиглэж цагийг үр бүтээлтэй, эерэг, шинэлэг өнгөрөөх боломжтой.
-Ямар будаг ашиглах вэ?
-Өнгө оруулсан эрдэнэшишийн нунтаг цардуул бөгөөд хүнсний гаралтай эрүүл мэндэд аюулгүй будаг ашиглана.
-Гүйлтэд оролцогчдод насны хязгаар бий юу?
-14-өөс дээш насны бүх хүн оролцох бүрэн боломжтой. Оюутан залуус, албан газар, Монголд амьдарч буй гадаадын иргэд гээд хэн бүхэнд нээлттэй байх юм.
Харин тасалбар нь 30 мянган төгрөг бөгөөд 1000 candy оноогоор 50 хувийн хөнгөлөлттэй үнээр Өргөө-2 дахь Мобикомын салбараас худалдан авах боломжтой юм байна. “The Color event Ub” гэсэн лого бүхий цагаан футболка, хамгаалах зориулалттай нүдний шил, 150гр өнгөт будаг тасалбарт багтах гэнэ.
