“Утасны анд” Улсын драмын эрдмийн театрын жүжигчин, соёлын тэргүүний ажилтан Ц.Цэрэнболдтой холбогдлоо. Энэ жил “Mongolian academy awards”-ын шилдэг эрэгтэй гол дүрийн шагналын эзэн болсон түүнээс шинэ уран бүтээлийнх нь талаар асуулаа.
-“Mongolian academy awards-2015”-ын тайзан дээр шагнал гардаж авах үедээ “Холливуд”-ын уран бүтээлд ажиллах болсон тухай сайхан мэдээ дуулгасан. Саяхан гадаад руу явж, киноны зураг авах ажилд оролцсон гэв үү. Ярьж байсан уран бүтээл тань мөн үү?
-“Оскар”-ын хоёр удаагийн шагналт, найруулагч Жордан Робертсын найруулж буй “Burn your maps” киноны зураг авалтад оролцчихоод ирлээ.
-Зураг авах ажил хаана явагдав. Ямар дүр бүтээв?
-Канадын Альберта мужийн Калгарид зураг авахуулсан. Монгол бөөгийн дүрд тоглолоо.
-Жон Фускогийн “Марко Поло” цувралын дараагийн бүлэгт тоглох болсон. Зураг авах ажил хэзээ эхлэх вэ?
-Энэ кинонд Сорхугтани бэхи хатны эцэг Жаха Хамбугийн дүрд сонгогдсон. Зургийн ажил нь ирэх сард Малайзад эхэлнэ.
-Өнгөрсөн сард нээлтээ хийсэн “Дүр эсгэгчид” уран сайхны кинонд тоглосон. Ер нь шинэ уран бүтээлийн саналд дарагдаад байна уу даа?
-Кино урлагт өөрийн гэсэн байр сууриа эзлэхээр уран бүтээлийн гараагаа эхэлж байгаа залуусыг дэмжиж, энэ уран бүтээлд ажилласан. Одоогоор өөр уран бүтээлд ажиллаагүй байна.
А.ХАЛИУН
