13 дахь жилдээ зохион байгуулж буй “Загасан нүд” наадмын шалгаруулалт эхэлжээ. Телевиз, кино сонирхогчдын олон улсын тус наадамд сойх бүтээлүүдийг наймдугаар сарын 15 хүртэл байгаль-аялал, миний гэр бүл-манай хот, cinema буюу кино, animation буюу компьютер графикаар бүтээсэн кино, хөгжилтэй агшин, баримтат кино гэсэн зургаан төрлөөр хүлээж авах аж.
Оролцогчдын бүтээлд шинэлэг сэтгэлгээгээр хандсан байх, бүтээлийн үргэлжлэх хугацаа 15 минутаас ихгүй, DVD HD форматын бүтээл байх ёстой гэсэн шалгуур тавьж буй. Монголоос оролцогчдын бүтээлийг мэргэжлийн комисс шалгаруулж, шилдгүүдийг ОХУ-д зохион байгуулагдах телевиз кино сонирхогчдын “Загасан нүд-2015” олон улсын наадамд оролцуулах юм.
