Хамгийн олон үзэгчийг дэлгэцийн өмнө “уяж”, долоо хоног бүр шинэ дугаараа хүргэж буй “Авьяаслаг монголчууд-2016” шоу нэвтрүүлгийн финалын шалгаруулалт ирэх долоо хоногт болно. Олон чадварлаг уран бүтээлч, сонирхолтой авьяастнууд өрсөлдсөнөөс сүүлийн шатанд найман оролцогч тунаж үлдээд буй.
Эл шоу нэвтрүүлэгт оролцох явцдаа үзэгчдээс хамгийн их санал авч, олны анхааралд өртсөн хоёр залууг энэ удаагийн зочноор урилаа. Тэд финалын шалгаруулалтад өрсөлдөхгүй ч гэлээ “Монгол HD” телевизийн удахгүй болох Шинэ жилийн баярт зориулсан тусгай нэвтрүүлэгт оролцож, авьяасаа дахин гайхуулах гэнэ.
С.АНХХҮҮ: Хэрэгтэй хүн болох гэж зүтгэж явна
Үзэгчид болоод “Авьяаслаг монголчууд” шоу нэвтрүүлгийн зүгээс түүнд өгсөн хоч бол “Саваагүй сармагчин”. Бас шүүгч Ч.Дэлгэрцэцэг, үзэгч охидоор “Монголын хамгийн гоё үстэй залуу” хэмээн өргөмжлүүлээд буй.
Найруулагч мэргэжилтэй учраас түүний шоунд үзүүлсэн үзүүлбэрүүд нэгийг бодуулж, хоёрыг тунгаах сэдэл үзэгчдэд өгч байсан биз. Тэрбээр их дуу муутай хүн юм.
Гэхдээ санаагаа оновчтой, цөөн үгээр хэлчихдэг, өөрийгөө бүрэн илэрхийлдэг нэгэн аж.
-“Авьяаслаг монголчууд” шоу нэвтрүүлэгт оролцсоноор таны амьдралд өөрчлөлт гарав уу?
-“Монгол HD” телевизийн хамт олны тусламжтайгаар хоёр бүтээлтэй боллоо. Шоунд оролцсон энэ бүтээлүүдээр хүмүүс миний юу хэлэх гэснийг жаахан ч болов ойлгосон байх. Энэ чинь өөрчлөлт шүү дээ.
-Хасагдсан оролцогчийг зарлах мөчид ямар санагдсан бэ?
-Хэцүү санагдаагүй. Маш их ажлын ард гарсан болохоор сэтгэл хангалуун байлаа. Их ч урам авсан. Өчнөөн удаан бодож, тунгаасан зүйлээ үзэгчдэд харуулчихсан болохоор сайхан байсан. Өрсөлдөхөөс илүү уран бүтээлээ, юу чаддагаа тайлагная гэж бодсон учраас тэр байх.
-Хуурай магтаал уран бүтээлчийг “алдаг” юм шиг санагддаг. Таны үзүүлбэрүүдийг хүмүүс хэр магтав. Шүүмжлэл хатуу ч гэлээ амттай. Тийм шүүмжлэл сонсов уу?
-Яг наадахаас чинь эмээж байлаа. Хүмүүс бараг шүүмжлээгүй. Тэрэнд их эмзэглэсэн. “Хүмүүс шүүмжлээсэй. Миний олж хараагүй өнцгийг хэлээд өгөөсэй” гэж их хүссэн юм. Гэтэл тийм шүүмж хэлэх хүн байгаагүй. Зүгээр л аахар шаахар өө хайсан үг бол сонссон.
-Фэйсбүүк, инстаграмм зэрэг цахим хуудас хөтөлдөг үү. Энэ шоу нэвтрүүлэгт орсноос хойш охидоос “найзлах” хүсэлт их ирж байна уу?
-Би сошиал ертөнцөд тийм ч идэвхтэй биш. Ашигладаггүйгээс ялгаагүй дээ. Гэхдээ шоунд оролцсоноос хойш маш их захидал ирсэн.
-Өмнө нь өөр уралдаанд авьяасаа сорьж байсан уу?
-Би зургаан настайгаасаа бүжиглэсэн. “Одод болохын хүслэн” бүжгийн уралдаанд олон удаа оролцож, эхний байрт шалгардаг байлаа.
-Яагаад урлагийн, тэр дундаа найруулагч мэргэжлийг сонгов?
-Өөрийгөө илэрхийлэх боломж минь энэ байж ч магад. Уран бүтээлээрээ хүмүүст сайхан мэдрэмж өгч, зөв зүйлд уриалахыг хүсдэг. Хүүхэд байхдаа л “Киног хэрхэн бүтээдэг юм бол. Найруулагч нар хоорондоо ямар ялгаатай вэ” гээд л сонирхдог байлаа.
Киноноос л үлгэр дуурайл авч, мундаг найруулагч нарын бүтээлийг шунаж үздэг байв. Юу хүсдэгээ, бас мэдрэмжээ бүх насны хүмүүст хүргэх боломжтой урлаг.
-Таны гэр бүлийнхэн дунд урлагийн хүн байдаг уу. Айлын хэд дэх хүү вэ?
-Би айлын том нь. Охин дүүтэй. Аав, ээж минь урлагийн мэргэжилтэй биш ч их мэдрэмжтэй хүмүүс. Харин аавын минь ах бүжиглэдэг хүн байлаа. Тэр авга ах маань надад бүжгийн хөдөлгөөн зааж, уралдаанд оролцуулдаг байсан.
Тийм ч болохоор энэ мэргэжлийг сонгоход аав, ээж, эмээ минь их дэмжсэн. Харин хамаатнууд их эсэргүүцсэн. “Уг нь гайгүй толгойтой юм. Урлаг, уран сайхнаар яах гээд байгаа юм бэ” гээд л загнацгаадаг байв.
Харин “Авьяаслаг монголчууд”-д оролцсоноор өөрийгөө харуулж чадсан байх.
-Аль нэг продакшн, студид харьяалагддаг уу?
-Би чөлөөт уран бүтээлч. Гэхдээ студи, продакшнуудтай холбоотой, хамтран ажилладаг.
-Хүмүүс таныг хэн бэ гэдгийг таньдаг боллоо. Одоо ямар уран бүтээлч вэ гэдгийг тань мэддэг болтол уран бүтээлээ тасралтгүй хүргэх ёстой байх.
-Нас минь залуу байна. Гэхдээ төлөвлөсөн зүйлүүд бий. Би зорилготой, зорилгодоо хүрэх алхмуудаа энэ шоу нэвтрүүлэгт оролцохоосоо өмнө л төлөвлөчихсөн байсан. Түүнийхээ л дагуу ажиллана.
-“Үргээлэг-2”, “Сахиулсан тэнгэр” гээд хэд хэдэн кинонд найруулагчийн туслахаар ажилласан юм билээ.
-Бүх зүйл тэгээс эхэлнэ шүү дээ. Сургуулиа төгсөөд л биеэ даагаад кино хийчихнэ гэж байхгүй. Туршлагажиж, хүмүүсээс юм сурах ёстой. Тиймээс найруулагч нарын туслахаар ажиллаж байгаа. Арваад кинонд ажиллаж үзлээ. Хэн ч бишээс хэн нэгэн, хэн нэгнээс хэрэгтэй хүн болох гэж зүтгэж явна.
-Арга ядсан арилжааны кино хийдэггүй, шаггүй найруулагч болчих байх гэсэн найдлага ч танд тавьж байна лээ.
-Ямар ч уран бүтээлд амь бий. Уран бүтээлчийн эмзэглэл, мэдрэмж түүнийг амилуулна. Яг одоогоор миний ажиллах, уран бүтээл хийх урсгал энэ, эсвэл тэр гэж хэлж чадахгүй нь.
Надад суралцах, судлах зүйл асар их бий. Ямар уран бүтээлч болохыг цаг хугацаа л харуулах байх даа.
-Бие дааж бүтээх анхны киногоо ямар байгаасай гэж хүсдэг вэ. Төлөвлөж, төсөөлдөг л байлгүй.
-Хэдэн жилийн өмнө энэ асуултыг асуусан бол адал явдалт, тулаант кино гэж хариулах байлаа. Одоо бол тэгж бодохгүй байна. Киноны бүх л төрөл надад сонирхолтой санагддаг.
Гэхдээ миний эхний бүтээл уянгын, бас гэмт хэргийн тухай кино байх болов уу. Манайд хөндөж чадаагүй, тэр чиглэлээр хийгдээгүй киноны төрөл зөндөө бий.
Тиймээс ажиллах орон зай хангалттай. Би Улаанбаатар хотын хэдэн залуу үзээд ойлгох биш, дэлхий нийт үзээд ойлгох бүтээл хийхийг хүсдэг.
Ч.ЦЭНГҮҮН: Залуу насандаа хүссэн бүхнээ амжуулах сан
“Тэнгэрийн хунтайж”, “Шонтой бүжиглэгч” энэ залуу СУИС-ийн оюутан. Тайз, дэлгэцийн бүтээлийн найруулагч болохоор суралцаж буй тэрбээр урлагийн “тогоо”-нд өсчээ. Зургаан настайгаа циркийн урлагаар, тэр дундаа шидэлттэй акробатаар хичээллэсэн нь түүний pole dance буюу шонтой бүжиглэх суурь нь болсон аж.
Нэвтрүүлгийг үзээд их зантай болов уу гэсэн төсөөлөл минь уулзангуутаа арилсан юм. Тэрбээр зөөлхөн, дөлгөөхөн зантай, инээд муутай нэгэн ажээ.
-Циркийн жүжигчин хэзээнээс шонтой бүжиглэж эхлэв?
-Багаасаа л хөдөлгөөнтэй, юм юм сонирхож, оролддог хүүхэд байлаа. Тэр сониуч зан маань л үүн рүү хөтөлсөн байх. Анхандаа хүмүүс буруугаар ойлгох болов уу, би чадах болов уу гэсэн айдас төрж байсан.
Гэвч жилийн өмнөөс зориглоод хичээллэж эхэлсэн. Тэр маань ч буруу байсангүй. Гадаадад бол урлагийн энэ төрлөөр дагнасан дэлхийн аварга шалгаруулах уралдаан хүртэл болдог. Манайд л хүмүүс дөнгөж мэддэг болж байна.
-Бүжгийн урлагийн энэ төрлийн талаарх хүмүүсийг ойлголт тийм ч өргөн биш. Буруугаар ойлгодог хүмүүс ч бий.
-Сонсох мэдрэмжээ биеийн хөдөлгөөнөөр л илэрхийлэх шүү дээ. Chinese pole болон тайчих үзүүлбэрийг хослуулсан урлаг ч гэж хэлж болно. Сэдэв, утга санаатай, жүжигчилсэн байдгаараа онцлог.
-Монголд төдийлөн хөгжөөгүй энэ төрлөөр “Авьяаслаг монголчууд” шоу нэвтрүүлэгт өрсөлдөхөөсөө эмээгээгүй юү?
-Хүмүүс хэрхэн хүлээж авах бол гэж гайхаж л байлаа. Гэтэл төсөөлснөөс илүү хүмүүст хүрсэнд баяртай байгаа. Энэ шоунд орохоор шийдэхдээ л “Тайзан дээр юу үзүүлэх вэ. Би юу чаддаг билээ” гээд их удаан бодож байж үзүүлбэрүүдээ бэлдсэн.
-Pole dance төрлөөр олон улсын уралдаан болдог гэсэн. Оролцох бодол бий юү?
-Байгаа шүү. Гэхдээ эхний ээлжинд гадаадад болох тоглолтуудад оролцохоор төлөвлөсөн. Саналууд ч ирж байна.
-“Авьяаслаг монголчууд” шоуны гуравдугаар шатны шалгаруулалтад таны төлөвлөсөн үзүүлбэрийг Тусгаар тогтнолын ордны тайзан дээр үзүүлэх боломжгүй байсан учраас бэлдсэнээсээ өөр зүйл үзүүлсэн гэсэн үү.
-Би агаарын гимнастикийн үзүүлбэр үзүүлэхээр бэлтгэсэн байлаа. Автомат татагчаас авахуулаад тоног төхөөрөмж байрлуулах шаардлагатай. Гэтэл миний тэр зүйлүүдийг уг тайзан дээр байрлуулах, үзүүлэх боломжгүй байсан.
Тиймээс үзүүлбэрээ өөрчилсөн юм. Тайзан дээр гарахдаа ч сэтгэл дундуур гарсан.
-Гонсойсон уу?
-Нэвтрүүлгийг орхимоор санагдсан. Бодсоны эцэст “Нэгэнт л миний бэлдсэнийг энэ тайзан дээр үзүүлэх боломжгүй юм чинь үзэгчдээ хүндлээд, өөрийнхөө чаддаг зүйлийг хүргээд л бууя” гэж шийдсэн юм.
Гэтэл хүмүүс намайг маш их дэмжиж, хамгийн их санал авсан гурван оролцогчийн нэг болсон. Хэрвээ тэр шатанд тэнцсэн бол би дараагийн шалгаруулалтад мөн л ийм асуудалтай тулгарах нь ойлгомжтой. Тийм болохоор шүүгчдийг “Алтай” хамтлагийг дэмжээсэй гэж хүссэн дээ.
-Энэ төрлөөр хичээллэхэд анхаарлаа төвлөрүүлэх, хөгжмөө мэдрэх, биеийн хүчний болон бүжгийн дасгал хийх гээд олон чадвараа зэрэг ахиулах шаардлагатай байх. Мөн өндрөөс унах, хөл, гараа гэмтээх эрсдэлтэй мэт санагдсан. Бэлтгэл, сургуулилалт хийх явцдаа бэртэж байсан уу?
-Биеийн тэнцвэр, хурд, хүч, уян хатан байдал, анхаарал зэрэг олон чадвараа зэрэг ахиулах ёстой. Бэлтгэлээ л сайн хийх хэрэгтэй. Мөрөө гэмтээх, арьс зулгарах, шалбарах бол энгийн л зүйл. Тэгэхээр маш болгоомжтой байх ёстой.
Гэхдээ манайд дан ганц бэлтгэл, үзүүлбэрээ үзүүлээд амьдрах боломжгүй. Тиймээс ажлынхаа хажуугаар амжуулаад л бэлтгэл хийдэг.
-Хэрхэн циркийн жүжигчин болсон юм бэ. Аав, ээж тань урлагийн хүмүүс үү?
-Ээж маань спортын гимнастикийн тамирчин. Мөн монгол бүжиг бүжиглэдэг байсан. Тиймээс намайг зургаан настайгаас гимнастикаар хичээллүүлсэн юм. Азаар Үндэсний циркийн жүжигчин боллоо.
Гэтэл 2007 оноос илүү өндөр болж, бие хүндэрч, шидэлттэй акробатын төрөлд үзүүлбэр үзүүлэхэд хэцүү болж эхэлсэн. Ингээд л циркээс гарсан даа. Циркээс гарснаас хойш юм юм оролдсон. Бокс, таэквондогоор ч хичээллэх гэж үзсэн.
-Гадаадад гарч ажиллах, уран бүтээл хийх бодол бий юү?
-Анх pole dance-ээр хичээллэж эхлэхдээ л тийм бодолтой байсан. Тэгэхийн тулд бэлтгэлээ маш сайн хийх хэрэгтэй. Улам чадварлаг болох ёстой.
“Авьяаслаг монголчууд” шоунд оролцсоноос хойш гэр бүлийнхэн, хүмүүсийн хандлага өөрчлөгдөж, дэмжих хүсэлтэй хүмүүс ч гарч ирлээ. Баганатай бүжиглэх нь ичмээр зүйл гэсэн хүмүүсийн явцуу бодлыг энэ шоу, миний үзүүлбэр өөрчилж чадлаа.
-Циркийн жүжигчин, дээр нь бүжигчин хүн яагаад найруулагч мэргэжил сонгов?
-Контемпорари арт, орчин үеийн урлагаар суралцах хүсэлтэй. Гэвч манайд энэ чиглэлийн сургууль байхгүй. Гэхдээ дээрх урлагийг судлах, арай ойр байх боломжийг найруулагчийн мэргэжил олгоно. Тиймээс л сурч байна.
Найруулагчаар төгссөн ч би 50 нас хүртлээ кино урлаг руу орохгүй. Тэр хүртэл залуу, хөдлөх боломжтой байгаа дээрээ хүссэн бүхнээ амжуулна, дуртай зүйлээ хийнэ.
-“Монгол модель” агентлагийн загвар өмсөгч гэл үү?
-Одоогоор загвар өмсөхгүй байгаа. Гэхдээ “Монгол модель”-д харьяалагддаг хэвээрээ. Би энэ агентлагийн А зэрэглэлийн загвар өмсөгч.
-“Canis creative group” гэж байгуулсан байна лээ. Танай баг хэр олуулаа вэ?
-Хүн өөртэйгөө ертөнцийг үзэх үзэл, төсөөлөл төстэй хүмүүстэй зам нийлж, нөхөрлөдөг мэт санагддаг. Миний найзуудын олонх нь бүтээлч сэтгэлтэй. Уран бүтээлч найзуудтайгаа нийлэн “Канис крийтив групп” бүлэг байгуулсан юм. Нэгнийхээ уран бүтээлийг дэмжиж, хамтран ажиллах зорилготой.
