Монголын үндэсний их урлагийн театрын дуучин, Гавьяат жүжигчин Нацагдоржийн АМГАЛАН “АРДЫН ДУУНДАА ЖАРГАЛТАЙ” уран бүтээлийн цэнгүүнээ энэ сарын 28-ны 19.00 цагт Соёлын Төв Өргөөнд хийх гэж байна. Тоглолтод Үндэсний хөгжмийн их найрал, удирдаач Урлагийн гавьяат зүтгэлтэн Н.Буянбаатар, Ардын жүжигчин Д.Самбуу, Гавьяат жүжигчин Б.Сийлэгмаа, соёлын тэргүүний ажилтан Б.Батмэнд, С.Цогтсайхан, Х.Эрдэнэцэцэг, Ц.Түмэнжаргал, Ц.Нарантуяа, Д.Наранхүү, Зууны манлай бүжиг дэглээч Ц.Сэвжидийн нэрэмжит бүжиг ангийн уран бүтээлчид, ЦДБЭЧ-ын найрал дуучид, симфони найрал хөгжимчид, нэрт ятгачин Ч.Мөнх-Эрдэнэ болон гавьяат жүжигчин Н.Амгалангийн шавь Б.Батцэцэглэн нар оролцоно.
СУИС-ийг дуулаачийн мэргэжлээр төгсаж, 1987-1993 онд Хилийн цэргийн дуу бүжгийн чуулгад гоцлол дуучнаар ажиллаж байгаад 1993 оноос одоог хүртэл ҮДБЭЧ буюу Монголын үндэсний урлагийн их театрын гоцлол дуучнаар 23 жил ажиллаж байгаа Гавьяат жүжигчин Н.Амгаланг хүмүүс уянгалаг сайхан ардын дуугаар илүү сайн мэддэг. Түүнчлэн Б.Сийлэгмаа гавьяаттай хамтран "Ханан сүлжээ нэхээс" дууг дуулсан нь нэгэн цаг үеийн хит болж байсныг санаж буй биз ээ.
Тэрбээр театрынхаа тайзнаа Урлагийн гавьяат зүтгэлтэн Ж.Бадраагийн цомнол, Төрийн шагналт, Ардын жүжигчин Д.Лувсаншаравын хөгжим “Сүнжидмаа” дуулалт жүжгийн Сүнжидмаагийн дүр, МЗЭ-ийн шагналт А.Шартолгой, СТА Р.Бат-Эрдэнэ нарын бүтээсэн “Үлэмжийн чанар” дуулалт жүжгийн Дадишуарын дүр, Төрийн шагналт, Соёлын гавьяат зүтгэлтэн Д.Төрбат, СТА М.Бирваа нарын “Оройн дээд” дуулалт жүжгийн Дондогдулам хатны дүр зэрэг олон арван уран бүтээлүүдийн гол дүрүүдийг бүтээсэн нь ардын дуучнаас гадна жүжигчний дундрашгүй авьяастайг нь нэгэн болохыг нь түвэггүй ойлгуулна. Түүний уран бүтээлийн тоглолт дээрх жүжгийн хэсгүүдээс ч багтаж буй.
"Ардын дуундаа жаргалтай" тоглолтын найруулагчаар ҮДБЭЧ-ын ерөнхий найруулагч СТА Д.Ганболд ажиллаж, Соёлын гавьяат зүтгэлтэн Д.Цоодол, ЦДБЭЧ-ын Р.Өнөржаргал нар хөтлөн хүргэх юм билээ. Тоглолтын ерөнхий зохион байгуулагчаар "Урлаг маркет" ХХК ажиллаж байгаа аж.
Тоглолтын тасалбарын үнэ: Партер 25,000₮, Бельэтаж 20,000₮
Захиалгын утас: 94115292, 88088868
Танан цагаан хөөрөг мэт Ардын сайхан дуугаараа
Таны амгаланг айлтган Буян оршоон мэндчилье!
