Уржигдар орсон цасны улмаас орон нутгийн хэд хэдэн байршлын авто замд халтиргаа гулгаа үүсжээ. Тухайлбал, Улаанбаатар хотоос Говьсүмбэр аймгийн Чойр, Налайх дүүргээс Горхи, Тэрэлжийн байгалийн цогцолбор газар хүртэлх авто зам халтиргаатай байгааг “Зам, тээврийн хөгжлийн төв” ТӨҮГ-аас өчигдөр мэдээлэв. Түүнчлэн Улаанбаатараас Хэнтий аймгийн Чингис хот хүртэлх авто замын 30-34 км дэх хэсэгт халтиргаатай байгаа тул давс, хайрга цацсан байна.
Мөн Архангай аймгийн Цэцэрлэг сумаас Завханы Тосонцэнгэл хүртэлх авто замын зарим хэсэгт халтиргаа гулгаа үүсжээ. Иймд эдгээр байршилд болгоомжтой зорчихыг тус байгууллагаас анхаарууллаа. Мөн цаг уурын байгууллагын мэдээллээр энэ сарын 30-ныг хүртэл ихэнх нутгаар хүйтэн, цас орж, шуурах төлөвтэй тул болгоомжтой зорчихыг холбогдох газруудаас анхаарууллаа.
А.Тэлмэн
