Үндэсний их баяр наадмыг тохиолдуулан Монгол Улсын Ерөнхийлөгч Х.Баттулга өнөөдөр төрийн шагнал, одон медаль хүртээлээ. Энэ үеэр төрийн соёрхолт, урлагийн гавьяат зүтгэлтэн, Чингис хаан одонт, хөгжмийн зохиолч Б.Шарав, төрийн хошой шагналт, ардын жүжигчин, хөгжмийн зохиолч Н.Жанцанноров нарт хөдөлмөрийн баатар цол олголоо.
Монгол Улсын Ерөнхийлөгч Х.Баттулга "Чингис хаан одонт хөгжмийн зохиолч, Төрийн шагналт, Урлагийн гавьяат зүтгэлтэн Б.Шарав гуайн бүтээлүүд Монголын хилээс хальсан гэдгийг бид бүгд сайн мэдэх билээ. Түүний бүтээл дэлхийн хөгжмийн салбарт цоо шинэ үзэгдэлд тооцогддог билээ. Мөн Төрийн хошой шагналт, Ардын жүжигчин Н.Жанцанноровын бүтээлүүд үндэсний хэв маягийг орчин цагийн дүр төрхтэй амжилттай уялдсан, хөгжмийн салбарт шинэчлэл авчирсан, Н.Жанцанноров бүтээлээ туурвихын сацуу нийгмээ соён гэгээрүүлэх ажилд онцгой зүтгэл гаргасан билээ" хэмээн шагнал гардуулахыг өмнө ярилаа.
