Энэ онд дуучин, ая зохиогч К.Номинжин Калифорния дахь Радонай Рекордсоор хийлгээд буй, өөрийн зохиосон дөрвөн дуугаа өлгийдөн авахад бэлэн болжээ. Эхний сингл “Kiss Me At Midnight” гэдэг дуу нь 11 сарын 30-нд гарсан ба Амазон, iTunes, Spotify, Apple Music, Sound Cloud -аас сонсох, худалдаж авах боломжтой юм байна. Энэ дууны клип удахгүй 12 дугаар сард цацагдах гэнэ.
К.Номинжингийн энэ уран бүтээлийн сурталчилгааг АНУ-д Солонгосын BTS хамтлагийг алдаршуулсан Америкийн хөгжмийн хамгийн алдартай Грамафон хэмээх PR компани хийж байгаа бөгөөд бүрэн хэмжээний цомог эсвэл шинэ синглүүдийг нь бас хариуцна.
Өнгөрсөн хугацаанд тэрээр олон улсад Джон Ленноны дурсгалын цомог, дэлхийн платинум оддын хайрын дууны цомогт багтаж байсан туршлагатай. Харин эх орондоо “Үлэмжийн Чанар”, “Хайр мэдрүүлсэн харц”, “Сэтгэлийн аялгуу”, “Чиний эзгүйд”, “Чамайгаа алдмааргүй байна”, S&I хамтлагтай дуулсан “What’s Love”, дуучин Болдтой дуулсан “Хэзээ”, Мягмарсүрэнтэй дуулсан “Монголд тавтай морил”, Гоёл Наадмын “Монголын Гоёо” зэрэг хит дуунууд гаргасан, Япон, Орос, Турк, АНУ, Тайвань, Мексик, Тайланд, ОХУ зэрэг 10 гаруй оронд зочлон гоцлон дуулсан амжилтанд дөнгөж 17 насандаа хүрсэн юм.
2006 оноос Номинжин Холливудын оддын багш нараас суралцсаны үр дүнд дэлхийн хөгжмийн урлагийн оргил тайзууд болох Нью Йоркийн Карнегийн Их Танхим, Линкольн Центрийн Дэвид Геффен Их Танхимд 5 хэлээр гоцлон дуулсан ба Кардифын Уэлсийн Дуурийн Үндэсний Театрын симфони найрал хөгжимтэй Лланголленд 10 хэлээр гоцлон дуулж, олонд ур чадвараа батлан харуулсан залуу уран бүтээлч болжээ. Карнегийн Стерн Их Танхимд дуулсан дуунуудын нэг болох “Цас наранд уярна” гэдэг дуу нь Billboard тэргүүлсэн цомогт багтсан байна.
17 наснаасаа АНУ-д суурьшин хүчээ сорьж байгаа дуучин маань 2015-2017 онд эх орондоо Universe Best Song тэмцээнд шүүгч, дасгалжуулагч багшаар уригдан ажиллаж, мөн энэ хугацаанд Өмнөд Солонгосын Гадаад Яамны Сайдаас Олон Түмний Дипломат Найрамдлын Элчээр томилогдон 2 жил ажилласныг зарим сонсогчид нь сайн мэднэ. Мөн дуучин маань өөрийн шинэ дууны клипийг гарахаас өмнө дэлхийд алдартай сонгодог поп дуунуудын коверыг сонсогчдодоо хүргэж эхлэхээр Youtube суваг шинээр нээсэн бөгөөд энэ сувгаараа бяцхан сонсогчдодоо олон улсын хит дуунуудыг дуулах арга барилыг зааж, өрнөдийн дуу хөгжмийн тухай мэдлэг чадвараа хуваалцах юм байна.
Шинэ дууг сонсох болон дэлгэрэнгүй мэдээлэл авахыг хүсвэл facebook.com/iamnominjin хуудасд нэгдэх боломжтой.
