Хүн төрөлхтний эв нэгдлийн баяр, шилдэг тамирчдын спортын гайхамшгийг илэрхийлэх талбар Парисын Олимп хөшгөө нээхэд ердөө 108 хоног үлджээ. Олимпын үнэт зүйлс гүн шингэсэн энэ удаагийн наадмын албан ёсны зурагт хуудас вектор дүрсээр, таван метр өндөр, дөрвөн метр өргөн хэмжээтэйгээр Парисын “Орсе” музейд дэлгэгдлээ.
Зурагт хуудсыг францын уран зураач, “Hermes” брэндийн бүтээлүүдээрээ олонд танигдсан Уго Гаттони бүтээж, ямар өнгө төрх дүрслэхээ хагас жилийн турш бодож, бодитоор 2000 гаруй цаг зарцуулан урласан байна.
Өмнөх наадмуудын постерууд нь Олимп болон Паралимпын хоёр тусдаа бүтээлүүд танилцуулагдаж байсан бол энэ удаагийнх олимпизм дахь тэгш эрх, хамтдаа хэмээх үзэл баримтлалыг нэг том бүтээлээр илтгэсэн нь онцлог юм.
Түүнчлэн Эйфелийн цамхаг, Ялалтын хаалга (Arch de Triomphe) зэрэг Парис хотын түүхэн алдарт уран барилгуудын дүрсийг шингээсэн төдийгүй Парисын олимпын 32 спортын төрлийг ч харах боломжтой.
