"Дэлхийн мисс 2019" тэмцээнд эх орноо төлөөлөн оролцож буй Мисс Мандахын Цэвэлмаагийн хэрэгжүүлсэн хүмүүнлэгийн ажил 130 орноос ТОП 10-т шалгарлаа. Ингэснээр Монгол Улс Дэлхийн миссийн хүмүүнлэгийн төсөлд анх удаа шилдэг аравт шалгарч байгаа юм.
Мисс Мандахын Цэвэлмаа нь дэлхийн миссийн хүмүүнлэгийн ажлын хүрээнд Монгол Улс дахь нас баралтын тэргүүлэх шалтгаан болох элэгний өвчлөлийг бууруулах, өвчний эрт илрүүлгийн үед оношлох зорилгоор "Эрүүл Монгол-Эрүүл Дэлхий" төслийг санаачлан хэрэгжүүлсэн. Тухайлбал, элэг шилжүүлэн суулгах нэн шаардлагатай 17 настай охиныг хагалгаанд оруулж, хагалгааны дараах зардлыг хандивын аян өрнүүлэн олсон. Мөн элэгний В,С вирусээс урьдчилан сэргийлэх зорилгоор 486 хүнийг вакцинд хамруулж, тус вирусыг халдварласан тохиолдолд даатгалын системийг бий болгох зэрэг үе шаттай ажлыг хэрэгжүүлсэн юм.
Ташрамд дурдахад, Мисс Мандахын Цэвэлмаа нь мультимедиа буюу олон нийтийн санал асуулгын төрөлд Mobstar аппликейшнаар хоёрдугаарт, www.missworld.com сайтын санал асуулгаар тавдугаарт бичигдэж байна. Хэрвээ олон нийтийн санал асуулгаар түрүүлбэл тухайн хэрэгжүүлсэн хүмүүнлэгийн ажил нь өргөн цар хүрээгээр Монголын нийгэмдээ хэрэгжих боломжтой болох юм. Иймд та бүхэн саналаа идэвхтэй өгөөрэй.
www.missworld.com сайтаар хэрхэн саналаа өгөх вэ?
- Та гар утас болон компьютерээс www.missworld.com хаяг руу нэвтэрч орно.
- Вэбсайтын баруун дээд буланд Log-in товчийг дарна.
- Вэбсайт руу Facebook, Instagram, Google хаягийн аль нэгээр нэвтэрнэ.
- Vote хэсэг дээр дарж Tsevelmaa Mandakh гэж хайснаар оролцогчоо олно.
- Vote товч дээр дарж саналаа өгнө.
Mobstar аппликейшн ашиглан хэрхэн саналаа өгөх вэ?
- Та Playstore эсвэл Appstore-оос Mobstar аппликейшныг хайж олон, утсандаа татаж суулгана.
- Mobstar апплейкшныг суулгасны дараа өөрийн E-mail хаягаар нэвтэрнэ.
- Нэвтэрсний дараа баруун дээд буланд байрлах хайлтын хэсэгт Маndakh Tsevelmaa гэж латин үсгээр бүтэн бичээд people хэсгээс хайж, албан ёсны хаяг руу нэвтэрнэ.
- Хаяг руу нэвтэрч ороод, profile зургийн дор байрлах follow товчийг дарж дагана.
- Та зураг тус бүрт од дарах эсвэл зүүнээс баруун гар тийш татаж саналаа өгнө.
