Зургийг Bloomberg.com-оос
Apple" компани пүрэв гарагт болох албан ёсны арга хэмжээнийхээ "гэнэтийн бэлгийг" задаллаа.
Өчигдөр “Apple"-ийн “iTunes" үйлчилгээний веб сайт дээр шинээр танилцуулах “iPad" таблет компьютерийн үзүүлэлт, мэдээлэл болон шинэ зургуудыг санамсаргүйгээр байршуулсан байна.
Аравдугаар сарын 16-нд Калифорни мужийн Купертино хотод болох арга хэмжээний үеэр “Apple" компани 9.7 инчийн “iPad Air" болон 7.9 инчийн “iPad Mini" төхөөрөмжийн шинэ хувилбараа танилцуулна гэж ойрын эх сурвалж мэдээлж байсан юм.
“Apple"-ийн веб сайт дээр санамсаргүйгээр тавигдсан эдгээр зургаас харвал шинээр танилцуулах таблетууд нь “iPad Air 2" болон “iPad Mini 3" гэсэн нэртэй байх ажээ. Түүнчлэн дээрх бүтээгдэхүүнүүд “Apple"-ийн “iPhone 5S" гар утсанд анх суурилуулсан хурууны хээ мэдрэгч “TouchID"-тай байх нь ээ. “Apple"-ийн Гүйцэтгэх захирал Тим Кук тус компанийн орлогод эзлэх хувиараа “iPhone"-ийн араас хоёрдугаарт бичигддэг “iPad"-ийн борлуулалтаа сэргээхийг хичээж байгаа юм. Энэхүү төхөөрөмжийн борлуулалт өнгөрсөн улиралд 13.3 сая ширхэгт хүрч, хоёр дахь улиралдаа буурсан үзүүлэлттэй гарсан байна.
