Хүүхэд,залуус гэлтгүй бүхий л насныхан сүүлийн үед усан спортоор хичээллэн, өв тэгш бие галбиртай болохыг зорьж, эрүүл мэнддээ анхаарах нь ихэссэн. Тэгвэл иргэд зорьж очих боломжтой усан бассейн нийслэлд хангалттай байгаа, эсэхийг тодрууллаа. Өдгөө идэвхтэй үйл ажиллагаа явуулж байгаа есөн төвийг онцолж,цагийн хуваарь, үйлчилгээний үнэ ханшийн талаарх мэдээллийг хүргэе.
- Баянгол дүүргийн Усан спорт сургалтын төв нь 2014 оноос үйл ажиллагаа явуулж эхэлжээ. Нийтийн эрүүл мэндэд зориулсан, биеийн тамирын эл цогцолбор нь стандартын шаардлага хангасан, 25 метр урт хос замтай аж. Нэг ээлжийн хичээлд 25-30 хүн хүлээн авах хүчин чадалтай юм байна. Сарын төлбөр нь анхан шатных 110 000, дунд нь 120 000, дээд нь 100 000 төгрөг гэнэ.
- Баянзүрхийн Усан спортын төв нь сэлэлтийн гурван замтай, нэг дор 30 хүн хичээллэх боломжтой. Өдөрт 200-300 хүнд үйлчлэх хүчин чадалтай бөгөөд усанд сэлэлтийн дөрвөн багш өдгөө анхлан суралцагч нарт сургалт явуулж буй аж. Төлбөрийн хувьд нэг цагийн 10 000-70 000 төгрөг.
- Сонгинохайрхан дүүргийн Усан спорт сургалтын төвийн хувьд өдөр бүр 07.45-21.00 цагт ажилладаг. Нэг сарын төлбөр нь 90 000 төгрөг юм байна.
- Хан-Уулын Усан спортын төв нь нэг дор 40-50 хүн хүлээж авах чадалтай. Хүүхэд 80 000, насанд хүрэгчид хичээллэхэд нэг сарын 180 000 төгрөгийн төлбөртэй. Өдөр бүр 09.30-18.00 цагт ажилладаг.
- Эдгээрээс гадна хувийн хэвшлийн хэд хэдэн усан сан нийслэлд байдаг. Тухайлбал, “220К вэллнэс төв” нь 2018 оноос үйл ажиллагаа явуулж эхэлжээ. Иргэд тус төвд ирж нэг удаагийн үйлчилгээ аван, бассейныг нь шалгаж, туршиж үзэх боломжтой гэнэ. Үүний тулд эрүүл мэндийн зарим төрлийн шинжилгээнд хамрагдсан байх шаардлагатай.
- “Орчлон” спорт, эрүүл мэндийн клуб нь 2004 онд байгуулагдсанаас хойш өдий хүртэл тасралтгүй үйл ажиллагаа явуулж буй гэнэ. Тус клуб нь спорт заал, том хүний болон хүүхдийн усан бассейнтай.
- “Виста” клуб 2010 онд байгуулагдсан, фитнес, бассейн, наран шарлагын талбай, хуурай саун зэрэг үйлчилгээтэй. Бассейны урт нь 25, өргөн нь зургаа, гүн нь 1.6 метр аж.
- “SS swimming” клуб мөн Улаанбаатарт үйл ажиллагаа явуулж байна. Бүртгүүлэх бол өөрийн биеэр ирэх шаардлагатай. Хүүхдүүд заавал эцэг, эх, асран хамгаалагчтайгаа ирж бүртгүүлнэ. Ажлын өдрүүдэд 07.30-16.30 цагт нээлттэй байдаг. Төлбөр нь нэг сарын 180 000-280 000 төгрөг гэнэ.
- “Ривер” клуб нь ажлын өдрүүдэд 09.00-20.30 цагт үйл ажиллагаа явуулдаг. Ихэвчлэн 18-30 насны залуус үйлчлүүлдэг аж. Үнийн хувьд нэг сарын 320 000 төгрөг юм байна.
Бэлтгэсэн Г.АРИУНЗАЯА, А.ТҮМЭН-ӨЛЗИЙ
