Эх, хүүхдийн бүүвэйг зурагт буулгажээ
“Орчил гэгээ хүрээлэн” холбооныхон уран бүтээлчидтэй хамтран “Бүүвэй” өдөрлөгийг өчигдөр зохион байгууллаа. Эл өдөрлөгийн үеэр бясалгалын багш Б.Эрдэнэчимэг бүүвэй нь зөвхөн нялхсыг тайвшруулдаг аялгуу төдий бус, хүний эх хэлнээс өмнөх хүйн хэл, байгаль дэлхийтэйгээ зохицон амьдрах арга, өөрийгөө засаглах ухаан болохыг онцолсон юм. Тэрбээр өмнө нь “Дэлхийн бүүвэй өдөр”-тэй болох санаачилга гаргаж, энэ талаар НҮБ-д илтгэл тавьж байжээ. Мөн “Элбэрэлт эхийн таван эрдмийн судар”, “Эрдэнэт галын судар”, “Гэгээн аялгуу судар” номоо гаргасан аж. Тэдгээрийн үргэлжлэл болох “Бүүвэй судар” ном бүтээснээ өчигдөр танилцуулсан юм.
2024-03-18
Эрэгтэйчүүд жендерийн туйлширсан хандлагад баригдах ёсгүй
Эрчүүд амьдралын хатууг туулж, тэнхээ зааж, өөрийгөө умартан явсаар эрт нас бардаг нь айл бүрийн жишиг боллоо. Өвөө, аав нь 60 нас хүрэлгүй нас барсныг нүдээр үзсэн хүү өөрийгөө өндөр насалснаар төсөөлдөггүй хэмээх. Энэ нь нийгэмд, ялангуяа эрчүүдэд үлгэр болохуйц зөв хандлага үгүйлэгдэж буйг илтгэх шиг. Насны эцэст эмээ нар л үлдсэн байдаг гэж ярих нь ч нийгэмд энгийн үзэгдэл. Эмэгтэй, эрэгтэй хүмүүсийн насжилт, эрүүл мэнд, сэтгэл зүйн асар ялгаатай судалгааны дүн дээр дурдсанчлан хөвөрч өгнө. Үүнд ч олон нийт дөжирснөөр, далд дохио нь улам бүдгэрсээр байна.
2024-03-18
Байгалийн ухааны салбарын судлаачдыг чадавхжуулна
БШУЯ, МУИС, ЮНЕСКО-той хамтран байгалийн ухааны салбарын судлаачид, залуу энтерпренерүүд, их, дээд сургуулийн багш, ахисан түвшний суралцагчид, судлаачдыг чадавхжуулах нь. Үүний хүрээнд судлаачдын инновац, инженерчлэлийн мэдлэгийг гүнзгийрүүлэх сургалтыг ирэх сарын 1-5-нд зохион байгуулахаар болжээ. Байгалийн ухааны салбарт өндөр технологийг хөгжүүлэх, нутагшуулах чиглэлээр судлаачдыг чадавхжуулж, гарааны компани байгуулах, шинэ, шилдэг санаагаа бодит ажил болгоход туслах нь уг ажлын зорилго аж. Үүнд оролцогчид багуудад хуваагдан, гарааны бизнесээ зөв эхлүүлэх үндсэн алхмуудад суралцах гэнэ
2024-03-18
Замын унаанаас хаягдсан эмэгтэйг өвсний машинд дулаацаж байхад нь оллоо
Дорнод аймгийн Халхгол сумаас Чойбалсангийн чиглэлийн унаагаар зорчиж байсан эмэгтэй бие засахаар буух үед нь жолооч мартаж, орхин явжээ. Уг явдал энэ сарын 15-нд гарсан бөгөөд тухайн эмэгтэй автомашинд гадуур хувцас, гар утсаа үлдээсэн байж. Үүнтэй холбоотойгоор хилийн цэргийн 0132 дугаар ангийн алба хаагч, дэслэгч А.Алтаншагайгаар ахлуулсан бүлгийнхэн Халхголоос Чойбалсан хүрэх авто зам дагуу эрлийн ажиллагаа явуулж, тухайн иргэнийг өвс ачсан машинд дулаацаж байхад нь олсон байна. Тэрбээр сүлжээгүй газар байсан тул хэн нэгэнтэй холбоо барьж чадаагүй аж
2024-03-18
Багануур дүүргийн дөрөвдүгээр хорооны айлууд шар усны үерт автжээ
Нийслэлийн хэмжээнд шар усны үерт өртөх эрсдэлтэй 1120 нэгж талбарт 1487 айл өрх байгааг Онцгой байдлын ерөнхий газраас мэдээлсэн юм. Орон нутагт ч шар усны үер тулгамдсан асуудал болжээ. Тухайлбал, Төв аймгийн Зуунмод сумд Зуунмод голын эрэг дагуух айл өрхүүд усанд автжээ. Тиймээс холбогдох албаныхан нь айлуудыг нүүлгэн шилжүүлж эхэлсэн байна. Өнгөрсөн амралтын өдрүүдэд орсон цас шар усны үерийн эрсдэлийг улам нэмэгдүүлэх хандлагатай байгааг онцгой байдлын байгууллагаас анхаарууллаа.
2024-03-18
Улаан модон сандал, ширээг хүлээлгэн өгөв
Бүгд Найрамдах Беларусь Улсын Гадаад хэргийн сайд С.Ф.Алейникийн манай улсад хийсэн албан ёсны айлчлал өчигдөр өндөрлөв. Тэрбээр Гадаад харилцааны сайд Б.Батцэцэгтэй албан ёсны хэлэлцээ хийж, хоёр талын хамтын ажиллагааны зорилт, цаашид хэрэгжүүлэх төсөл, хөтөлбөрийн талаар дэлгэрэнгүй ярилцлаа. Ингэхдээ худалдаа, эдийн засаг, хүнс, хөдөө аж ахуй, боловсрол, шинжлэх ухаан, байгаль орчин, онцгой байдлын салбарт хамтын ажиллагааг өргөжүүлэхээр тохиролцов. Түүнчлэн “Тэрбум мод” үндэсний хөдөлгөөний хүрээнд технологи дамжуулах, мэргэжилтнүүдийг чадавхжуулах, сургах чиглэлээр хамтран ажиллах, үр, тарьц суулгалтын нөөц бүрдүүлэх, ойн хөнөөлт шавжтай тэмцэх, Монгол орны тодорхой бүс нутагт ойг нөхөн сэргээх төсөл хэрэгжүүлэх тухай ярилцсан юм
2024-03-18
“Чингис хаан” музей эрдэм шинжилгээний номын сантай болжээ
“Чингис хаан” үндэсний музей эрдэм шинжилгээний номын сан, уншлагын танхимтай болжээ. Эл номын сангаар ахисан түвшний буюу докторантаас дээш эрдмийн зэрэгтэй судлаач, эрдэмтэд, эрдэм шинжилгээний ажилтнууд үйлчлүүлэх боломжтой гэнэ. Ингэхдээ ахисан түвшинд суралцаж буй, судалгаа шинжилгээ хийж байгаагаа гэрчлэх үнэмлэх, тодорхойлолтыг харьяа сургууль, байгууллагаасаа авчран үйлчлүүлэгчийн карт нээлгэх шаардлагатай аж
2024-03-15
Rokit Bay тоглолтоо хийнэ
Реппер Rokit Bay нэрээрээ танил болсон О.Баярсайхан ирэх есдүгээр сарын 14-нд “Пуужин аяраа” тоглолтоороо фэнүүдтэйгээ уулзана. Тэрбээр “Жингүйдсэн пуужин” нэрт дуугаа уржигдар олны хүртээл болгосон юм. Түүнчлэн реппер Rokit Bay тун удахгүй “Odyssey” гэх тав дахь цомгоо гаргах гэж буйгаа зарлажээ
2024-03-15
Орон нутагт нүүдлийн амбулатори ажиллуулж эхэллээ
Эрүүл мэндийн яамнаас эрт илрүүлгийг эрчимжүүлэх зорилгоор, Японы Засгийн газраас хандивласан нүүдлийн амбулаторийг орон нутагт ажиллуулж эхэлжээ. Тус нүүдлийн амбулаторид Улсын нэг, хоёр, гуравдугаар төв эмнэлгийн нарийн мэргэжлийн эмч нарын баг ажиллаж байгаа бөгөөд тэд 21 аймгийн иргэдэд хүрч үйлчилнэ. Эмч нарын баг аймаг болон сум дундын эмнэлэгт очиж, урьдчилан сэргийлэх үзлэг, оношилгоо хийх ажээ. Нүүдлийн амбулаторийн “аялал”-ыг өчигдөр Төв аймгийн Батсүмбэр сумаас эхлүүлсэн
2024-03-15
“Усны нулимс” нөлөөллийн аян өрнүүлж байна
Засгийн газрын хэрэгжүүлэгч агентлаг Усны газар, СУИС, Монголын байгалийн уран бүтээлчдийн холбооноос Дэлхийн усны өдрийг угтан “Усны нулимс” нөлөөллийн аян өрнүүлж эхэлжээ. Энэ нь уран бүтээлээр дамжуулан усны хомсдолын асуудлыг нийгмийн анхааралд оруулах, зохистой хэрэглээг нутагшуулах зорилготой санаачилга юм байна
2024-03-15
Дэлхийн шилдэг үзүүлбэрүүдийг толилуулах нь
“Браво циркус” нэгдлийн уран бүтээлчид дөрөв дэх удаагийн тоглолтоо “Монгол гайхамшиг” нэртэйгээр энэ сарын 29-нөөс эхлэн дөрөвдүгээр сарын 6 хүртэл Монгол бөхийн өргөөнд өдөр бүр толилуулах нь. Уг тоглолтын тасалбарын үнэ 30 мянган төгрөг аж. Дэлхийн циркчдийн “Монте-Карло” наадмын гран при шагналт, Гиннесийн амжилтуудын эзэн Монгол, НХАУ, Франц, Унгар улсын циркчид, ОХУ-ын алиалагч, сургуулилалттай амьтад уг тоглолтод оролцох юм
2024-03-15
Зөвшөөрөгдөх хэмжээнээс хэтэрсэн, задрах боломжгүй ачааны тээврийг түр зогсооно
Авто тээврийн хэрэгслийн байдалд тавих ерөнхий шаардлага MNS 4598:2020 стандартад заасан хэмжээнээс хэтэрсэн, задрах боломжгүй ачааны тээврийг ирэх долоо хоногийн лхагва гаргаас эхлэн нэг сарын хугацаанд зогсоохоор болсноо Зам, тээврийн хөгжлийн яамнаас өчигдөр мэдээлэв. Урин дулааны улирал эхэлж, хөрс гэсэх үед авто замд ус, чийг ихээр хуримтлагдаж, ачаа даах чадвар, бат бэхийн үзүүлэлт нь огцом буурдаг тул ийнхүү шийдвэрлэсэн аж. Дээрх зохицуулалтыг зөрчсөний улмаас авто зам, замын байгууламжид хохирол учирвал холбогдох хуулийн дагуу буруутай этгээдээр нөхөн төлүүлэх гэнэ. Үүний хүрээнд стандартыг хэрэгжүүлэх, зөвшөөрсөн хэмжээнээс хэтрүүлсэн ачаа тээвэрлэж буй, эсэхийг шалгах, зөрчил арилгуулах зорилгоор “Авто тээврийн үндэсний төв”, “Зам, тээврийн хөгжлийн төв” ТӨҮГ, Тээврийн цагдаагийн албаныхан хамтран төлөвлөгөөт хяналт шалгалт зохион байгуулахаар болжээ.
2024-03-15
“Улаанбаатарын бүсчилсэн хөгжил төвлөрлийг сааруулна”
Засгийн газраас энэ оныг “Бүсчилсэн хөгжлийг дэмжих жил” болгон зарласан. Үүний хүрээнд зохион байгуулж буй “Улаанбаатар-Бүсчилсэн хөгжил” форум өчигдөр боллоо. Тус форумаар “Дэд бүтэц-Эрчим хүч, дулаан хангамж”, “Орон сууцжуулах бодлого, нийгмийн суурь үйлчилгээний хүртээмж”, “Бүс нутгийн эдийн засгийн интеграцчлал, дагуул хот”, “Засаглал, хууль, эрх зүйн шинэчлэл” гэсэн дөрвөн сэдвийн хүрээнд хэлэлцүүлгүүд өрнүүлэв. Нийслэлд тулгараад буй асуудлуудыг цэгцлэх зорилготой, урт хугацааны төлөвлөгөөнүүдийг танилцуулсан энэхүү арга хэмжээг сурвалжиллаа.
2024-03-15
Манай тамирчид олимпын эрх олгох тэмцээнд оролцох нь
Монголын таеквондогийн болон пара таеквондогийн үндэсний шигшээгийн тамирчид БНХАУ-д өнөөдөр эхлэх, Парисын олимпын эрх олгох тэмцээнд оролцохоор Тайнань хотыг зорьсон. Энэ сарын 17-нд өндөрлөх дээрх тэмцээнд үндэсний шигшээ багийнхнаас 49 кг-д Б.Учрал, 67 кг-д Г.Энхчимэг, 58 кг-д Д.Чинзориг, 68 кг-д Ц.Баянбат нар өрсөлдөнө. Паралимпийн тамирчдаас 58 кг-ын жинд Х.Темирбек, 70 кг-д Б.Шинэбаяр нар улсаа төлөөлж тулалдах юм.
2024-03-14
“Алтан цом”-ын төлөөх барилдааны шигшээ наймын багууд шалгарлаа
Үндэсний бөхийн “Алтан цом”-ын төлөөх барилдааныг жил бүр зохион байгуулдаг. Үүнд 21 аймаг, есөн дүүрэг, Улаанбаатар хотын болон Тува улсын багийнхан оролцох болсон. Багууд эхний хоёр шатанд сугалаагаар хасагдах журмаар барилдаж, шалгарсан найм нь тойргоор барилдаж, аваргаа тодруулдаг билээ. Өдгөө эл барилдаан бөхийн хорхойтнуудын үзэх дуртай, хамгийн сонирхолтой тэмцээний нэг болжээ. Хагас шигшээ буюу III тойргийн хоёр дахь өдрийн эхний барилдаанд Архангай аймгийнхан Сүхбаатарын бөхчүүдтэй учраа таарсан ч 21:4, Өмнөговийнхон Орхоны багийнхантай өрсөлдөн 19:6, Увсын хүчтэнүүд Завханыхныг 17:8-аар илт давуу ялж, шигшээ наймд шалгарав
2024-03-14
Оюутны спортын VI универсиад ирэх сард хөшгөө нээнэ
Монголын оюутны спортын VI универсиад Улаанбаатар хотод ирэх сарын 15-нд хөшгөө нээнэ. 11 хоног үргэлжлэх уг наадмыг зуны спортын 10 төрөлд зохион байгуулах бөгөөд анхан шатны тэмцээнээс шалгарсан их, дээд сургуулиудын баг тамирчид шигшээд өрсөлдөх нь. Тэмцээнд оролцох тамирчин спортын нэг төрөлд оролцох боломжтой. Түрүүлсэн тамирчинд 400, мөнгөн медаль хүртсэнд нь 300, хүрэл медаль хүртсэнийг нь200 мянган төгрөгөөр шагнана. Түүнчлэн нэгдсэн дүнгээр эхний зургаан байр эзэлсэн их, дээд сургуулиудыг бага онооны журмаар дүгнэн, 1-6 сая төгрөгийн мөнгөн урамшуулал олгох аж
2024-03-14
“157 тоотын диваажин”
МУИС, МУБИС-ийн Утга зохиолын нэгдэл, Р.Чойномын нэрэмжит “Залуу нас” дугуйлангийн гишүүн, залуу яруу найрагч Б.Санчирыг энэ удаагийн “Уран зохиол” буландаа онцолж байна. 1999 онд Улаанбаатар хотод төрж, 2022 онд МУБИС-ийг Хэл, уран зохиол судлаач мэргэжлээр төгссөн тэрбээр шинэ цагийн яруу найрагт өөрийн гэсэн өнгө аясыг бүрдүүлж яваа авьяаслаг, залуу уран бүтээлчдийн нэг юм. Түүний “157 тоотын диваажин” хэмээх яруу найргийн анхны түүвэрт багтсан болон сүүлийн үед бичсэн шинэ шүлгүүдээс уншигчдадаа дээжлэн хүргэе.
2024-03-14
Литва улсын баг мөсний загасчлалын ДАШТ-д түрүүлжээ
Мөсний загасчлалын 20 дахь удаагийн ДАШТ-ийг Архангай аймгийн Өгийнуур сумд зохион байгуулсан. Тус тэмцээнд 10 улсын 111 тамирчин оролцож, ур чадвараа сорьсон юм. Монголд болсон тэмцээн нь цэнгэг усны загасчлалын төрөл. Манай улсад өвөл анх удаа хөл тавьсан Европынхноос Литва улсын баг аваргаар шалгарлаа. Тэргүүн байрын төлөө өрсөлдсөн АНУ-ын баг удаалж мөнгө, украинчууд хүрэл медальтай нутаг буцав
2024-03-14
“Хилчин”, “Ноён” багийнхан бүсийн АШТ-д шилдгээр шалгарав
Улаанбаатар хотод болсон нийслэлийн бүсийн аварга шалгаруулах волейболын тэмцээнд дасгалжуулагч С.Дэлгэрмаагийн удирдлагад оролцсон “Хилчин”-ий тоглогчид түрүүллээ. Ана мана үзэлцсэн халуухан тоглолтоос Б.Баттулга дасгалжуулагчтай “Баянгол” багийнхан цойлж, эхний байрт шалгарна гэж үзэгчид таамаглаж байсан ч тэд дэд байрт шалгарлаа. Г.Баярсайхан дасгалжуулагчтай “Уурхайчин 21”-ийнхэн эсрэг багийнханд онооны хол зөрүүгүй хожигдож, III байрт шалгарав. Эрэгтэйчүүдийн багаас Р.Тамираа дасгалжуулагчтай “Ноён”-ынхон тоглолтын турш бусдыгаа хошуучилж, шилдгээр тодров
2024-03-14
Шигшээд шалгарах ширүүхэн өрсөлдөөн болж байна
Ширээний теннисний дээд лигийн тоглолт өрсөлдөөнтэй болдог. Учир нь үндэсний шигшээ багт байсан тамирчид, мөн харьяалагдаж буй тоглогчид тус тусын клубийг төлөөлж оролцдог тул нэгнийхээ арга барил, техникийг сайн мэднэ. Хоёрдугаар тойргийн тоглолтод “Төмөрт өргөө”, “Жем”, “Өсөх зоос”-ынхон шигшээд тунах нь тодорхой болсон. Харин “Бласт&Тэнгис”, “Хаан даатгал” багийнхны хувьд тэдний адил шалгарахын төлөө гал гарсан тоглолт өрнүүллээ. Эхний тойрогт “Бласт&Тэнгис”-ийнхэн “Хаан даатгал”-ынхныг 5:4-өөр буулган авснаар нийлбэр дүнгээр дөрөвт жагсаж, шигшээд шалгарсан
2024-03-14
