Унгарын Будапешт хотод хөнгөн атлетикийн ДАШТ өнгөрсөн ням гарагт өндөрлөлөө. Энэ жилийн ДАШТ-д 195 орны 2100 гаруй тамирчин оролцсон нь түүхэн дээд амжилт болов. “Будапешт-2023”-ын үеэр дэлхийн нэг, дэлхийн залуучуудын нэг, ДАШТ-ий долоо, тивийн 11, улсын 73 дээд амжилт шинэчлэгджээ. Мөн 120 орны 400 мянган үзэгч тасалбар худалдан авч, шилдэг тамирчдын өрсөлдөөнийг сонирхсон байна.
Энэ удаагийн тэмцээний гол оддын тоонд 100, 200, 4х100 м-ийн буухиа гүйлтийн аварга Н.Лайлс (АНУ), 100, 4х100 м-ийн буухиа гүйлтийн аварга Ш.Ричардсон (АНУ) нар багтаж байна. Мөн400 м-ийн халхалттай гүйлт, 4х400 м-ийн буухиад аваргалсан Ф.Бол (Нидерланд), ДАШТ-ий 1500, 5000 м-ийн зайд хоёуланд нь түрүүлсэн анхны эмэгтэй гүйгч Кенийн Ф.Кипегон багтлаа. Түүнчлэн 20 болон 35 км-ийн спорт алхаанд алт, мөнгөн медаль бөөндсөн А.Мартин, М.Перес (хоёул Испани) нар орж байна.
Медаль
23 улс алт, 26 улс мөнгө, 24 улс хүрэл
медаль хүртсэнээс гадна нийт 46 улсын тамирчин медалийн тавцанд гарчээ.
Тивийн шилдэг үзүүлэлт
Африк -Таван улс есөналтан медаль
Ази - Гурван улс гурван алтан медаль
Европ - Есөн улс 16 алтан медаль
Далайн орнууд - Нэг улс нэг алтан медаль
Өмнөд Америк - Нэг улс нэг алтан медаль
Анхдагчууд
- Энэтхэг (Н.Чопра, эрэгтэйчүүдийн жад шидэлт), Буркина Фасо (эрэгтэйчүүдийн гурвын харайлт), Серби(эмэгтэйчүүдийн уртын харайлт) улс ДАШТ-ээс анхны алтан медалиа хүртэв.
- Эрэгтэйчүүдийн 100 м-ийн зайд медаль хүртсэн Африкийн анхны гүйгч нь Ботсванийн Л.Тейбого боллоо.
- Х.Китагүчи эмэгтэйчүүдийн жад шидэлтэд түрүүлсэн анхны япон эмэгтэй болсон. Тэрбээр 2025 онд Токио хотод болох дараагийн ДАШТ-ий үеэр талбай дээрээ аварга цолоо хамгаалах боломжтой юм.
- Э.Обиена эрэгтэйчүүдийн тулгууртай харайлтад мөнгөн медаль хүртсэн нь ДАШТ-д филиппин тамирчдын үзүүлсэн оргил амжилт болж түүхэнд үлдлээ.
- Пакистан (А.Надийм, эрэгтэйчүүдийн жад шидэлт), Британийн Виржиний арлууд (К.Макмастер, эрэгтэйчүүдийн 400 м-ийн халхалттай гүйлт) ДАШТ-ээс анх удаа медаль хүртэв.
- ДАШТ-ий түүхэнд анх удаа алтан медалийг хоёр тамирчин хуваан хүртсэн нь К.Мүүн (АНУ), Н.Кеннеди (Австри) нар юм. Тэд эмэгтэйчүүдийн тулгууртай харайлтад ийм өвөрмөц амжилтын эзэнболсон.
Бэлтгэсэн: Н.Энх
