Леброн, Стеф нарыг хэрхэн аврах вэ 

NBA-ийн солилцоо, наймааны цонх хоёрдугаар сарын 6-нд хаагдана. Энэ өдрөөс хойш лигийн багууд наймаа хийх боломжгүй юм. Плей-офф улам ойртож буй учраас аваргын төлөө өрсөлдөхийг хүссэн зарим баг хүчээ зузаалахыг хичээх нь гарцаагүй. Тэд хоёрдугаар сарын 6-наас өмнө солилцоо хийх ёстой. Тэгвэл лигийн багууд ямар наймаа хийх боломжтой вэ.

“Финикс”-т зориулсан шок эмчилгээ

Плей-оффт сайн амжилт үзүүлэхийг хүсэж л байгаа бол ихээхэн өөрчлөлт хийх ёстой багуудын тэргүүн эгнээнд “Финикс” бичигдэх нь гарцаагүй. Тус баг сүүлийн жилүүдэд од тоглогчдыг цуглуулж, орчин цагийн ээлжит “их гурвал”-ыг бүрдүүлээд буй. Гэвч багийн эзэн М.Ишбигийн амбицтай наймаанууд үр дүнгээ өгөөгүй л байна. Тийм ч учраас лигийн нэгэн багийн менежер баг худалдаж авснаасаа хойших хагас жилд солилцоо хийхгүй байх  дүрэм гаргаж, түүнийг “Ишбигийн дүрэм” гэж нэрлэхийг санал болгосон тухай хошин яриа тарж байлаа. 
Тус баг “их гурвал”-тай болсон ч аваргын төлөө өрсөлдөгчид тооцогдохгүй байгаа юм. Тэд энэ улирлын эхний 10 тоглолтын наймд нь хожсон. Гэвч өдгөө хожил, хожигдлын харьцаа нь тэнцүү болжээ. Багийн тоглолт тогтворгүй төдийгүй зогсонги байдалд орсон нь илт байна. Энэ мэт нөхцөл байдлаас шалтгаалж их гурвалын нэг болох хамгаалагч Б.Бийлийг сэлгээнээс тоглуулж эхлэв. Ингэх ч шалтгаан бий. Түүний статистик үзүүлэлт гурав дахь улиралдаа дараалан буурч, баг дотроо нэмэх-хасах үзүүлэлтээр хамгийн сүүлд орж байна. Үүн дээр нь өндөр үнэтэй гэрээ, солилцоог цуцлах эрхийг нь нэмэх хэрэгтэй. 
“Финикс” солилцоо хийх зорилгоор драф­тын эрхээ нэмсэн. Тэд эдгээр эрх болон за­рим тоглогчоо ашиглаж, “Майами”-гаас Ж.Бат­лерыг авах магадлалтай юм. Жимми ч өөрөө уг солилцоонд таатай хандана гэдгээ сая­хан өмссөн пүүзний өнгөөрөө илэрхийлээд амж­сан.

“Лейкерс”-ийн ужиг асуудал

Тус баг холбогч Д.Расселийг явуулснаас хойш төвийн тоглогчийн эрэлд гарсан. Сэл­гээгээ сайжруулах зорилгоор тэд Д.Финни-Смит, Ш.Милтоныг авсан билээ. Харин төвийн байрлалын асуудлаа шийдэж чадаагүй л байна. Энэ талаар багийн лидер Э.Дэвис “Багт маань ахиад нэг өндөр тоглогч хэрэгтэй. Би дөрвөн номерын байрлалд л сайн тоглодог. Аварга болохдоо бид үүнийг сайн харсан шүү дээ” гэж ярьжээ. Үнэхээр ч 2020 онд аваргалахад тус багт Ж.Макги, Д.Ховард нар төвийн тоглогчийн байрлалд тоглож байлаа. Харин одоогийн шидэгчидтэй, Лебронтой, хамгаалалтын мангас Э.Дэвистэй тус багт төвийн тоглогч л  хэрэгтэй. 
Сэтгүүлч Ш.Чараниягийн мэдээллээс үзвэл “Лейкерс” төвийн тоглогч У.Кесслерийг (Юта) со­нирхож байгаа бололтой. Түүнчлэн Й.Валанч­ю­нас (Вашингтон), Н.Вучевич (Чикаго) нарыг овоо хараандаа оруулсан гэх мэдээлэл ч гар­сан. Нэгэнт сул талаа олсон тэд уг асуудлын шийд­лийг хэнээр нөхөхийг харах л үлдлээ.

“Милуоки”-д мэргэн буудагч хэрэгтэй

Я.Антетокумпо дахин “Үнэ цэнтэй тог­логч”-ийн түвшинд тоглож, оноо авалтаар ли­гийн дэд байрт бичигдэж байна. Үүнийх нь үр дүнд “Бакс” NBA цомын тэмцээнд түрүүл­сэн билээ. Улирлыг асар муу эхлүүлсэн тэд алдаа­гаа бага багаар засаж буйн илрэл нь энэ­хүү ялалт юм. “Бакс” өдгөө бүсдээ эхний дө­рөвт бичигдэж байгаа. Гэвч бүсийнхээ топ багууд­тай өрсөлдөхөд хүч дутуу хэвээр байна. Жи­шээл­бэл, тэд “Кавальерс”, “Селтикс”, “Никс”-тэй найман удаа тоглохдоо нэг ч ялаагүй. 
Өнгөрсөн жил Д.Лиллардыг авахын тулд бүхнээ зориулсан ч төрөл бүрийн шалтгааны ул­маас тэд плей-оффын эхний шатнаас ха­сагд­сан. Харин энэ алдаагаа давтахгүйн тулд хоёр лидертээ хань болох оноо түүгчийн эрэлд “Бакс” гарсан бололтой. Яннис, Дэйм энэ ули­ралд дунджаар тус бүр 31.4 болон 25.2 оноо дунд­­жилж байгаа. Тэгвэл Б.Портис 13.4 оноо авч баг­таа гуравдугаарт бичигдэж буй. Б.Лопес, К.Миддл­тон урьдынх шигээ тог­лохгүй гэдэг нь нэгэнт тодорхой болсон. Энэ нь ч тэдэнд нэрмээс болж байна. Эд­гээрээс үүдэж тэд довтолгоонд идэвх­тэй, оноо авч чаддаг гурав дахь сонголтоор Б.Бий­лийг авч магадгүй. Хэрэв Ж.Батлер “Санс”-т ирвэл Б.Бийл солигдох нь гарцаагүй билээ. Гэхдээ тэр­бээр 2023 онд “Милуоки”-д очихоос тат­гал­заж, “Финикс”-ийг сонгож байсныг мартаж болохгүй. Ямартай ч тэдэнд гурав дахь мэргэн бууч хэрэгтэй байна.

С.Көррид хэн туслах бол

 “Стефен Көрри бол сайн туслахгүй лигийн цо­рын ганц супер од” гэж телевизийн аналист К.Пер­­кинс хэлсэн нь үнэний ортой юм. “Уор­риорз” өнөөг хүртэл түүнд сайн туслагч, багийн хоёр дахь лидерийг олж өгч чадаагүй л байна. Тийм учраас тэд өнгөрсөн улиралд плей-инээс ха­саг­даж, энэ улиралд тун тааруу тоглох бол­лоо. 
Тэдний нөхцөл байдал “Финикс”-тэй тун төс­тэй. Ялдаг, плей-оффт хүчтэй өрсөлддөг баг болохын тулд тэд цус сэлбэхээс өөр арга байхгүй. Асар их итгэл найдвар тавьж байсан Ж.Куминга эргэлзээ төрүүлж эхэл­сэн. Түүнээс гадна тэрбээр саяхан гэмт­сэн юм. Энэ өвлийн цор ганц солилцоо болох Д.Шре­дер багт эерэг нөлөө төдий л үзүүлж чадсангүй. 
“Уорриорз”-ын хувьд салаа замын өмнө ирээд байгаа гэж болно. Нэг­дү­гээрт, С.Көр­рид хань болох супер одыг ямар ч үнээр ха­маагүй авчрах. Эсвэл, нөхцөл бай­дал­тай­гаа эвлэрээд С.Көрриг зодог тайлах хүр­тэл нь энэ маягаар тоглох. Хэрэв тэд до­могт тог­логч­тойгоо хамт сүүлчийн бүжиг хий­хийг хүсэж байгаа л бол гар хумхин суух ёсгүй билээ.

Э.Манлайбаатар