25 дахь удаагийн “Хаврын баяр” үзэсгэлэн худалдааг тавдугаар сарын 4-5-нд Японы Токио хотын “Хикаригаока” паркт зохион байгуулна. Тус арга хэмжээний хүрээнд үндэсний бараа, бүтээгдэхүүний үзэсгэлэн худалдаа, бөхийн барилдаан, биет болон биет бус өв соёл, ёс заншлыг сурталчлах өдөрлөг болох юм. Мөн “Хаврын баяр”-ын хүрээнд үндэсний үйлдвэрлэгчдийг бизнес аялалд хамруулах аж. Ингэхдээ үндэсний онцлогтой бэлэг дурсгал, тоглоом наадгай, хүнсний бүтээгдэхүүн, эсгий урлал, ноос, ноолуур, арьс, ширэн бүтээгдэхүүн үйлдвэрлэгчдэд давуу эрх олгох гэнэ. Үйл ажиллагааны зохион байгуулагчаар Жижиг, дунд үйлдвэрийн газар, Япон Улс дахь Элчин сайдын яам, Оюутны холбоо ажиллах нь. Үзэсгэлэн худалдаанд оролцохоор Монголоос 16-18 аж ахуйн нэгжийнхэн Япон орныг зорино. Бизнес аялал нь тавдугаар сарын 3-9-нд бөгөөд тус улсын аж ахуйн нэгжийн үйл ажиллагаатай танилцах юм. Түүнчлэн аяллын үнэ 6.5 сая төгрөг бөгөөд “Сая Мөнх” компанийн цахим хуудсаар дамжуулан бүртгүүлэх боломжтой. Бүртгэл нь энэ долоо хоногийг дуустал үргэлжлэх юм.
А.Дөлгөөн
