Умайн хүзүүний хорт хавдраас сэргийлэх вакцинд 22 328  хүүхэд хамрагджээ

Умайн хүзүүний хорт хавдраас урьд­чилан сэргийлэх вакциныг ма­най улс 2023 онд заавал хийх дарх­лаажуулалтад оруул­сан билээ. Ингэснээр нийт 13 ви­русний эсрэг есөн вакцинаар хүн амыг дархлаажуулж буй. Үүний хү­рээнд умайн хүзүүний хорт хавдраас сэр­­гийлэх хүний папиллома вирусний эсрэг вакциныг 11 настай эрэгтэй, эмэг­тэй хүүхдүүдэд хийж эхэлсэн. Гэвч дарх­лаа­жуулалт зорилтот бүлэгтээ хү­рэх­гүй, хамрагдсан хүний тоо цөөн байгааг Эрүүл мэндийн яамныхан хэллээ. Энэ сарын 15-ны байдлаар дарх­лаа­жуулалтад хамрагдвал зохих 78 622 хүүхдээс 22 328 буюу 28.4 хувь нь вакцин хийлгэсэн байна. Орон нутагт 31.1, нийслэлд 28.4 хувьтай хамрагджээ. 

Дархлаажуулалтыг эрчимжүүлэх зо­­рил­гоор Эрүүл мэндийн яамны мэр­гэ­жилтнүүд орон нутагт техник арга зүйн дэмжлэг үзүүлж мэдээлэл, зөв­лөгөө өгч буй аж. Тухайлбал, Өвөр­хангай, Баянхонгор аймагт ажиллажээ. Дархлаажуулалт Өвөрхангай аймагт 32, Баянхонгорт 44.1 хувьтай байна.  Сур­гуульд суурилсан дархлаажуулалтыг байн­гын, түр цэг, явуулын гэсэн гур­ван хэлбэрээр зохион байгуулж буй аж. Цаашид дархлаажуулалтыг нэ­мэг­­­дүүлэхийн тулд аймаг, сумын За­саг дар­гаар ахлуулсан ажлын хэсэг бай­гуу­лах, төлөвлөгөөний хэрэг­жил­тийг хангах, товлолт вакцины тухай мэдээ, мэдээллийг зөв таниулах зэргээр бүх шат­ны байгууллагууд хамтарч ажил­лахыг салбарын сайд нь үүрэгджээ. Мөн дээрх аймаг, сумын Эрүүл мэндийн тө­вүү­дэд НҮБ-ын Хүн амын сангаас багаж хэ­рэгсэл гардуулсан гэнэ.

Ч.Туяа