Инфляц 5.5 хувиар өслөө
Хэрэглээний бараа, үйлчилгээний үнэ энэ оны долоодугаар сард улсын хэмжээнд өмнөх жилийн мөн үеийнхээс 5.5, оны эцсийнхээс 4.4, өнгөрөгч сарынхаас 0.1 хувиар өсжээ. Төрлөөр нь авч үзвэл хүнсний барааны бүлгийн үнэ 2023 оны долоодугаар сарынхаас 5.6, хүнсний бус барааных 5.4, үйлчилгээнийх 7.3 хувиар өссөн байна.
2024-08-12
Токио дахь ЭСЯ-наас мэдээлэл гаргажээ
Японд ажиллаж, амьдардаг монгол иргэдэд зориулсан сэрэмжлүүлэг мэдээллийг Токио дахь Монгол Улсын Элчин сайдын яамны Консулын хэлтсээс гаргажээ. Тус улсын Мияазаки мужид энэ сарын 8-ны 16.43 цагийн орчимд газар 7.1 баллын хүчтэй хөдөлсөн билээ. Газар долоон баллаас дээш хүчтэй хөдлөхөд дагалдах чичирхийллийн хүч түүнээс илүү байх магадлалтай гэнэ.
2024-08-12
Хөгжлийн бэрхшээлийг зөв тодорхойлох ангилал хэрэгтэй гэв
УИХ-д хөгжлийн бэрхшээлтэй иргэдийн анхны төлөөлөл болж сонгогдсон гишүүн Ж.Баясгалан, О.Саранчулуун нар “Зориг” сангийн “Ардчилал зуны зуслан” хөтөлбөрт оролцогч оюутнуудын төлөөллийг хүлээн авч уулзсан байна. Энэхүү сургалтаар оюутан залууст ардчилал, хууль тогтоомж, түүний хэрэгжилт, сайн засаглал, жендер, хүний эрх зэрэг улс төр, нийгэмд тулгамдаж буй асуудлаар мэдлэг, мэдээлэл олгодог аж.
2024-08-12
АНУ-ын “Мөрөөдлийн баг” алтан медаль хүртэв
Сагсан бөмбөгийн эрэгтэйчүүдийн тэмцээнд АНУ-ын “Мөрөөдлийн баг” Францын шигшээг 98:87-гоор хожин, алтан медаль авлаа. Гэхдээ энэ олимпод “Мөрөөдлийн баг” бусдаас илт тасархай байсангүй. Хагас шигшээ болон финалд АНУ-ын багийн ялалтад Стефен Көрри гол үүрэг гүйцэтгэсэн. Стеф Сербийн багийн эсрэг гурван онооны шидэлтийг есөн удаа амжилттай гүйцэтгэсэн юм. Мөн Францын эсрэг найман удаа холоос оновчтой “буудсан”. Көрри ийнхүү анх удаа олимпод оролцоод аварга боллоо. Харин Леброн Жэймс гурав, Кевин Дюрант дөрөв дэх олимпын алтан медалиа зүүв. Эл төрөлд хүрэл медалийг Никола Йокич тэргүүтэй сербичүүд Германы багийг 93:83-аар хожсоноор хүртсэн юм.
2024-08-12
Туул голын усны түвшин нэмэгдэж, эрэг нь нуржээ
Хан-Уул дүүргийн 12 дугаар хорооны иргэд амралт, аялал жуулчлалын чиглэлээр үйл ажиллагаа явуулдаг аж ахуйн нэгж голын голдирлыг өөрчилснөөс айлууд үерт автаж байна гэсэн дуудлагыг энэ сарын 10-нд холбогдох байгууллагуудад өгчээ. Үүний дагуу тухайн байршилд хяналт шалгалт хийж буйгаа Байгаль орчин, уур амьсгалын өөрчлөлтийн яамнаас мэдээлэв. Үргэлжлэн орсон борооны улмаас Туул голын усны түвшин нэмэгдэж, эргээ давж, улмаар голын эрэг нуржээ. Ингэснээр Туул голын хамгаалалтын бүсэд орсон айлууд усанд автсан байна
2024-08-12
Б.Сэр-Од олимпын наадамд хөнгөн атлетикийн төрлөөр хамгийн олон удаа оролцсон тамирчин боллоо
“Парис-2024” зуны олимпын наадам өндөрлөлөө. Зуны 33 дахь удаагийн нээлтийн ёслолын завьт парадад Монгол Улсын Төрийн далбааг намируулсан Гавьяат тамирчин, марафонч Б.Сэр-Од зургаа дахь олимпдоо оролцов. Тэрбээр 42 км замыг хоёр цаг 42 минут 33 секундэд туулснаар 71 дүгээр байр эзэлсэн юм. Ингэснээр Б.Сэр-Од олимпын наадамд хөнгөн атлетикийн төрлөөр хамгийн олон удаа оролцсон тамирчин болж, Гиннесийн амжилт тогтоолоо.
2024-08-12
Багшийн эрэлтийг урьдчилан тооцоолж, хомсдолоос сэргийлэх арга хэмжээ авах нь
Манай улсад одоогоор сургуулийн насны 825 мянга гаруй хүүхэд бий аж. Энэ тоо 2030 он хүртэл тогтмол өсөх бөгөөд тэр хэрээр ерөнхий боловсролын сургуулиудын багшийн эрэлт нэмэгдэх төлөвтэй гэнэ. Гэтэл манай улс ирэх жилүүдэд шаардлагатай хүний нөөцийг бэлтгэх нь битгий хэл, яг одоо дутагдалтай 4200 багшийн орон тоог нөхөж чадахгүй байна. Олон улсад хөдөлмөрийн насны хүн амын ажиллах хүчний гурван хувийг ерөнхий боловсролын сургуулийн багш нар эзэлдэг аж. Харин манай улсад эл үзүүлэлт 2.88 хувьтай гэнэ
2024-08-12
Японы Ерөнхий сайдын айлчлал цуцлагджээ
Монгол Улсын Ерөнхий сайд Л.Оюун-Эрдэнийн урилгаар Япон Улсын Ерөнхий сайд Ф.Кишида энэ сарын 11-12-нд манай улсад айлчлахаар төлөвлөөд байсан билээ. Гэвч тус улсын баруун өмнөд хэсэг, Кюүшюарлын Мияазаки мужийн эрэгт энэ сарын 8-нд хүчтэй газар хөдөлсөнтэй холбоотойгоор тэрбээр төв Ази дахь айлчлалаа цуцалсан байна. Номхон далайн баруун эргийн ойролцоо дахин хүчтэй газар хөдлөх магадлалтай байгаа зэргээс үүдэн Японы Ерөнхий сайд эх орондоо байж энэ бүх гамшигт бэлэн, эсэхээ нягтлах хэрэгтэйгээ мэдэгдсэн аж. Тэрбээр нөхцөл байдал дээрдэхээр айлчлалаа хийх бөгөөд одоогоор дараагийн тов нь гараагүй байна.
2024-08-12
УИХ-ын ээлжит бус чуулганыг энэ долоо хоногт нээнэ
Засгийн газрын 2024-2028 оны үйл ажиллагааны мөрийн хөтөлбөр болон улсын төсвийн тодотголыг өнөөдөр өргөн барина хэмээн Монгол Улсын сайд, Хэрэг эрхлэх газрын дарга Н.Учрал мэдэгдсэн билээ. Аливаа Засгийн газар бүрэн эрхээ хэрэгжүүлснээс хойш 60 хоногт багтаан үйл ажиллагааны хөтөлбөрийн төслөө УИХ-д өргөн барих хуультай. Мега төслүүдийг хэрэгжүүлэхээр зорьсон уг хөтөлбөрийг хэрэгжүүлэхтэй холбогдуулан энэ оны улсын төсөвт тодотгол хийх шаардлага үүсэж буй юм.
Тиймээс эдгээр асуудлыг хэлэлцэхийн тулд УИХ-ын ээлжит бус чуулганыг хуралдуулахаар болсон билээ
2024-08-12
Үе үеийн ҮАБЗ-ийн гишүүд уулзлаа
Үндэсний аюулгүй байдлын зөвлөлийн гишүүн байсан буюу үе үеийн Ерөнхий сайд, УИХ-ын дарга, Ерөнхийлөгчөөр ажилласан хүмүүсийн төлөөлөл уржигдар Их тэнгэрт цуглажээ. Тэд улс орны өнөөгийн нөхцөл байдал, аюулгүй байдлын асуудлаар ярилцаж, санал солилцсон байна.
2024-08-12
Ёс зүйгүй гишүүдийн тогтоосон ёс бус “стандарт”
Парламентын шинэ гишүүдэд ёс зүйн хэм хэмжээний талаар номын дуу сонсгоё. Бүрэн эрхээ хэрэгжүүлэхдээ өргөдөг тангаргаа сахин биелүүлэхэд нь туслах ёс зүйн дүрмийг ой тойнд нь ортол сануулъя. Ард түмний засаглах эрхийг хангах үндсэн зорилго бүхий төлөөллийн дээд байгууллагад гишүүн, хууль тогтоогчоор сонгогдсон хүн үүрэг хариуцлага, ёс зүйн хэм хэмжээгээ хэрхэн ухамсарлаж, нийгэмд зөв үлгэрлэл, манлайлал үзүүлэх ёстойг ч ойлгуулъя. Үгүй бол энэ талаар ойлголт, мэдлэг нимгэн, улс төрийн наад захын соёл, боловсролгүй хүмүүс УИХ-ын гишүүнийг юу ч хийж, яаж ч авирлаж болох хэмжээгүй эрхт албан тушаалтан мэт ойлгож, буруу булхай зүйлсийг хэвийн үзэгдэл болгох гажуу жишгийг нийгэмд улам гүн бат “суулгах нь”.
2024-08-12
“Зүүдний кафе” олон улсын кино наадмаас шагнал хүртэв
Итали Улсын Милан хотноо зохион байгуулдаг олон улсын “Metropolis” кино наадмаас“Medq media” агентлагийн бүтээл “Зүүдний кафе” шилдэг кино шагнал хүртэв. Түүнчлэн энэхүү кино нь Испанийн Барселона хотын “Europa fest” наадмаас шилдэг бүтээлийн шагнал авсан юм. Мөн Нью-Йоркийн олон улсын наадмын онцлох киногоор шалгарч, ялалтын буухиагаа үргэлжлүүлсээр байна.
2024-08-09
“Хонины найр”-ыг энэ сарын 17-нд зохион байгуулахаар товлолоо
“Хонины найр” нь хөдөөгийн иргэдийн аж амьдрал, хонь маллахтай холбоотой ахуй, эдийн соёл, зан заншлын олон сонирхолтой ёс уламжлалтай танилцах боломжийг олгодгоороо онцлогтой билээ. Тус арга хэмжээний үеэр хонь уралдуулах, холбох, шагайн наадгай, аргал түүх, нэхий элдэх зэрэг хөгжөөнт тоглоомоор дамжуулан монгол ахуй, ёс заншлыг сурталчлан таниулах юм байна. Мөн уламжлалт аргаар эсгий хийж, тогоо нэрж, цайны баяр зохион байгуулах аж. Түүнчлэн малчид өөрсдийн хийсэн ааруул, ээзгий зэрэг цагаан идээгээ энэ үеэр худалдах гэнэ. “Хонины найр” арга хэмжээний тасалбарын үнэ 30 мянган төгрөг юм
2024-08-09
Японы аялал жуулчлалын экспод 7-8 аж ахуйн нэгж оролцуулах нь
Азид томоохонд тооцогддог Японы аялал жуулчлалын экспо ирэх есдүгээр сарын 26-29-нд Токио хотод болох нь. Уг арга хэмжээнд манай улс 17 жил тасралтгүй оролцсон бөгөөд энэ жил хуваарилсан төсөвтөө тааруулан 36 ам метр талбай захиалж, 7-8 аж ахуйн нэгжийг оролцуулахаар төлөвлөж буйг Аялал жуулчлалын мэргэжлийн холбооноос мэдээлэв. Ингэхдээ Япон Улсын зах зээлээс жуулчин хүлээж авдаг тур операторуудыг хамруулахаар төлөвлөж байгаа аж.
2024-08-09
Хиймэл оюун ухааны анхны олимпиадад Монголын баг өрсөлдөж байна
Бүгд Найрамдах Болгар Улс хиймэл оюун ухааны олимпиадыг олон улсад анх удаа зохион байгуулж байна. Тус улсын Ерөнхийлөгчийн ивээл дор өнөөдрөөс эхлэн таван өдөр үргэлжлэх тэмцээнд Монголоос гурван сурагч өрсөлдөж буй юм. Тодруулбал, улсын математикийн олимпиадын хүрэл медальт Э.Тэнүүн, мэдээлэл зүйн олимпиадын мөнгөн медальт Н.Батсүх, хүрэл медальт Т.Энгүүн нар МУИС-ийн Мэдээллийн технологи, электроникийн сургуулийн багш З.Цолмонгийн удирдлагад оролцож байгаа
2024-08-09
Нийслэлийн харьяа байгууллагууд Яармаг руу нүүв
Нийслэлийн ЗДТГ-ынхан Яармаг руу бүрэн бүрэлдэхүүнээрээ нүүж дууссан тухай хотын дарга Х.Нямбаатар өчигдөр мэдээлэв. Түүнчлэн нийслэлийн харьяа газар, агентлагуудын дийлэнх нь ч нүүж дуусаад буй гэнэ. Одоогоор нийслэлийн Эрүүл мэндийн болон Байгаль орчны газрынхан хараахан Яармагт төвхнөж амжаагүй юм байна. Тиймээс дээрх хоёр газраас бусад агентлагаас үйлчилгээ авах иргэд Яармагт байрлах нийслэлийн засаг захиргааны цогцолбор луу очих шаардлагатай болох нь.
2024-08-09
“Нүүдэлчин” фестивалийн хөтөлбөрийг гаргалаа
“Нүүдэлчин” дэлхийн соёлын фестивалийг энэ сарын 16-18-нд Налайх дүүргийн нутаг дэвсгэр дэх Тайж хайрхны бэлд зохион байгуулна. Уг наадмын хөтөлбөрийг зохион байгуулагч Соёл урлагийн газраас гаргажээ. Энэ удаа соёлын биет бус өвийн долоон ай савыг таниулан сурталчлах боловсролын оролцоот хөтөлбөрийн хүрээнд манай улсаас 880 өвлөн уламжлагч наадамд оролцох юм байна. Тус фестивалийн хүрээнд олон улсын язгуур урлагийн тоглолтууд, хүүхдийн жүжиг, хурдан морь, үндэсний бөхийн барилдаан, шагайн болон морьт харваа зэрэг өв уламжлалаа шингээсэн олон төрлийн арга хэмжээ зохиох гэнэ
2024-08-09
Төсвийн мөнгөөр олимп үзсэн хүмүүсийн нэрийг ил болгохыг шаардаж байна
“Парис-2024” олимпод манай улсаас 32 тамирчин өрсөлдөж буй атал дагалдан явсан албаны хүмүүсийн тоо түүнээс хоёр дахин олон байгаа талаарх шүүмжлэл гарсан билээ. Гэтэл албаны хүмүүсийн дотор тамирчдын сэтгэл зүйч, хоол зүйчийг багтаагаагүй нь даарин дээр давс нэмэв. Тодруулбал, олимпод өрсөлдсөн тамирчид хоол зүйч, сэтгэл зүйчидтэй цахимаар холбогдон зөвлөгөө авч байснаа ярьжээ
2024-08-09
