Зөвхөн баяраар бус, бусад үед ч өмсөх минимал загвар зонхилж байна

Сар шинийн баяр болоход хэдхэн хо­ног үлдээд байна. Энэ өдрүүдэд хүн бүр дээл, хувцас, идээ ундаагаа бэлд­дэг уламжлалтай. Цагаан сар, Үндэсний их баяр наадам гэхээр хүн бүрд хамгийн тү­рүүнд уламжлалт хэв загвараа хадгалсан дээл бодогддог байх. Дээл бол манай орны бай­галь, цаг уурын онцлог, эрхэлж буй ажил, амьд­ралын хэв маягийг тольдон ха­руул­даг түүхэн товчоон гэлцдэг. Иймд өнөө жи­лийн сар шинийг гоёлыг өнгөлөх үндэсний брэн­дүүдийн үнэ болон загварын мэ­дээл­лийг хүргэе.
Өнөө жилийн Цагаан сарын цуг­луул­гуудыг харвал дизайнерууд дээлийн үндсэн загвар, хэл­бэрийг хадгалахаас гадна хийц болон хэрэгцээ талаасаа цаг үедээ нийцсэн шинэ элементүүд шингээн урлажээ. Ингэхдээ зөвхөн баярын өдрүүдэд л гоёх бус, өдөр тутамдаа ч өмсөх боломжтой үндэсний хувцас бүтээхээр зорьсон аж. Энгэр хэсэг нь дээлийнх шиг загвартай ч их биеийг нь костюмын хэл­бэрээр урласан хүрэм, аль эсвэл энгийн фут­болк, даашинз, хантааз мэт боловч монгол зах оруулж, товч шилбэ ха­даж, үндэсний өнгө аяс шин­гээсэн заг­варууд өнөө жил зонхилж байна. Мөн монгол хээтэй өмд, юбка зэрэг олон шинэ загвараар нүд хужирлах болж. Тухайлбал, ATOZ-ынхон өнгөлөг, чамин тансаг байдлаа хадгалан могойн хээтэй хантааз, хүрэм зэрэг заг­­вараа борлуулж эхэллээ. Тус брэндийн бү­тээг­­дэхүүнүүд 100-890 мянган төг­рөгийн үнэ­тэй.
“Борголжин” брэндийнхэн бараг л Мон­голд анх удаа хатны зурагтай, чөлөөт цамц худал­даанд гар­гасан гэхэд болно. Тус брэндийнхэн биз­­несийн гол хө­шүү­рэг болох хямд үнийг чу­халчилдаг нь хэрэг­лэгчдийг ихэд татдаг гэ­дэг. Тиймдээ ч хамгийн боломжийн үнийг са­нал болгодог билээ. Тэгвэл тэд өнөө жил илүү ми­нимал загваруудаа дэлгэж, 55-345 мянган төг­рөгөөр худалдаж буй. Ха­рин “Ивээл” брэн­дийнхэн хиймэл хурган дотор­той хан­тааз, уламжлалт хээ хуар шин­гээсэн дээл, хос­ло­луудаараа өнөө жи­лийн өнгийг то­дор­хойлох нь. Ингэхдээ син­тепон дотортой хан­тааз, хүүх­дийн болон том хүний дээл гэх мэт олон со­нир­холтой загварыг сар шинийн кол­лекц­доо баг­таажээ. Эл брэндийнхэн бараа, бүтээг­дэ­хүү­нээ 65-250 мянган төгрөгөөр бор­луулдаг юм байна. Тухайлбал, хүүхдийн хантааз 65 мянга, том хүний хоргой эмжээртэй нь 105 мянган төг­рөгийн үнэтэй гэнэ.
Залуу бүсгүйчүүдэд зориулсан хувцас түл­хүү урладаг “We” брэндийнхэн материал сон­гохдоо илүүтэй анхаардгаа үр­гэл­ж он­цолдог. Тодруул­бал, зөвхөн торгоор бус, орчин үед тренд болж буй материалаар хувцсаа урлаж, уян хатан үнийг хэрэглэгчдэдээ санал болгодог нь тус брэндийн давуу тал гэнэ. “We” брэндийн монгол цамц 118 мянга, тэрлэг дээл 198 мянган төгрөгийн үнэтэй аж.
“Моn couture” нь монгол хувцасны зах зээлд хүчээ үзэж буй эрэгтэй загвар зохион бү­тээг­чийн брэнд гэдгээрээ онцлогтой. Монгол хатдын сүрдэм хувцасны өнгө донжийг хад­галсан тэдний бүтээлийн хээ угалз, зураг, чимэглэл бүр дахин давтагдашгүй гэдгээрээ онцлогтой. Хүр хорхойн торгоос эхлээд олон төрлийн сонголттой бөгөөд 300 мянгаас 3.5 сая төгрөгийн үнэтэй аж. 
Бүсгүйчүүдийн хүчирхэг дайчин зан чанар, энхрий ялдам дүр төрхийг өнгөний хослол, өвөр­мөц хийц загвараар илэрхийлдэг гэлцдэг “Өв” брэндийнхэн өнөө жилийн Цагаан сарын баярт зориулсан коллекцоо саяхан танил­цуул­сан билээ. Тус коллекцод энгийн монгол цамц, тэрлэг дээл, хантаазнаас эхлээд үндэсний хэв загварыг хадгалсан оффис хослол, юбка ч бий. Хамгийн хямд бүтээгдэхүүн нь 64 мянган төг­рөгийн үнэтэй хантааз. Харин хамгийн үнэ­тэй нь 3.8 сая төгрөгийн өртөгтэй, хурган до­тор­той дээл аж.

У.Сүрэн