“Хан-Монгол” морьт харвааны клубийн сургалтын төвд дэлхийн нүүдэлчдийн их наадамд оролцох тамирчдыг сонгон шалгаруулах сорилго тэмцээн зохион байгууллаа. Уг тэмцээн нь морьт харвааны ази төрөл, турк харваа, цамхаг харваа, зоос намнаа гэсэн төрлөөр болсон юм. Олон харваач оролцож, өрсөлдөөн ихтэй болсон дээрх тэмцээнд дөрвөн төрлийн нийлбэр дүнгээр “Намнаа” академийн харваач Н.Алтанхуяг түрүүлж, шилдгээр тодров. Түүнтэй аваргын төлөө өрсөлдсөн М.Жавхлантөгс (“Хан-Монгол”) удаалж, Б.Аягаа (“Зэв”) III, Ц.Түвшинбаатар (“Хан-Монгол” клуб) IV байрт шалгарсан. Ингэснээр тэд Казахстаны Астана хотод ирэх есдүгээр сарын 8-12-нд болох дээрх наадамд улсаа төлөөлж оролцох батламж гардлаа.
