Жуулчдын 47 хувь нь эко, адал явдалт аяллаар иржээ 

Аялал жуулчлалыг дэмжих зорилгоор “Мон­голд зочлох жил” санаачилгын хүрээнд хоёр дахь жилдээ зохион байгуулж буй “Ая­лал жуулчлалын долоо хоног” нэгдсэн арга хэм­жээний нээлт өчиг­дөр боллоо. “Бүсчилсэн хөг­жил ба аялал жуулч­лал” сэдэвт энэ удаагийн үйл ажиллагаанд 400 га­руй аж ахуйн нэгжийн тө­лөөлөл 600-гаад хүн орол­цож байгааг Аялал жуулч­лалын мэргэжлийн хол­бооноос мэ­дээл­сэн юм. 
Олон улсад жуулчлагчийн тоо 2030 он гэ­хэд хоёр тэрбумыг давж, аялал жуулчлалын дотоодын нийт бүтээгдэхүүний өсөлт үүний дараагийн 10 жилд  дэлхийн эдийн засгийн өсөлтийн дунджаас хоёр дахин давах тооцоо судалгааг гаргажээ. Тод­руулбал, эко аялал жуулчлалын орлого 2034 онд 945 тэрбум ам.долларт хүрч 14 хувиар, адал явдалт аяллынх 2032 оны үед 1.7 их наяд ам.долларт хүрч 10 хувиар өсөх төлөвтэй гэнэ. Эрүүл амьдралын хэв маягийг сурталчилсан аялал жуулчлалын ор­лого өнгөрсөн онд түүхэндээ анх удаа нэг их наяд ам.доллароос давсан бөгөөд цаашид жил бүр 13 хувиар өсөх тооцоо буй аж. Манай улсад зо­чил­сон жуулчдын 47 хувь нь дэлхийн чиг ханд­лагын дагуу хурдацтай өсөж буй эко, адал явдалт аяллын зорилгоор Монголд ирснийг Аялал жуулч­лалын үндэсний чуулганд оролцогчид онцоллоо. Иймд олон улсын аялал жуулчлалын хөгжлийн чиг хандлага, жуулчдын эрэлт хэрэгцээ, хүсэл со­нир­холд тулгуурласан ши­нэчлэлүүдийг хийж, бү­тээгдэхүүн, үйл­чил­гээгээ хөгжүүлэх шаард­ла­га­тайг дурд­сан юм. 

Манай улс 2030 он гэхэд хоёр сая жуулчин хүлээж авах зорилт тавьсан. Мөн нэг жуулчны Монголд зарцуулдаг мөнгөн дүн (дундаж нь 2000 ам.доллар)-г хоёр дахин нэмэгдүүлж, салбарын ор­логыг найман тэрбум ам.долларт хүргэх зорилт дэвшүүлээд буй. Үүнийг хэрэгжүүлэхийн тулд бүсчилсэн хөгжлийг дэмжих, нэгдсэн бод­лого, тө­лөв­лөгөө хэрэгжүүлэх, инновац, дэд бүтцийг сайж­руулах, хөрөнгө оруулалтыг оновч­той чиг­лүү­лэх шаардлагатайг салбарын мэр­гэжилт­нүүд хэлэв.

Ж.Сувд