НИТХ-ын дарга Ц.Сандуй, нийслэлийн Засаг даргын Дэд бүтэц, гэр хорооллын хөгжлийн асуудал хариуцсан орлогч П.Баярхүү, Улаанбаатар хотын ерөнхий менежер Т.Гантөмөр болон бусад холбогдох албаныхан Сөүлийн гудамжийг “Шөнийн гэрэлт гудамж” болгох тохижилтын ажилтай танилцав.
Нийслэлийн Хот төлөвлөлт, ерөнхий төлөвлөгөөний газрын боловсруулсан зургийн дагуу 440 метр урт газрын сул шороон хөрс бүхий талбайг хатуу хучилттай болгож явган замыг нэмэгдүүлэх, олон нийтэд зориулсан үзвэрийн дэлгэц, амралтын суудал бий болгох, ногоон байгууламжийн нөхөн сэргээлт, сэлгэлт, авто зам болон явган замын гэрэлтүүлэг, гэрлэн чимэглэл зэрэг орчны тохижилтын ажлыг хийж байна.
НИТХ-ын дарга Ц.Сандуй “Өнөөдөр НИТХ-ын төлөөлөгчид Улаанбаатар хотын хаврын тохижилт, ногоон байгууламжийн ажилтай танилцаад явж байна. Тухайлбал, Эскадрилийн хөшөөнөөс Сүлжмэлийн үйлдвэр хүртэлх 13.6 км авто замын хоёр талаар хийгдэж буй ногоон байгууламж орчны тохижилтын ажилтай танилцлаа. Мөн нийслэлийн томоохон эмнэлгүүдийн гаднах талбайн тохижилт, ногоон байгууламж, авто зогсоол зэрэг ажлын явцтай танилцлаа. Хамгийн сүүлд бид Сөүлийн гудамж буюу “Шөнийн гэрэлт гудамж” төслийн үйл ажиллагаатай танилцахаар ирээд байна.
НИТХ тохижилтын ажилд эдийн засгийн нөхцөл байдал хүнд байгаа хэдий ч иргэдийн тав тухтай орчныг бүрдүүлэх зорилгоор нэлээн зоиргтой алхамуудыг төсвийн тодотголоор хийлээ. Удахгүй болох улсын баяр наадмаас өмнө эдгээр тохижилтын ажил бүрэн дуусах юм. Бидний төлөвлөсөн ажлын 80 гаруй хувь нь хийгдээд явж байна. Наадам гэхэд бүрэн дуусах боломжтой байна. Томоохон хотуудад Шөнийн гудамж гэж байдаг. Түүнтэй адил залуучуудын зүгээс Улаанбаатар хотод Шөнийн гудамж байх ёстой гэсэн үүднээс тус гудамжийг тохижуулж байна” хэмээсэн юм.
