ХНХЯ-наас Нийгмийн даатгалын багц хуулийн төслийг УИХ-д өргөн барьсан. Тодорхой хэлбэл, Нийгмийн даатгалын ерөнхий хуулийн шинэчилсэн найруулга, Нийгмийн даатгалын сангаас олгох тэтгэврийн тухай хуулийн шинэчилсэн найруулга, Нийгмийн даатгалын сангаас олгох үйлдвэрлэлийн осол, мэргэжлээс шалтгаалсан өвчний тэтгэвэр, тэтгэмж, төлбөрийн тухай хуулийн шинэчилсэн найруулга, Нийгмийн даатгалын сангаас олгох тэтгэмжийн тухай хуулийн шинэчилсэн найруулга, Хувийн нэмэлт тэтгэврийн тухай хуулийг шинэчилсэн найруулсан. УИХ-аас хаврын чуулганы хугацаанд 200 гаруй хуувь, 65 тогтоол баталсны нэг нь дээрх Нийгмийн даатгалын багц хуулийн төсөл байв.
УИХ-ын гишүүн П.Анужин хууль баталсны дараа "30 гаруй жилийн дараа багцаараа шинэчлэн найруулсан энэ хуулийн гол онцлог нь хувиарлалтын тогтолцооноос хуримтлалын тогтолцоо руу шилжсэн хамгийн том өөрчлөлт гэж хэлж болно. Бид энэ хуулиа 2044 он гэхэд бүрэн энэ тогтолцоо руу шилжиж, хууль хэрэгжиж эхэлснээс хойш хагас хуримтлалын тогтолцооны үе шаттайгаар шилжинэ. Мөн инфляцтай уялдуулж тэтгэврийг жил бүр өсөн нэмэгдүүлэхийг хуульчилсан. Мөн тухайн үед гарч байсан цалингийн системийг одоогийнходо хүргэж бодох итгэлцүүрийг жил бүр шинэчилнэ гэсэн чухал заалт оруулсан. Түүнээс гадна 20 жилээс дээш жил хамтран амьдарсан хоёр хүний нэг нь өөд болсон тохиолдолд нөгөөд нь 20 хувийг өгнө гэсэн зохицуулалт орж ирсэн" хэмээсэн юм.
Тэгвэл энэхүү багц хуулийн төсөлд дараах шинэлэг зохицуулалт, онцлох заалтуудыг тусгажээ.
-Тэтгэвэр бодох дараалсан 7 жилийг 5 жил болгон бууруулахаар хуулийн төсөлд тусгасан.
-Олон давхаргат тэтгэврийн тогтолцоонд шилжинэ. Олон эх үүсвэрээс тэтгэвэр авах боломж бүрдэнэ,
-Тогтолцооны буюу системийн өөрчлөлт хийхийн тулд хуваарилалтаас аажмаар хуримтлалд шилжинэ,
-Нийгмийн даатгалын шимтгэлийг нэмэхгүй,
-Тэтгэврийн зөрүүг арилгана,
-Жил бүр ахмадын тэтгэвэр инфляцын түвшинтэй уялдан автоматаар нэмэгддэг болно,
-Тэтгэвэр бодох дараалсан 7 жилийг 5 жил болгон бууруулна,
-Хувийн нэмэлт тэтгэврийг хүлээн зөвшөөрнө. Хувийн нэмэлт тэтгэврийн дансандаа хуримтлуулсан мөнгөнөөсөө урьдчилан авч боловсрол, эрүүл мэнд, орон сууцны урьдчилгаандаа зарцуулах боломж нээгдэнэ,
-Албан журмаар болон сайн дураар даатгуулагчийн нийт шимтгэлээс 2 хувийг хуримтлалд шилжүүлнэ. Тэтгэврийн нөөц сан бүрдүүлж хуримтлалд шилжих эхлэлийг тавина,
-Даатгуулагчийн нэрийн дансыг мөнгөжүүлнэ, Мөнгөжүүлсэн тохиолдолд өвлөгдөнө. Мөнгөжүүлсэн орлогоо боловсрол, эрүүл мэнд, орон сууцандаа зарцуулах нөхцлийг бүрдүүлнэ,
-Хамрагдалтыг нэмэгдүүлнэ. Малчдын тэтгэврийн даатгалын шимтгэлийн 5 жилийн 50 хувийг улсаас хариуцан төлнө. Бусад хугацааг малчид өөрсдөө хариуцна,
-Даатгуулагчийн шимтгэл төлөх, тэтгэвэр тогтоолгох, хөдөлмөрийн хөлс түүнтэй адилтгах орлогын өнөөгийн үнэ цэнийг тодорхойлох зорилгоор итгэлцүүр хэрэглэнэ. Тэтгэврийн зөрүү үүсгэхгүй байх эрх зүйн орчинг бүрдүүлнэ.
-Нийгмийн даатгалын санхүүгийн найдвартай байдлыг бий болгож, нийгмийн даатгалын сангийн бие даасан байдлыг хангана. Сангийн мөнгийг найдвартай санхүүгийн хэрэгсэлд оруулна.
-Нийгмийн даатгалын засаглал, менежментийг олон улсын жишигт нийцүүлэв,
-Ихэр хүүхэд төрүүлсэн эхийн амаржсаны тэтгэмжийн хэмжээг нэмэгдүүлнэ,
-Жирэмсний болон амаржсаны тэтгэмж бодох хугацаанд нийтээр тэмдэглэх баярын өдөр тохиосон бол уг өдрийг ажлын өдөртэй адилтган тогтоодог болно. Ингэснээр даатгуулагчийн авах тэтгэмжийн хэмжээ нэмэгдэнэ,
-Эрхтэн шилжүүлэх мэс засал хийлгэсэн, эрхтний донор болсон даатгуулагчид хөдөлмөрийн чадвар түр алдсаны тэтгэмж олгодог болно. Тэтгэмж олгох хугацаа 66 хоног байсныг 132 болгох зохицуулалтыг оруулав,
-Хүнд хэлбэрийн хөгжлийн бэрхшээлтэй хүүхэдтэй эх, эцгийн тэтгэврийн даатгалын шимтгэлийг төрөөс бүрэн хариуцна,
-Төлсөн шимтгэлтэйгээ уялдаатай тэтгэвэр авах шударга зохицуулалтуудыг санал болгов,
-Тэтгэвэр, тэтгэмжийн хэмжээ хүрсэн түвшнээсээ буурахгүй, нэмэгддэг байх зохицуулалтуудыг оруулав,
-Хөдөлмөрийн чадвар алдалтыг нөхөн сэргээх, эмчлэх, даатгуулагчийг хөдөлмөр эрхлэх боломжийг нэмэгдүүлэхийн тулд даатгал дэргэдээ эмнэлэгтэй болно,
-Үйлдвэрлэлийн ослын улмаас учирсан хохирлыг арилгах, хэвийн үйл ажиллагааг сэргээх зорилгоор сул зогссон хугацаанд ҮОМШӨ-ний даатгалын шимтгэлийг чөлөөлдөг болно,
-ҮОМШӨ даатгалыг эрсдэлтэй гэж үзсэн салбаруудаас бүхэлд нь өндөр хувиар авдаг байсныг болиулан зөвхөн эрсдэлтэй ажлын байруудаас өндөр авч, бусад энгийн ажил мэргэжлээр багаар авдаг болох зохицуулалтыг оруулсан,
-Нийгмийн даатгалын нөхөн төлөлтийг дахиж хэрэгжүүлэхгүй байх зохицуулалтыг тусгав,
-Нийгмийн даатгалын харилцааг олон салбарын хуулиар биш ганцхан нийгмийн даатгалын хуулиар зохицуулна,
-Нийгмийн даатгалын бүх үйлчилгээг цахим болгох олон шинэлэг зохицуулалтыг тусгасан хэмээн ХНХЯ-наас мэдээлсэн.
Гэвч уг хуулийн эцсийн хувилбарыг одоо болтол нийтэд дэлгээгүй байна
