Мета компанийн төв Ази, Хятад, Монгол Улсын олон нийтийн бодлого хариуцсан захирал Жорж Чен Олон нийтийн сүлжээнд хүний эрхийг хамгаалах тухай хуулийн талаарх байр сууриа өөрийн твиттер хаягтаа бичсэн. Үүндээ Хууль зүй, дотоод хэргийн сайд Х.Нямбаатарыг ч хавчуулаад амжсан. Тодорхой хэлбэл, Жорж Чен жиргээ бичиж, үүний доор нэгэн иргэн "Хууль зүй, дотоод хэргийн сайд төслийг боловсруулахдаа Мета компанийн Мэдээллийн аюулгүй байдлыг хангах багтай хамтран ажилласан гэж хэлсэн шүү дээ" гэсэн юм. Үүнд Жорж Чен хариулахдаа "Тийм биш. Парламент яарч батлахаас өмнө бид хуулийн төсөл эсвэл хуулбарыг нь огт аваагүй. Хууль болоод батлагдсаных нь дараа л анх удаагаа харсан" гэсэн байв.
Үүнтэй холбоотойгоор сайд Х.Нямбаатар өнөөдөр мэдээлэл, тайлбар өглөө. Тэрбээр "Мета платформс компанийн Төв Ази, Монгол, Хятадыг хариуцсан захирал ноён Жорж Чентэй хийсэн уулзалтын үеэр ярилцаж хэлэлцсэн асуудлууд албан хэрэг хөтлөлтийн протоколоор нотлогдоно. Жорж Ченийг ажлаас нь халж өгөөч гэдэг албан бичгийг Фэйсбүүк компани руу ирэх даваа гарагт явуулна. Надтай уулзсан, уулзахдаа хуулийн орчуулгаа өгсөн. Хамтарч ажиллая гээд арваннэгдүгээр сард хуулийн болон техникийн ажлын хэсгээ ирүүлнэ гэсэн. Гэнэт "It is not true" гээд хамгийн худалч хүн гэж намайг хэлж байх шиг байна билээ.
Уулзсан ярианых нь протокол хоёр цаг 30 минутын аудио бичлэг бий. Айхавтар, айхавтар зүйл ярьсан. Энэ бол хувь хүндээ биш. Туурга тусгаар улсын төрийн яамыг олон нийтийн мэдээллийн хэрэгслээр гарч ирээд илтэд гүтгэж дайрах нь байж болохгүй зүйл. Хоёрдугаарт, Мета компани улс орны дотоод хэрэгт оролцох ёсгүй. Гэтэл оролцохын дээдээр оролцлоо. Манай улсын төрийн зарим албан хаагч руу дарамталсан мэйл явуулсан, манай улсыг хоригт оруулна гэсэн. АНУ-ын зүгээс шахалт, дарамт үзүүлнэ гэдэг мэйл явуулсан.
Иймд Мета руу Жорж Чен гэдэг хүнийг ажлаас нь хал, хоёрдугаарт надаас уучлалт гуй гэдэг бичгийг явуулна. Надтай уулзсан ярианых нь бичлэгийг хавсаргана. Хэрэв уучлалт гуйхгүй бол би шүүхэд хандана" гэв.
