Хүүхэд, залуусын хүсэн хүлээдэг, сагсан бөмбөгийн “Sprite quest 3x3” тэмцээнийг энэ сарын 19-21-нд зохион байгуулахаар болжээ. Тэмцээний насанд хүрэгчдийн ангиллынхан дүүргүүдээр хуваагдан, таван өдөр өрсөлдөж шилдгүүдээ шалгаруулах юм. Дүүрэг бүрээс шалгарсан шилдэг хоёр багийнхан хагас шигшээд өрсөлдөх эрх авах нь. Тус тэмцээний ялагч багийнхан Филиппиний Себү хотод зохион байгуулах сагсан бөмбөгийн 3х3 төрлийн дэлхийн “Их дуулга” тэмцээнд өрсөлдөх эрх өвөртлөх юм. Ташрамд дуулгахад, ирэх амралтын өдрүүдээр сагсан бөмбөгийн 3х3 төрлийн энэ улирлын ээлжит “World tour Lausanne masters 2022” тэмцээн болно. Дэлхийн чансааны эхний зургаад эрэмбэлэгдэж буй дөрвөн баг үүнд өрсөлдөх аж. Тэдний нэг нь Монголын “Улаанбаатар ММС energy” багийнхан юм.
