Монгол Улсын Засгийн газар, НҮБ-тай хамтран Гамшгийн эрсдэлийг бууруулах Азийн сайд нарын Бага хурлыг ирэх оны долоодугаар сард Улаанбаатар хотноо зохион байгуулахаар бэлтгэлээ хангаж байна.
Бага хурлын талаар танилцуулах зөвлөлдөх уулзалт өнөөдөр буюу 2017 оны арваннэгдүгээр сарын 17-ны өдөр Төрийн ордонд болов.
Уулзалтыг Монгол Улсын Шадар сайд, Азийн сайд нарын Бага хурлын дарга Ө.Энхтүвшин нээж үг хэллээ. Тэрээр Гамшгаас хамгаалах тухай хуулийн шинэчилсэн найруулгыг УИХ хэлэлцэн батлахдаа Гамшгийн эрсдэлийг бууруулах Сендайн үйл ажиллагааны хүрээ баримт бичиг, НҮБ-ын Тогтвортой хөгжлийн зорилтууд, Уур амьсгалын өөрчлөлтийн эсрэг Парисын конвенци зэрэгт дэвшүүлсэн зорилтуудыг үндэсний хэмжээнд хэрэгжүүлэх тодорхой заалт оруулсныг онцлон тэмдэглэв.
Энэ хуулийг баталснаар Монгол Улсын Засгийн газар Гамшгийн эрсдэлийг бууруулах чиглэлээр НҮБ-аас баримталж байгаа бодлого, үйл ажиллагааг дэмжин ажиллахаар хүлээсэн үүрэг, амлалтаа эрх зүйнд хүрээнд баталгаажуулсан гэлээ.
“Гамшгаас урьдчилан сэргийлснээр тогтвортой хөгжлийг хамгаалах нь” уриан дор болох Азийн сайд нарын Бага хурал нь:
- Гамшгийн эрсдэлийг бууруулах чиглэлээр бүс нутгийн болон дэлхий нийтийн аюулгүй байдал, амар тайван орших нөхцөлийг бүрдүүлэх, улс орнуудын тогтвортой хөгжлийг хангахад чиглэсэн санал, санаачилгуудыг хэлэлцэх
- Улс орнуудын ололт амжилт, туршлагаас хуваалцах, хамтын ажиллагааг өргөжүүлэх
- Монгол Улсын Засгийн газраас Гамшгийн эрсдэлийг бууруулах чиглэлээр баримталж байгаа бодлого, үйл ажиллагааг таниулах зорилготой юм.
Өнөөдрийн зөвлөлдөх уулзалтад МУЗН, гадаад улс орнуудын Элчин сайдын яам, олон улсын байгууллагын тэргүүн, төлөөлөл оролцож байна.
