Химийн зэвсгийг хориглох тухай конвенцын дагуу ийм зэвсгийн сүүлчийн хэсгээ ОХУ устгасан тухай тус улсын Ерөнхийлөгч Владимир Путин мэдээллээ. Энэ бол түүхэн үйл явдал болохыг тэрбээр тэмдэглээд, ОХУ олон улсад хүлээсэн, тухайлбал, үй олноор хөнөөх зэвсгийг хураах, дэлгэрүүлэхгүй байх үүргээ биелүүлнэ хэмээн амлав.
Үүний сацуу тэрбээр АНУ-ыг зэмлэн буруушаагаад, тус улс хүлээсэн үүргээ биелүүлэхгүй, хөрөнгө мөнгө хүрэлцэхгүй байна хэмээн хугацааг нь гурван удаа хойшлуулсныг онцолжээ. Түүний хэлсэн үгээс үзвэл Умард Солонгосыг пуужингийн болон цөмийн зэвсгийн хөтөлбөрөөсөө татгалзахыг шаардахаасаа өмнө АНУ түрүүлж тийм зэвсэггүй болох ёстой гэнэ.
