Өчигдрөөс илүү маргаашийг
бүтээхийн төлөө

“Time” Ромын пап I Францискийг “Оны хүн”-ээр нэрлэв

Дэлхийн хамгийн олон уншигчтай, нөлөө бүхий сэтгүүл “Time” уламжлал ёсоор энэ оны онцлох хүнээ нэрлэсэн нь Ромын пап I Франциск байлаа. Сүүлийн 1200 жилд цорын ганц удаа европ биш хүн Католик сүмийн папаар сонгогдсон нь аргентин гаралтай Хорхе Марио Бергольо байв. Зүсэн зүйлийн шалтгаанаар дэлхий дахинаа шашны нэр хүнд, байр суурь ганхаж буй энэ үед Католик сүмийн тэргүүн болоод есхөн сар өнгөрөхдөө пап I Франциск зоригтойгоор олон зүйлийг шинэчилж, хүмүүсийн итгэл үнэмшлийг сэргээн, сүмийг тойрсон асуудлыг олон нийтэд зоригтой илчилсэн.

Шоронгийн хоригдлуудын хөлийг угааснаас эхлээд шуугиан тарьсан олон үйл хэргийн ард гарсан түүний тухай “Тэр өнөө цагийн чухал нэгэн дүр болж чадсан. Баян ядуугийн зааг, шударга ёс, ил тод байдал, өнөөгийн ертөнцөд өөрчлөгдөн буй шашны үүрэг, даяарчлал, эмэгтэйчүүдийн нийгэмд эзлэх байр суурь, ижил хүйстнүүдийн эрх гэхчлэн олон асуудалд тэр байр сууриа зоригтой илэрхийлж, өөрийн зүгээс хийж чадах бүхнээ хийж буй” хэмээн тус сэтгүүлийн эрхлэгч Нэнси Гиббс бичжээ. Ингэснээр I Франциск “Time” сэтгүүлийн “Оны хүн”- ээр тодорсон гурав дахь пап болж буй юм. Урьд Ромын пап агсан XXIII Иоанн (1962), II Иоанн Павел (1994) нар ийн тодорч байсан.

Харин НСА-ийн экс ажилтан, Цагаан ордны нууц мэдээллийг олон нийтэд илчилсэн Эдвард Сноуден, АНУ-ын ижил хүйстнүүдийн эрхийг хамгаалан тэмцэгч Эдит Уиндсор, АНУ-ын сенатор Тед Круз, Сирийн Ерөнхийлөгч Башар Аль Ассад нар удаалжээ. Энэ онд “Оны хүн”-ээр Эдвард Сноуден тодрох болов уу хэмээн олон хүн хүлээж байсан ч 2011 онд Жулиан Ассанжийг алгассантай адил үйл явдал боллоо гэж АНУ-ын хэвлэлүүдэд бичсэн байв. “Ариун эцэг элдэв шагнал, нэр алдрын хойноос ер хөөцөлддөггүй. Гэхдээ “Оны хүн”-ээр тодорсон нь Бурханы хайрыг олон нийтэд түгээх үйлсэд дэм болох аваас тэр үүнд хазгаарг үй баяртай байх болно” хэмээн Ватиканы хэвлэлийн төлөөлөгч Федерико Ломбарди ярьжээ.


Т.ЖИГҮҮР

0
Зөв, гоёЗөв, гоё
0
Савж уналааСавж уналаа
0
Хөөрхөн юмХөөрхөн юм
0
ГайхмаарГайхмаар
0
БурууБуруу
0
ХарамсалтайХарамсалтай
0
ТэнэглэлТэнэглэл
Баярлалаа!

0 Сэтгэгдэл

Leave a Reply

Та сэтгэгдэл бичихдээ Монгол Улсын хууль болон ёс суртахууны хэм хэмжээг баримтална уу. Ёс бус сэтгэгдлийг админ устгах эрхтэй.