Өчигдрөөс илүү маргаашийг
бүтээхийн төлөө

Х.Баттулга: Хуульчдадаа хөндлөнгийн нөлөөгүйгээр мэргэжлийн үйл ажиллагаа явуулах нөхцөлийг бүрдүүлнэ

Монгол Улсын Ерөнхийлөгч Х.Баттулга Монголын хуульчдын холбооны гуравдугаар их хуралд оролцогчдод илгээлт явууллаа.

Монгол Улсын Ерөнхийлөгчийн илгээлтэд :

Монголын нийт хуульчдад болон энэ хуралд төлөөлөгчөөр сонгогдсон эрхэм хуульчид, шүүгч, прокурор, өмгөөлөгч Та бүхэнд амжилт хүсэн мэндчилье.

Монголын хуульчдыг үнэт зүйлээр нь нэгтгэн, хөгжиж буй улсад тохирсон онцлог бүхий мэргэжлийн өөрөө удирдах ёсны байгууллагыг хуулиар байгуулсан нь хууль зүйн салбарт томоохон дэвшил болсон бөгөөд өнөөдөр та бүхэн гурав дахь удаагаа хуран чуулж байна.

Нийгмийн эмч, шударга ёсны элчийн эрхэм үүргийг хүлээдэг хуульчид та бүхэн аливаа нөлөөнд автдаггүй, чигч шударга байх нь нэн чухал. Энэ үүднээс Монголын төр хуульчдадаа хамгийн түрүүнд итгэж ёс зүй, хариуцлага, ур чадвар, хөгжил дэвшлийн асуудлаа бие даан шийдвэрлэж хараат бусаар орших онцгой эрхийг олгосон юм.

Өнөөдөр нийгэмд шударга ёс алдагдаж, хуулийн засаглал хүчгүйдэж байна. Энэ гажуудлыг засаж шударга ёсыг сахиулан хуулийн засаглалыг тогтооход шүүгч, прокурор, өмгөөлөгч, хуульчид та бүхэн гол хүч, тулах багана нь болох учиртай. Тиймээс хуульчид шударга ёсны элчийн үүргээ нэр төртэйгөөр биелүүлэн, олон нийтийн итгэл, найдварыг хөсөрдүүлэхгүйгээр үнэнч шударга, хариуцлагатай, зоримог, санаачилгатай байж, зарчимч байдлаараа нийгэмд манлайлах хэрэгтэй.

Шударга ёсыг тогтоох, хуулийн засаглалыг төлөвшүүлэн бэхжүүлэх, авлига болоод түүнийг цэцэглүүлэн хөгжүүлж ард түмний эрхийг зөрчдөг бүлэглэлтэй тэмцэх нь амар хялбар ажил биш, та бүхний эрхэм зорилго, Монгол Улсын Ерөнхийлөгчийн зорилго хоёр нэг юм. 

Монголын Хуульчдын холбоо бол жирийн нэг төрийн бус байгууллага биш бөгөөд төрийн зарим чиг үүргийг хуулиар шилжүүлэн авсан, “Хууль тогтоох үйл ажиллагаанд мэргэжлийн шинжээчийн туслалцаа үзүүлэх, хууль зүйн бодлогын асуудлаарх хуульчдын байр суурийг Улсын Их Хурал болон Засгийн газарт хүргэх, хууль зүйн шинжлэх ухааны хөгжлийг дэмжих, ухамсар ёс зүйтэй, мэдлэг чадвар бүхий хуульчдыг бэлтгэх, хуульчдаа чанаржуулах” зэрэг өргөн хүрээний эрх, үүргийг хэрэгжүүлдэг байгууллага.

Тиймээс хуулиар хүлээсэн үүргээ хариуцлагатай биелүүлж, нэр хүнд нийгэмд хүлээн зөвшөөрөгдөх байдлаа бататган, дараа дараагийн мэргэжлийн өөрөө удирдах ёсны байгууллага, холбоодод үлгэр дуурайл болох эрхэм үүрэг бас та бүхэнд ногдож байна.

Монгол Улсын Ерөнхийлөгчийн хувьд миний бие хуульчдадаа хөндлөнгийн нөлөөгүйгээр мэргэжлийн үйл ажиллагаа явуулах боломж, нөхцөлийг бүрдүүлэн өгөхийг онцгойлон анхаарч, шүүхийн хараат бус, бие даасан байдлыг хангах, шүүгчийн сонгон шалгаруулалтад мэргэжлийн ур чадвар, туршлагаас гадна хувь хүний ёс зүйн шаардлагыг шалгуур болгодог эрх зүйн орчинг бүрдүүлэх, Монгол Улсад эрх зүйн шинэчлэлийг гүнзгийрүүлэхийн төлөө та бүхэнтэй хамтран ажиллах болно.

Монголын Хуульчдын холбооны их хурлын үйл ажиллагаанд амжилт хүсье.

0
Зөв, гоёЗөв, гоё
0
Савж уналааСавж уналаа
0
Хөөрхөн юмХөөрхөн юм
0
ГайхмаарГайхмаар
0
БурууБуруу
0
ХарамсалтайХарамсалтай
0
ТэнэглэлТэнэглэл
Баярлалаа!

1 Сэтгэгдэл

Leave a Reply

Та сэтгэгдэл бичихдээ Монгол Улсын хууль болон ёс суртахууны хэм хэмжээг баримтална уу. Ёс бус сэтгэгдлийг админ устгах эрхтэй.

1 thought on “Х.Баттулга: Хуульчдадаа хөндлөнгийн нөлөөгүйгээр мэргэжлийн үйл ажиллагаа явуулах нөхцөлийг бүрдүүлнэ

  • Зочин says:

    Монголын шүүх бол хулгайч луйварчдын орон болсон. Батгалгаатай мэдээллээр Дээд шүүхийн иргэний танхимын тэргүүн Сонинбаяр, хуучин тэргүүн Амарсайхан нар олон жил хоршиж луйварчидтай хамтарч ажиллан ах дүү, танил тал муутай ядарсан хөгшид, өрх толгойлсон олон эмэгтэйчүүд, харах хандах хүнгүй олон хүнийг өмч хөрөнгө, байр оронг нь дээрэмдэж авсан. Эдгээр шүүгчид авилгалыг тохирдог, дамжуулдаг, золиос болгох талыг судлах гэх мэт иж бүрэн ажиллагаа явуулдаг сүлжээтэй. Дээд шүүхийн иргэний танхимын бусад шүүгчдээ бүрэн нөлөөндөө авч хүссэн шийдвэрээ гаргадаг. Ерөнхийлөгч өө. Энэ дээрэмчдийг цэвэрлэж дээд шүүхийг цэвэрлэч өгөөчээ…