Өчигдөрөөс илүү маргаашийг
бүтээхийн төлөө

Рене Зеллвегер: Би “ХЯМДХАН ЗАГАС” байхыг хүсэхгүй

Рене нууцаа дэлгэж байна. Сонирхолтой нь түүнд хэрэгт дуртай олны урт чих, хурц хараанаас нууж чадсан зүйл цөөнгүй бий гэнэ. “Оскар”-ын шагналт жүжигчин тэрбээр “Glamour” сэтгүүлийн сурвалжлагчид амьдралыг нь орвонгоор нь өөрчилсөн үдшийн тухай сонирхуулж, амьдралынхаа сонирхолтой баримтуудыг дэлгэн, хайр дурлалынхаа нандин нууцыг хуваалцсанаар барахгүй уйтгарлахдаа л аз жаргалын амтыг мэдэрдэг хачирхалтай зангийнхаа тухай хуучилжээ.

Сэтгэл татам гэдэг ойлголт орчин үед хэрхэн өөрчлөгдсөнийг мэдмээр байна уу? Шинэ зууны бүсгүйчүүдийн сэтгэл татам эсэхийг сонжихын тулд Ренетэй харьцуулахад л хангалттай гэж хэлж болно. Түүнийг дээд зиндааныхны бэлгэдэл болсон нэртэй загвар зохион бүтээгчдийн хувцсаар гоёж, улаан хивснээ бардам алхдаг болохоор нь ийн дүгнэж байгаа юм биш шүү.

Дэгжин хувцасны цаана нуугдсан хувь хүн нь гайхалтай учраас магтаж байгаа юм. Тэр номын хорхойтон, сайн жүжигчин. Гадаад байдал нь эрчүүдийн хараа булаахаас гадна дотоод ертөнц нь гэрэлтдэг эл бүсгүй Техаст мэндэлсэн. Өдгөө 40 настай тэрбээр кино урлагаас хэсэгхэн зуур хөндийрөөд байгаа энэ үедээ л өөрийгөө шинээр нээсэн хэмээн сонирхуулж байлаа.

Тэрбээр одоо Нью-Йорк дахь гэртээ тухлан хуучны дурсамжуудаа нэг бүрчлэн онгичиж, дурдатгал номоо бичиж суугаа. Энэ тухайгаа тэрбээр “Би тун уйтгартай ажил хийж байгаа шүү. Уйтгартайгаас гадна хэр баргийн хүн хийчихээргүй хүнд хэцүү. Гэхдээ тархиныхаа чадварыг шалгахын тулд дахиад цөөнгүй сар суухаас аргагүй байна” гэсэн юм. Өнгөрсөн таван жилийн хугацаанд тэр найман кинонд тоглож, хоёр удаа Академийн шагналд нэр дэвшин, нэгийг нь авчихаад байна.

Түүнчлэн кантри дуучин Кенни Чеснитэй дөрвөн сар амьдарсны эцэст хоёр тийш болж, саяхнаас “NBC” телевизийн мэдээллийн албаны дарга Дан Абрамстай дотноссон. Нью-Йорк дахь нэгэн сүшиний газар хооллох зуураа тэр өөрийн амьдрал дахь өөрчлөлт, сэтгэл татам дотоод ертөнцийнхөө нууцыг харамгүй хуваалцлаа.

-Хамгийн сүүлд бид уулзахад та “Битлз”-ийнхний зурагтай богино ханцуйтай цамц өмссөн байсан. Бас үс тань бор өнгөтэй байсныг тод санаж байна. Олон талын авьяас тань таны сэтгэл татам чанарын нэг гэж бодогддог юм. Харин та хэнийг сэтгэл татам, гайхалтай хүн гэж дүгнэж, түүнээс үлгэр дуурайл аван, өнөөдрийн Ренег “бүтээсэн” бэ?

-Би бүр багаасаа л Диане Сойерийг шүтдэг байлаа. Түүний дэгжин байдал нь намайг үүрээр босож киног нь үзэхэд хүргэдэг байв. Мөн Хиллари Клинтон намайг бишрүүлдэг. Бүсгүйчүүдэд үе чацуутныхаа сайн сайх ныг тэр бүр олж хар даггүй дутагдал бий. Харин бүсгүйчүүдийн энэ өөдгүй чанарыг давж, үеийнхэндээ шагшигдсан хүн бол Хиллари. Түүний төрийн эрх барих ажилд оролцож байгаа нь бахархах сэтгэгдэл төрүүлдэг. Бас хувь хүнийхээ хувьд ч элгэмсүү, найрсаг, хөгжилтэй. Энд Мишель Обамагийн талаар дурдахгүй өнгөрөх арга гүй. Эрсэн ч өө олддоггүй гайхал тай эмэгтэйчүүдийн нэг бол Мишель. Түүнийг америк бүсгүйчүүд, эмэгтэйчүүдийн нүүр царай болсонд би их баяртай байдаг.

-Тэр америк эмэгтэйч үүдийн ямар хүчирхэг, дайчин болохыг харуулж байгаа та лаар ярихын ч хэрэг гүй байх. Тийм үү?

-Тийм шүү.

-Сүүлийн үед улс төрийн яриа ихэвчлэн эдийн засгийн тогтворгүй байдал руу халтирах болжээ. Би ч бас энэ тухай танаас лавламаар байна. Эдийн засгийн хямрал танд нөлөөлсөн үү. Та ер нь хэр хямгач хүн бэ?

-Миний сонгосон ажил хувцас, гоо сайхандаа багагүй мөнгө зарцуулахыг шаарддаг онцлогтой. Гэхдээ үүнээс өмнө харьцангуй зарлага багатай ажил хийдэг байсан тул харсан болгоноо худалдаж авахыг чухалчилдаггүй. Харин сайн дарс, сушинд дуртай. Тэднийг хямдхан биш гэдгийг та мэдэх байлгүй дээ. Хэдийгээр дуртай зүйлсээ хэрэглэхийн тулд багагүй мөнгө зарцуулдаг ч би “хямдхан загас” болохыг хүсэхгүй байна. (инээв)

-Жүжигчин болсноор таны нийгмийн байдал эрс сайжирсан уу?

-Үгүй дээ. Хэдийгээр аав, ээж хоёр минь цагаач байсан боловч бидний амьдрал тийм ч тарчиг хомс байгаагүй. Аав минь гэр бүлийнхнийгээ тэжээх гэж цаг наргүй хөдөлмөрлөдөг байсан тул бид идэж уух, өмсөх зүүхээр гачигддаггүй байсан. Бусдаас санхүүгийн туслалцаа хүсэж байсан удаа надад байхгүй. Түүнчлэн би дэлгүүр хэсэх зуршилтай охидтой адилгүй. Хэрэглээ багатай. 16 нас хүрчихээд машинтай болох гэж яараагүй. Учир нь би чинь Техасын охин шүү дээ. Өөрийн чадлаар олсон мөнгөөр хэрэгцээгээ хангах нь миний баримталдаг гол зарчим.

Тэгэхээр та их эрт бие даасан байх нь. Та дур булаам, өөртөө итгэлтэй харагддаг. Ажлаасаа хөндийр сөн ч энэ байдлаа хадгалсаар л байгаа юу?

-Бие хамгаалагчгүй болчихсон болохоор их тамирдаж байна шүү. (инээв) Одоо хийж буй ажил маань таалагдаж байгаа. Тиймээс өөрчлөгдөөгүй гэж бодож байна.

-Өөрчлөгдсөн зүйл бий юү?

-Байгаа. Цаг зав багагүй гардаг тул өөрийнхөө зорилгыг ухамсарлаж, цааш юу хийх ёстойгоо нарийн төлөвлөн зохион байгуулж амжих юм.

-Хурдан хэмнэлтэй амьдралаас нам гүм тайван байдалд шилжих уйтгартай байна уу?

-Хүмүүс миний тухай цоо шинэ зүйл олж мэдэж, тэр мэдээлэлдээ итгэж ядан гайхаж байгаа нь надад тун сайхан санагддаг. Өөрөөр хэлбэл амьдралд минь баяр баясгалан нэмдэг хамгийн сайхан зүйл бол хувийн амьдрал, Ренегийн тухай мэдээлэл нууц байх явдал. Энэ нөхцөлийг нам гүм амьдрал л бүрдүүлж байгаа тул огт уйдахгүй байна.

-Тэгэхээр та хэнтэй болзож б а й г а а г а а хэлэхгүй нь ээ?

Хэлэхгүй ээ. Энэ ту хай ярих нь тэнэг хэрэг шүү дээ. Хувийн амьд ралын талаарх яриа зөвхөн уншигчдад л сайхан санагддаг байх. Тиймээс хэвлэл мэдээллийнхэнд ярилцлага өгч байгаа хүн бүрийг энэ сэдвээс хол байхыг уриалж байна. (инээв) Ингэх нь нуруун дээрх хариуцлага гэсэн том ачаанаас бага ч атугай хөнгөлдөг юм.

-Та нэгэнтээ “Залуу, үзэсгэ лэнтэй, амжилтад хүрсэн, ганц бие бүсгүйчүүдийг аз жаргалтай байж чаддаггүй” гэж хэлсэн. Таныг харахад тиймгүй л санагдах юм.

-Мэдэхгүй юм даа. Иргэдийн энгийн бус хүсэлтэй л энэ бүхэн холбоотой болов уу. Бусдын хүндлэлийг хүлээхүйц амжилт гаргасан бүсгүй яагаад хэн нэгнийг хайрлаж, сэтгэлдээ тээж болохгүй гэж. Олонх хүн түүнийг үргэлж ганц бие яваасай гэж хүсдэг.

-Хэрэв зөв бодолтой, сайн залуу тантай учирвал ганц бие эмэгтэйн амьдралаа орхих уу?

-Тэгэлгүй яах вэ. Гэхдээ зөвхөн одоо байгаагаас дээр болсон нөхцөлд л гэрлэх шийдвэр гаргана. Учир нь би одоо ч жаргалтай, хөгжилтэй амьдарч байгаа.

-Танд ямар залуус таалагддаг вэ?

-Ухаалаг, нууцлаг, бас хэзээ ч уйдамгүй сонирхолтой байдал намайг өөрийн эрхгүй татдаг. Гэхдээ заавал романтик байна гэсэн үг биш. Мэдлэг чадвар, сайн сайхан, инээд хөөр, хөгжилтэй байдлыг эрхэмлэгчидтэй дотносож, тэднээс аль болох ихийг суралцахыг би хүсдэг.

Залуу жүжигчид хайр дурлалын харилцааныхаа тухай их нээлттэй ярьдаг болжээ. Та бүх нууцаа зөвхөн өөртөө л хадгалахад хэрхэн суралцсан юм бэ?

-Энэ бол тухайн хүний өсөж, хүмүүжсэн орчинтой л холбоотой байх.

-Та “Twitter” ашигладаг уу?

-Өдөржин компьютерийн ард сууж өөрийнхөө бодол санааг дэлхийн сая сая хүнд дэлгэхээс илүү аймшигтай зүйл байхгүй гэж боддог юм.

-Ажлын тухай яриандаа эргээд оръё. Та хэр удаан хугацааны амралт аваад байгаа вэ. Ном бичих ажил тань дуусах болоогүй юу?

-Болоогүй ээ. Би бусдын хувцсыг өөрийн шүүгээндээ хадгалахыг хүсдэггүй. Тиймээс өөр зүйлд сатааралгүй энэ ажлаа өөрийн гараар бүрэн гүйцэд хийхийг ойрын зорилгоо болгоод байна.

-Зохиол бичиж байгаа гол зорилго тань юу вэ?

-Би суралцахыг хүссэн юм. Мэдлэгээ дээшлүүлж, салбар бүрийн талаар суурь мэдлэгтэй болохыг хүсдэг. Би их сониуч хүн. Гэхдээ сонирхож байгаа зүйлсээ судлах хангалттай зав олддоггүй тул кино урлагаас хэсэг хугацаанд хөндийрөхөөр шийдсэн.

-Таныг холын зайн гүйлтэд сайн гэж сонссон. Энэ авьяасаа дэлгэцнээ гаргаж амжсан уу?

-Гүйх нь миний чаддаг зүйлсийн нэг болохоос сонирхол биш. Би дасгалжуулагчтай хамт бэлтгэл хийж, найзуудтайгаа фитнесээр хичээллэгсдийн нэг биш. Ганцаараа байх боломж олддог тул хэрэгцээгээ хангах гэсэндээ л гүйдэг.

-Та аливааг хийхдээ өөртөө их итгэлтэй байх юм. Цаг хугацааг ухраачихаад өнгөрсөн амьдралаа бага ч атугай өөрчлөхсөн гэсэн бодол төрдөг үү?

-Бүхэлд нь өөрчилье гэж хүсдэггүй. Өнгөрсөн хугацаанд хийж бүтээж, цуглуулсан зүйлстээ би сэтгэл хангалуун байдаг. Мэдээж бүхэлд нь биш ч, жижиг сажиг өөрчлөхсөн гэж боддог зүйл гардаг. Гэхдээ энэ чинь л амьдрал шүү дээ. Би амьдралыг алдаа онооны аль алинтайгаар нь хайрладаг.

О.Ундармаа


0
Зөв, гоёЗөв, гоё
0
Савж уналааСавж уналаа
0
Хөөрхөн юмХөөрхөн юм
0
ГайхмаарГайхмаар
0
БурууБуруу
0
ХарамсалтайХарамсалтай
0
ТэнэглэлТэнэглэл
Баярлалаа!

0 Сэтгэгдэл

Leave a Reply

Та сэтгэгдэл бичихдээ Монгол Улсын хууль болон ёс суртахууны хэм хэмжээг баримтална уу. Ёс бус сэтгэгдлийг админ устгах эрхтэй.