"POCUS" оношилгоо, эмчилгээг Монгол Улсад нэвтрүүлнэ

Эрүүл мэндийн яамнаас Япон Улсын ЖАЙКА байгууллагатай хамтран "Монгол Улсын анхан ба хоёр дах шатлалын эмнэлгийн мэргэжилтний төгсөлтийн дараах сургалтыг сайжруулах нь" төслийг 2015 оноос эхлэн 5 жилийн хугацаатай хэрэгжүүлж байгаа бөгөөд уг төслийн хүрээнд хэт авиан аппаратаар үзлэг, оношилгоо, эмчилгээ гүйцэтгэх олон улсын жишиг техник “POCUS – Point-of-care ultrasound”-ийг Монгол Улсын яаралтай тусламж, төгсөлтийн дараах сургалтад нэвтрүүлэх талаарх уулзалт өнөөдөр Эрүүл мэндийн яаманд боллоо.

Уулзалтад Эрүүл мэндийн яамны Төрийн захиргааны удирдлагын газрын дарга Б.Цогтбаатар, мэргэжилтэн Д.Баярмаа, “Монгол Улсын анхан ба хоёр дах шатлалын эмнэлгийн мэргэжилтний төгсөлтийн дараах сургалтыг сайжруулах нь"  төслийн ахлах зөвлөх Иноүэ Нобүаки, Япон Улсын Токио хотын хүүхдийн нэгдсэн тусламж, үйлчилгээний төвийн Хүүхдийн эрчимт эмчилгээ, яаралтай тусламжийн эмч Такэи Хироказү, Олон улсын эрүүл мэнд, анагаах ухааны үндэсний төвийн Эрчимт эмчилгээ, яаралтай тусламжийн төвийн эмч Хиросэ Кэика, Улсын нэгдүгээр төв эмнэлгийн Яаралтай тусламжийн тасгийн эрхлэгч С.Алтансүх нар оролцож, Монгол Улсад хэт авиан аппарат ашиглан нэн тэргүүнд яаралтай тусламжийн чадварыг сайжруулах чиглэлээр хамтран ажиллахаар зөвшилцлөө. Үүнд:

  • Эхний шатанд төрөлжсөн мэргэшлийн эмнэлэг, тусгай мэргэжлийн төвийн яаралтай тусламжийн эмч нараас Япон Улсад хэт авиан аппаратаар тусламж үзүүлэх сургалтад сургаж, дадлагажуулах;
  • Сургалтад хамрагдсан эмч нар Япон Улсын зөвлөхтэй хамтран Монгол Улсын POCUS сургалтын багц, удирдамжийг боловсруулж, сургалт зохион байгуулах;
  • Цаашид POCUS сургалтыг эмнэлгийн мэргэжилтний тасралтгүй сургалтад нэвтрүүлж, аймаг, нийслэлийн эмч нарыг хамруулах талаар судалж, шийдвэрлэх.


Та сэтгэгдэл бичихдээ Монгол Улсын хууль болон ёс суртахууны хэм хэмжээг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд “Монгол Ньюс” медиа групп хариуцлага хүлээхгүй.

Сэтгэгдэл бичих (0)