Өлсгөлөнд нэрвэгдсэн нутгийн иргэд зоо паркийн амьтадыг хулгайлж идэж байна

Венесуэлийн баруун бүсэд орших амьтны хүрээлэнд байгаа амьтадыг өлсгөлөнд нэрвэгдсэн нутгийн иргэд хулгайлах болжээ. Хууль сахиулагчид Колумбын хилийн ойролцоо оршдог амьтны хүрээлэнгийн амьтадыг идэх зорилгоор нутгийн иргэд хулгайлж байна гэж үзэж буй. Өнгөрсөн долоо хоногт тус амьтны хүрээлэнд байсан хоёр зэрлэг гахайг хулгайлсан юм. 

Түүнчлэн арав гаруй төрлийн амьтадыг хулгайлсан бөгөөд баффоло, зөвхөн өмнөд америкт байдаг tapir (зураг дээрх) хэмээх сүүн тэжээлт амьтныг хулгайлж, идшээ болгосон байх магадлалтай гэнэ. Венесуэльд эдийн засаг муудаж, иргэдийн худалдан авах чадвар бага болсон тул хулгай, дээрмийн хэрэг газар авсан юм. Харин Венесуэлийн ерөнхийлөгч Николас Мадуро улсад нь болж буй хүнсний хомсдолыг АНУ-ын бодлого хэмээн буруутгажээ.

Харин зоо паркийн дарга Леонардо Нунес хар тамхины наймаачдыг хулгайн хэрэгт сэжиглэж буй. Түүний үзэж буйгаар хар тамхи борлуулагчид амьтадыг хулгайлаад хар зах дээр борлуулдаг гэж Нунес ярив. Уг амьтны хүрээлэнд хоол хүнс багассан тул өнгөрсөн онд 50 гаруй төрлийн амьтад өлсөж үхсэн гашуун түүхтэй. Амьтны хүрээлэнгийнхэн хулгайчдын дараагийн бай бол тэмээ гэж үзсэн тул говийн амьтныг тусгай хамгаалалтад авчээ.

 

 

Та сэтгэгдэл бичихдээ Монгол Улсын хууль болон ёс суртахууны хэм хэмжээг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд “Монгол Ньюс” медиа групп хариуцлага хүлээхгүй.

Сэтгэгдэл бичих (0)

Илгээх

Энэ тухай